উত্তৰ গুৱাহাটী-ভৰলুমুখ সংযোগী প্ৰস্তাৱিত দলং নিৰ্মাণৰ ফলত সম্ভাব্য প্ৰকৃতি ধ্বংসৰ মুকলি বিৰোধিতা অৰণ্য মানৱ যাদৱ পায়েঙৰ
উত্তৰ গুৱাহাটী-ভৰলুমুখ সংযোগী প্ৰস্তাৱিত দলং নিৰ্মাণৰ ফলত সম্ভাব্য প্ৰকৃতি ধ্বংসৰ মুকলিভাৱে বিৰোধিতা কৰিলে পদ্মশ্ৰী সন্মানেৰে সন্মানিত অৰণ্য মানৱ যাদৱ পায়েঙে।
গছৰ সুৰক্ষাৰ দাবীত গুৱাহাটী মহানগৰীৰ ভৰলুমুখত থকা ব্ৰহ্মপুত্ৰৰ পাৰৰ শংকৰদেৱ উদ্যানত আজি পুৱাতে আহি উপস্থিত হয় প্ৰকৃতিপ্ৰেমীগৰাকী।
চৰকাৰে নিজ খেয়াল খুঁচিমতে উন্নয়নৰ নামত প্ৰকৃতি ধ্বংসৰ বাবে চলোৱা কাৰ্যকলাপক কঠোৰ ভাষাৰে সমালোচনা কৰি তেওঁ কয় যে আমি উন্নয়নৰ বিৰোধিতা নকৰো। কিন্তু উন্নয়নৰ নামত জধে-মধে গছ কটাৰ বিৰোধিতা কৰো।
গুৱাহাটীৰ বয়োজ্যেষ্ঠ নাগৰিক, ছাত্ৰ সমাজ আৰু বিভিন্ন ব্যক্তি, দল-সংগঠন তথা পশ্চিম গুৱাহাটী অঞ্চলৰ ৰাইজৰ উপস্থিতিত পায়েঙে সম্ভাব্য সমাধানৰ বাবে বিভিন্ন পাৰদৰ্শী ব্যক্তি, প্ৰতিষ্ঠানক সামৰি এখন কাৰিকৰী সমিতি গঠন কৰি নদীপাৰটোৰ সুৰক্ষা সুনিশ্চিত কৰিবলৈ চৰকাৰৰ ওচৰত দাবী জনায়।
চীন, টাইৱান আদি দেশৰ উদাহৰণ দাঙি ধৰি তেওঁ কয় যে সেইসমূহ দেশত প্ৰকৃতিৰ বাবে প্ৰতিকূল কোনো উন্নয়নমূলক কাৰ্যসূচী গ্ৰহণ কৰা নহয়। বৰং প্ৰকৃতিৰ সুৰক্ষা সুনিশ্চিত কৰিহে পৰিকল্পনা গ্ৰহণ কৰা হয়।
পায়েঙে এই ক্ষেত্ৰত চৰকাৰক উপযুক্ত পৰিকল্পনা অনুসৰি প্ৰয়োজনসাপেক্ষে উচ্চ কাৰিকৰী প্ৰযুক্তি ব্যৱহাৰ কৰি এই বৃহৎ সংখ্যক গছ নকটাকৈ দলংখন নিৰ্মাণ কৰিবলৈ অনুৰোধ জনায়।
আনহাতে, দেশৰ বৰ্তমানৰ শিক্ষা নীতিক সমালোচনা কৰি তেওঁ কয় যে প্ৰাথমিক বিদ্যালয়ৰ পৰাই পৰিৱেশ বিজ্ঞান বাধ্যতামূলক হ’ব লাগে। তেওঁ ছাত্ৰ-ছাত্ৰীসকলক যিমান পাৰি গছপুলি ৰোপন কৰি প্ৰতিপালন কৰিবলৈও আহ্বান জনায়।
উল্লেখ্য যে ইয়াৰ পূৰ্বেও নাগৰিকৰ সমন্বয়ৰক্ষী সমিতিৰ আহ্বানক্ৰমে পশ্চিম গুৱাহাটী অঞ্চলৰ ৰাইজে যোৱা ১০ নৱেম্বৰত গছৰ সুৰক্ষাৰ দাবীত ব্ৰহ্মপুত্ৰৰ পাৰত মানৱ শৃঙ্খল গঢ়ি প্ৰতিবাদ সাব্যস্ত কৰিছিল।