৪ ফেব্ৰুৱাৰীৰ পৰা শ্ৰীমন্ত শংকৰদেৱ কলাক্ষেত্ৰত দুদিনীয়াকৈ অনুষ্ঠিত হোৱা সদৌ অসম গৰীয়া মৰীয়া দেশী জাতীয় পৰিষদৰ পঞ্চদশ কেন্দ্ৰীয় প্ৰতিষ্ঠা দিৱসৰ আজি সামৰণি পৰে।
প্ৰতিষ্ঠা দিৱসৰ লগত সংগতি ৰাখি আজি আয়োজন কৰা মুকলি সভাত বিভিন্ন জাতি-জনগোষ্ঠীয় সংগঠনৰ নেতৃত্বৰ লগতে বহু কেইগৰাকী বিশিষ্ট ব্যক্তিয়ে ভাষণ প্ৰদান কৰে।
মুকলি সভাত ভাষণ দি সদৌ অসম টাই আহোম যুৱ পৰিষদৰ সভাপতি লিতুল বুঢ়াগোহাঁইয়ে কয় ‘অসমৰ কাৰণে হিন্দু মুছলমানৰ কথা থাকিব নোৱাৰে। অসমৰ কাৰণে ১৯৭১ চনৰ পাছত অহা হিন্দু হওঁক মুছলমান হওঁক কাৰো স্থান নাই।‘
‘গৰীয়া মৰীয়া দেশী জাতীয় পৰিষদৰ প্ৰতিষ্ঠা দিৱসৰ পৰা হুংকাৰ দিছো আমি কা কেতিয়াও নামানো। অসমীয়া জাতি, ভাষাৰ কাৰণে আমি সকলো উসৰ্গিত। এই কথা চৰকাৰৰ দখলত থকা প্ৰত্যেকজন মানুহে জনা দৰকাৰ।‘ ভাষণ প্ৰসংগত বুঢ়াগোহাঁইয়ে এইদৰে কয়।
ইপিনে, গৰীয়া মৰীয়া দেশী জাতীয় পৰিষদৰ লোকসকল যদি খিলঞ্জীয়া নহয় বুলি কয় এই কথা কেতিয়াও মানি লোৱা নহয় বুলি দাবী কৰি তেওঁ কয় ‘জাতিৰ কাৰণে প্ৰতিজন মানুহ যদি উসৰ্গিত হ’ব পাৰে তেতিয়া ইয়াত বেলেগ প্ৰশ্ন কি থাকিব পাৰে?’
আনহাতে, উক্ত মুকলি সভাতে, কা বিৰোধী আন্দোলন তীব্ৰতৰ কৰিবৰ বাবে সদৌ অসম গৰীয়া মৰীয়া দেশী জাতীয় পৰিষদৰ লগতে অন্যান্য সংগঠনৰ নেতৃত্বক আহ্বান জনায় আলোচনাপন্থী আলফা নেতা অনুপ চেতিয়াই।
‘কাৰ বিৰুদ্ধে আন্দোলন চলি থাকিব, যেতিয়ালৈকে অসমক কা ৰ আওতাৰ পৰা আঁতৰ নকৰে। কা বিৰোধী আন্দোলন কিছু কিছু ক্ষেত্ৰত স্তিমিত হোৱা দেখিবলৈ পাইছো। প্ৰধান মন্ত্ৰী নৰেন্দ্ৰ মোদী আৰু কেন্দ্ৰীয় গৃহ মন্ত্ৰী অমিত শ্বাহেও অসমৰ আন্দোলনৰ প্ৰতি গুৰুত্ব দিয়া নাই বা সন্মান প্ৰদৰ্শন কৰা নাইষ সেয়েহে আন্দোলনৰ নেতৃত্বক এই আন্দোলন জোৰদাৰ কৰিবলৈ আহ্বান জনাইছো।’ চেতিয়াই কয়।
আনহাতে মুকলি সভাত আমন্ত্ৰিত অতিথি হিচাপে উপস্থিত থাকি আক্ৰাছুৰ মুখ্য উপদেষ্টা হিতেশ বৰ্মণে কয় ‘গৰীয়া মৰীয়া দেশী জাতীয় পৰিষদৰ লগত কোচ ৰাজবংশী ছাত্ৰ সন্থা সদায় একেলগে আগবাঢ়িম। দুয়োটা জনগোষ্ঠীৰে সমস্যাবোৰ আমি আলোচনাৰ মাধ্যমেৰে সমাধানৰ বাবে চৰকাৰৰ ওচৰত দাবী জনাই আহিছো আৰু ভৱিষ্যতেও যাম। আমি ধৰ্মীয়ভাৱে বিভক্ত হ’লেও অন্তৰৰ পৰা জনগোষ্ঠীয় সত্তা কেতিয়াও ভাগ হোৱা নাই।‘
২০১৬ চনৰ পৰা কাৰ বিৰুদ্ধে আছু আৰু ৩০ জনগোষ্ঠীয় সংগঠনৰ সৈতে একত্ৰিতভাৱে আন্দোলন কৰি আহিছে বুলি সদৰী কৰে সংগঠনটোৰ কেন্দ্ৰীয় সাধাৰণ সম্পাদক আজিজুল ৰহমানে।
তেওঁ আৰু কয় ‘এইখন শংকৰ মাধৱ আৰু আজানৰ দেশ। খিলঞ্জীয়া মুছলমান গৰীয়া মৰীয়া আৰু দেশী। পূৰ্ববংগীয় মূলৰ মুছলমানসকল বাংলাদেশী, সেইকাৰণে আমাৰ মাজত সম্পূৰ্ণ বিভেদ আছে। আমি ভাষা কওঁ, অসমীয়া সংস্কৃতি পালন কৰো আৰু অসমীয়াত আমি সপোনো দেখো। পূৰ্ববংগীয় মুছলমানসকলে অসমীয়া ভাষা কয় যদিও তেওঁলোকৰ খোৱাৰ ধৰণ-কৰণ বেলেগ। গৰীয়া মৰীয়া সকলৰ বিবাহ, মৃত্যপৰ্ব সকলোবোৰ অসমীয়া সংস্কৃতিৰ ৰীতি নিয়ম অনুসৰি পালন কৰো।‘
সংগঠনটোৰ মহানগৰ জিলা সমিতিৰ কাৰ্য্যকৰী সভাপতি ইছমাইল আলীয়ে কয় ‘এই শংকৰ আজানৰ মিলনভূমিত কোনেও সাম্প্ৰদায়িক বীজ সিঁচিব নোৱাৰে। কোনোধৰণৰ সাম্প্ৰদায়িক কথা ইয়াত নচলিব। বিজেপি চৰকাৰে আমাক প্ৰতাৰণা কৰিছে। আমি বেলেগৰ পৰা অহা লোক নহয়, আমি ইয়াৰে ভূমিপুত্ৰ।‘
