নাগৰিকত্ব সংশোধনী বিধেয়কৰ বিৰুদ্ধে ঐতিহ্যমণ্ডিত কটন বিশ্ববিদ্যালয়ৰ ছাত্ৰ-ছাত্ৰীয়ে প্ৰতিবাদী কাৰ্যসূচী অব্যাহত ৰখাৰ সময়তে বিধেয়কখনৰ বিৰোধিতাৰে ওলাই আহিছে কটন মুছলিম ছাত্ৰাবাসৰ প্ৰাক্তন আৱাসীসকল।
বৰ্তমানৰ ছহিদ মোজাম্মিল হক ছাত্ৰাবাস হিচাপে জনাজাত কটন মুছলিম ছাত্ৰাবাসৰ প্ৰাক্তন আৱাসী সন্থাই ধৰ্মৰ ভিত্তিত নাগৰিকত্ব প্ৰদানৰ বাবে কৰা বিধেয়কখন বাতিল কৰাৰ দাবী উত্থাপন কৰিছে। লগতে অহা ৩ ফেব্ৰুৱাৰিত অনুষ্ঠিত হ’বলগীয়া ছাত্ৰাবাসটোৰ প্ৰাক্তন আৱাসী সন্থাৰ সাধাৰণ সভাত বিধেয়কখনৰ বিপক্ষে কাৰ্যসূচীৰো সিদ্ধান্ত গ্ৰহণ কৰিব।
শনিবাৰে অৰ্থাৎ আজি কটন মুছলিম ছাত্ৰাবাসৰ প্ৰাক্তন আৱাসী সন্থাই গুৱাহাটী প্ৰেছ ক্লাবত এখন সংবাদমেলৰ জৰিয়তে এই কথা জানিবলৈ দিছে।
বিধেয়কখন গৃহীত হ’লে সমগ্ৰ উত্তৰ-পূৰ্বাঞ্চলৰ সমাজ জীৱনক সংকটপূৰ্ণ পৰিস্থিতিলৈ ঠেলি নিব বুলি মন্তব্য কৰে ছাত্ৰাবাসটোৰ প্ৰাক্তন আৱাসী সন্থাৰ উপদেষ্টা তথা গুৱাহাটী বিশ্ববিদ্যালয়ৰ অৱসৰপ্ৰাপ্ত অধ্যাপক ড০ আব্দুল মান্নানে।
তেওঁ কয়, ‘এই বিধেয়কে ভাৰতীয় সংবিধানৰ ধৰ্মনিৰপেক্ষ চৰিত্ৰত আঘাত হানিব। এন আৰ চিৰ উন্নীতকৰণৰ কাম চলি থকা সময়ত বিজেপিৰ ভোটবেংকত খহনীয়া আহিব বুলি আশংকা কৰিয়েই নাগৰিকত্ব আইনৰ সংশোধনী কৰিব বিচাৰিছে’।
ইয়াৰ উপৰিও তেওঁ এ আই য়ু ডি এফ প্ৰধান বদৰুদ্দিন আজমলৰ নাম ব্যৱহাৰ কৰি মন্ত্ৰী ড০ হিমন্ত বিশ্ব শৰ্মাই ধৰ্মীয় সংখ্যাগুৰু সকলৰ মনত মুছলমান বিদ্বেষী ভাৱ জগোৱাৰ চেষ্টা চলোৱাৰ অভিযোগ উত্থাপন কৰে।
উল্লেখযোগ্য যে কিছুদিন পূৰ্বে হিমন্ত বিশ্ব শৰ্মাই নাগৰিকত্ব সংশোধনী বিধেয়কৰ জৰিয়তে ৰাজ্যৰ ১৮ টা বিধান সভা সমষ্টি আজমলৰ অধীনলৈ যোৱাৰ পৰা ৰক্ষা কৰিব পৰা যাব বুলি এক বিতৰ্কিত মন্তব্য কৰিছিল।
একেখন সংবাদমেলতে প্ৰাক্তন কটনীয়ান তথা বিজেপিৰ সদ্যপদত্যাগী নেতা মেহদী আলম বৰাই মন্ত্ৰী হিমন্ত বিশ্ব শৰ্মাই মইনবড়ী সত্ৰ সন্দৰ্ভত কৰা মন্তব্যৰ তীব্ৰ বিৰোধিতা কৰে।
সত্ৰখনৰ ওচৰে পাজৰে থকা মুছলমান সম্প্ৰদায়ৰ লোকসকলৰ লগত তাত কোনো সংঘাত নাই বুলি স্পষ্ট কৰি দি তেওঁ কয় যে গৰাখহনীয়াৰ বাবেহে মইনবড়ী সত্ৰ স্থানান্তৰ কৰিবলগীয়া হৈছিল। ‘বুৰঞ্জী নজনাকৈ’ হিমন্তই এই মন্তব্য কৰা বুলিও মেহদী আলম বৰাই সংবাদমেলত কয়।
তেওঁ লগতে কামাখ্যা দেৱোত্বৰৰ ১২ হাজাৰ বিঘা মাটি কোনে বেদখল কৰি আছে সেই কথা স্পষ্ট কৰিবলৈও হিমন্ত বিশ্ব শৰ্মাক প্ৰত্যাহ্বান জনায়।
