ৰাজস্থানৰ আলৱাৰৰ অতিৰিক্ত জিলা আৰু সত্ৰ ন্যায়াধীশৰ আদালতে ২০১৮ চনৰ ৰাকবৰ খান লিঞ্চিং গোচৰত (গণ প্ৰহাৰ কৰি হত্যা) চাৰিজন “গোৰক্ষক’’ক দোষী সাব্যস্ত কৰি সাত বছৰৰ সশ্ৰম কাৰাদণ্ডৰ লগতে ১০ হাজাৰ টকাকৈ জৰিমনা বিহে।
অতিৰিক্ত জিলা ন্যায়াধীশ সুনীল কুমাৰ গোৱালে তেওঁৰ ৯২ পৃষ্ঠাৰ ৰায়দানত পৰমাজীত, ধৰ্মেন্দ্ৰ, নৰেশ আৰু বিজয়ক আই পি চিৰ ৩০৪, ৩২৩ আৰু ৩৪১ ধাৰাত শাস্তি প্ৰদান কৰাৰ বিপৰীতে পঞ্চম অভিযুক্ত নৱল কিশোৰ শৰ্মাক বিচাৰ বিভাগে তেওঁৰ বিৰুদ্ধে গোচৰটো প্ৰমাণ কৰাত ব্যৰ্থ হোৱাৰ বাবে দোষমুক্ত কৰে।
লগতে পঢ়ক: বন্দুক নিষিদ্ধ জাপানত আততায়ীৰ গুলীচালনা আৰু ছুৰীকাঘাতৰ ঘটনাত তিনিজন লোক নিহত
দাখিল কৰা এজাহাৰৰ মতে, টহল দি থকাৰ সময়তে আলৱাৰৰ বিশ্ব হিন্দু পৰিষদৰ নেতা নৱল কিশোৰৰ পৰা আৰক্ষীলৈ ফোন আহিছিল যে একাংশ লোকে গৰু সৰবৰাহ কৰি আছে।
২০১৮ চনৰ ২০ আৰু ২১ জুলাইৰ মাজ নিশা ৰাকবৰ খান আৰু তেওঁৰ বন্ধু আছলাম খানক গৰু চোৰাং ব্যৱসায়ৰ সন্দেহত নৃশংসভাৱে আক্ৰমণ কৰি ৰাকবৰ খানক হত্যা কৰা হয়। দৰাচলতে তেওঁলোকে আলৱাৰৰ এখন গাঁৱৰ পৰা খোজকাঢ়ি গাই গৰুকেইটা কলগাওঁ, নুহৰ নিজৰ ঘৰলৈ লৈ গৈ আছিল। যদিও আছলামে পলায়ন কৰিবলৈ সক্ষম হয়, তথাপিও ৰাকবৰক নিৰ্মমভাৱে ঠেলি দিয়া হয়।
আৰক্ষীয়ে সেই স্থানত উপস্থিত হৈ ৰাকবৰক এখন চিকিৎসালয়লৈ লৈ যায় যদিও তেওঁক মৃত বুলি ঘোষণা কৰা হয়। এফ আই আৰত আৰক্ষীয়ে তেওঁৰ মৃত্যুৰ পূৰ্বে বক্তব্যৰ লিপিবদ্ধ কৰিছিল য’ত তেওঁ গোৰক্ষকৰ দলে আক্ৰমণ কৰাৰ কথা কৈছিল।
লগতে পঢ়ক: বৈবাহিক জীৱনত দীৰ্ঘদিন ধৰি সংগীক যৌন সংগমৰ পৰা বঞ্চিত কৰাটো মানসিক নিষ্ঠুৰতা: আদালত
জীৱন নিৰ্বাহৰ বাবে সংগ্ৰাম কৰি থকা ৰাকবৰৰ পৰিয়ালে কয় যে তেওঁলোকে অনুভৱ কৰিছে যে এই শাস্তি যথেষ্ট নহয়। ৰাকবৰৰ পত্নী আছমিনাই তিনিবছৰ পূৰ্বে এক দুৰ্ঘটনাৰ সন্মুখীন হৈছিল। তেতিয়াৰ পৰাই তেওঁ বিচনাত পৰি আছে আৰু ছয়টা সন্তানে ঘৰখন চলাবলৈ কাম কৰে। ‘আমাৰ দৰে দুখীয়া মানুহৰ বাবে ন্যায়ৰ অৰ্থ কম’ বুলিও তেওঁ কয়।
