অসম চৰকাৰৰ লোক নিৰ্মাণ (পথ) বিভাগৰ অধীনত সমষ্টিটোৰ চটাই চিনাতলী পথ,টীয়ক সোণাৰী মিচিং গাঁও পথ আৰু চিৰাম মিচিং গাঁও পথৰ আজি আধাৰশিলা স্থাপন কৰে টীয়কৰ বিধায়িকা ৰেণুপমা ৰাজখোৱাই।
দীৰ্ঘদিন ধৰি উক্ত তিনিওটা পথৰ দুৰৱস্থাই অঞ্চলবাসীক জ্বলাকলা খুৱাই আহিছিল আৰু এইবাৰ চৰকাৰৰ পৰা মূল পথৰ উন্নতি বিচাৰিছিল গঞা ৰাইজে।
ৰাইজৰ দুখ দুৰ্দশাৰ প্ৰতি লক্ষ্য ৰাখি বিধায়িকাগৰাকীয়ে লোৱা এই পদক্ষেপক এতিয়া সকলোৱে আদৰণি জনাইছে l
আধাৰশিলা স্থাপনৰ দিনযোৰা কাৰ্যসূচীত টীয়ক বিধান পৰিষদৰ সভাপতি বিকাশ শইকীয়া,লোক নিৰ্মাণ বিভাগৰ অভিজন্তা অঞ্জন দে, অগপৰ ৰাজ্যিক কাৰ্যনিৰ্বাহকৰ সদস্য পৰেশ বৰা,অসম যুৱ পৰিষদৰ কেন্দ্ৰীয় সমিতিৰ সম্পাদক প্ৰাণজিৎ হাজৰিকা,অগপৰ যোৰহাট জিলা পৰিষদৰ সম্পাদক দ্বীপেন বুঢ়াগোহাঁই,সমাজকৰ্মী ৰুমী চেতীয়া,অসীম বৰুৱাকে প্ৰমুখ্য কৰি ভালেসংখ্যক বিশিষ্ট ব্যক্তিয়ে সহযোগিতা আগবঢ়ায়।