অহা ২৬ ডিচেম্বৰত গুৱাহাটীলৈ আহিবলগীয়া কেন্দ্ৰীয় গৃহমন্ত্ৰী অমিত শ্বাহৰ উপস্থিতিত জ্যেষ্ঠ কংগ্ৰেছী নেত্ৰী তথা গোলাঘাট সমষ্টিৰ বিধায়িকা অজন্তা নেওগে বিজেপিত যোগদান কৰাৰ সম্ভাৱনা আছে। তেওঁৰ বিজেপিত যোগদানৰ আনুষ্ঠানিকতাহে বাকী আছে।
বৃহস্পতিবাৰে সন্ধিয়া মুখ্যমন্ত্ৰী সৰ্বানন্দ সোণোৱাল আৰু বিত্তমন্ত্ৰী ড০ হিমন্ত বিশ্বৰ শৰ্মাৰ সৈতে এক দীঘলীয়া বৈঠকত মিলিত হয় প্ৰাক্তন মন্ত্ৰী অজন্তা নেওগ।
২০২১ চনৰ বিধানসভাৰ নির্বাচনত চৰকাৰ গঠন কৰিব পৰাকৈ শক্তি গোটাব পৰাৰ সম্ভাৱনা নেদেখি আৰু বহুকেইজন কংগ্রেছী নেতাই বিজেপিত যোগদান কৰাটো প্রায় নিশ্চিত হৈছে।
২৬ ডিচেম্বৰতে কেন্দ্রীয় গৃহ মন্ত্রী অমিত শ্বাহৰ উপস্থিতিত গুৱাহাটীত কংগ্রেছৰ চাৰিজন নেতাই বিজেপিত যোগদান কৰিব বুলি জানিব পৰা গৈছে৷
ৰাজ্যিক বিজেপিৰ সূত্রসমূহৰ মতে সিদিনা কংগ্রেছৰ বর্তমানৰ তিনিগৰাকী বিধায়ক আৰু এগৰাকী প্রাক্তন বিধায়কে বিজেপিত যোগদান কৰিব৷
সেই অনুসৰি, প্ৰাক্তন মন্ত্রী অজন্তা নেওগ, সৰুপথাৰৰ বিধায়িকা ৰ’জলীনা তির্কী, লক্ষীপুৰৰ বিধায়ক ৰাজদীপ গোৱালাৰ উপৰি প্রাক্তন কংগ্ৰেছী বিধায়ক সুশান্ত বৰগোহাঁয়ে বিজেপিত যোগদান কৰিব।
অজন্তা নেওগ, ৰ’জলীনা তির্কী আৰু ৰাজদীপ গোৱালাৰ নাম পূৰ্বৰে পৰাই চৰ্চাত আছিল যদিও সুশান্ত বৰগোহাঁইৰ নাম নতুনকৈ চৰ্চালৈ আহিছে।
থাওৰা সমষ্টিৰ প্রাক্তন বিধায়ক বৰগোহাঁয়ে বিজেপিত যোগদানৰ বাবে আগ্রহ ব্যক্ত কৰিছে আৰু বৰ্তমান বিজেপিৰ প্ৰভাৱশালী মন্ত্ৰী হিমন্ত বিশ্ব শৰ্মাৰ এসময়ৰ ঘনিষ্ঠ নেতা হিচাপেও পৰিচিত।
সম্প্রতি থাওৰা বিজেপিৰ বিধায়ক কুশল দুৱৰী যদিও অহা নির্বাচনত তেওঁ সমষ্টিটো ধৰি ৰাখিব নোৱাৰে বুলি ধাৰণা কৰিয়েই সুশান্ত বৰগোহাঁইক থাওৰাত প্রক্ষেপ কৰাৰ চিন্তা কৰিছে বিজেপিয়ে।
মুঠৰ ওপৰত ক্ষমতাৰ কেন্দ্ৰত উপবিষ্ট হ’বলৈ বহু বিৰোধী নেতা এতিয়া ঙৰি দাঙি ৰৈছে। ইপিনে, প্ৰাক্তন মুখ্যমন্ত্ৰী তৰুণ গগৈৰ মৃত্যুৰ পাছত কংগ্ৰেছত ভাঙোন আনিবলৈ বিজেপিয়েও জোৰদাৰ প্ৰচেষ্টা চলাইছে। এইক্ষেত্ৰত বিজেপিত থকা পূৰ্বৰ কংগ্ৰেছী লবীটোৱেই যথেষ্ট তৎপৰ হৈ পৰিছে।
