ভাৰতীয় প্ৰযুক্তিবিদ্যা প্ৰতিষ্ঠান, খড়গপুৰৰ এক শেহতীয়া অধ্যয়নৰ পিছতেই কেন্দ্ৰীয় চৰকাৰে কল্যাণমূলক আঁচনিসমূহৰ অধীনত পুষ্টিযুক্ত চাউলৰ বিতৰণ সাময়িকভাৱে স্থগিত ৰখাৰ সিদ্ধান্ত গ্ৰহণ কৰিছে। এই অধ্যয়নত পুষ্টিযুক্ত চাউলৰ দীৰ্ঘম্যাদী সংৰক্ষণ আৰু গুণাগুণ হ্ৰাস পোৱাৰ সন্দৰ্ভত গুৰুতৰ উদ্বেগ প্ৰকাশ কৰা হৈছে, যাৰ পৰিপ্ৰেক্ষিতত চৰকাৰে এই পদক্ষেপ গ্ৰহণ কৰিবলৈ বাধ্য হৈছে।
পূৰ্বতে চৰকাৰে অপুষ্টি নিৰ্মূল কৰাৰ লক্ষ্যৰে প্ৰধানমন্ত্ৰী গৰিব কল্যাণ অন্ন যোজনা আৰু অন্যান্য সম্পৰ্কীয় কাৰ্যসূচীৰ অধীনত দেশৰ কোটি কোটি হিতাধিকাৰীক এই পুষ্টিযুক্ত চাউল প্ৰদান কৰিছিল। এক চৰকাৰী বিবৃতিত কেন্দ্ৰই জানিবলৈ দিয়ে যে পি এম জি কে এ ৱাই আৰু অন্যান্য কল্যাণমূলক আঁচনিৰ অধীনত চাউলত পুষ্টি সংযোজনৰ প্ৰক্ৰিয়াটো পৰ্যালোচনা কৰা হৈছে। হিতাধিকাৰীসকলৰ বাবে এক ফলপ্ৰসূ আৰু কাৰ্যকৰী পুষ্টি যোগান ব্যৱস্থা নিৰ্ধাৰণ নোহোৱালৈকে এই প্ৰক্ৰিয়াটো সাময়িকভাৱে বন্ধ ৰখাৰ সিদ্ধান্ত গ্ৰহণ কৰা হৈছে।
উল্লেখ্য যে, ২০১৯ চনত ৰাজহুৱা বিতৰণ ব্যৱস্থাৰ জৰিয়তে পৰীক্ষামূলকভাৱে তিনি বছৰৰ বাবে এই পুষ্টিযুক্ত চাউলৰ বিতৰণ আৰম্ভ কৰা হৈছিল। পৰৱৰ্তী সময়ত, ২০২২ চনত এই পদক্ষেপৰ সম্প্ৰসাৰণ ঘটোৱা হয় আৰু ২০২৪ চনৰ মাৰ্চ মাহৰ ভিতৰত সকলো কল্যাণমূলক আঁচনিতে ইয়াক প্ৰৱৰ্তন কৰা হয়। কিন্তু দেশৰ বিভিন্ন কৃষি-জলবায়ু অঞ্চলত প্ৰকৃত সংৰক্ষণৰ অৱস্থাত পুষ্টিযুক্ত চাউল আৰু পুষ্টিযুক্ত চাউলৰ কাৰ্নেলৰ (FRK) আয়ুস নিৰ্ধাৰণ কৰিবলৈ চৰকাৰে আই আই টি খড়গপুৰক দায়িত্ব অৰ্পণ কৰিছিল। প্ৰতিবেদনখনত উল্লেখ কৰা অনুসৰি আৰ্দ্ৰতা, সংৰক্ষণৰ পৰিৱেশ, উষ্ণতা, আপেক্ষিক আৰ্দ্ৰতা আৰু পেকেজিং সামগ্ৰীৰ দৰে কাৰকসমূহে এই চাউলৰ স্থিৰতা আৰু আয়ুসৰ ওপৰত যথেষ্ট প্ৰভাৱ পেলায়।
এই সন্দৰ্ভত প্ৰতিবেদনখনত কোৱা হৈছে, “দীৰ্ঘদিনীয়া সংৰক্ষণ আৰু ব্যৱস্থাপনাৰ সময়ত এই চাউলৰ পৰা সুক্ষ্ম পুষ্টিকৰ উপাদানসমূহ হেৰাই যোৱাৰ লগতে ইয়াৰ আয়ুসো হ্ৰাস পায়। ফলস্বৰূপে, ইয়াৰ প্ৰকৃত কাৰ্যকৰী আয়ুস আশাতকৈ কম হৈ পৰে, যিয়ে ইয়াৰ মূল পুষ্টিগত উপকাৰিতাক সীমিত কৰে।”
চৰকাৰী ক্ৰয়ৰ পৰিমাণ আৰু বাৰ্ষিক বিতৰণৰ হাৰলৈ লক্ষ্য কৰিলে দেখা যায় যে চাউল সাধাৰণতে দুইৰ পৰা তিনি বছৰলৈকে সংৰক্ষণ কৰা হয়। পি এম জি কে এ ৱাই আৰু অন্যান্য আঁচনিৰ অধীনত বাৰ্ষিক ৩৭২ লাখ মেট্ৰিক টন আৱণ্টনৰ সৈতে, ২০২৫-২৬ বৰ্ষৰ খাৰিফ বিপণন বতৰৰ পৰা লাভ কৰিবলগীয়া চাউলকে ধৰি কেন্দ্ৰীয় ভঁৰালত মুঠ ৬৭৪ লাখ মেট্ৰিক টন চাউল মজুত থকাৰ অনুমান কৰা হৈছে।
