ৰাজ্যত উদ্বেগজনক হাৰত বৃদ্ধি পাইছে চাইবাৰ ক্ৰাইম চক্ৰৰ সক্ৰিয়তা। শেহতীয়াকৈ গুৱাহাটী মহানগৰীত এক বৃহৎ চাইবাৰ চক্ৰ উৎখাত হোৱাৰ পিছতে ৰাজ্যত চলি থকা চাইবাৰ ক্ৰাইমৰ ভয়াৱহতা পোহৰলৈ আহিছিল।
গুৱাহাটীৰ পিছত এইবাৰ আৰক্ষীয়ে নগাঁৱত উৎখাত কৰিছে এনে এক চাইবাৰ ক্ৰাইম চক্ৰ। নগাঁও আৰক্ষীৰ এটা দলে অভিযান চলাই চাইবাৰ ক্ৰাইমত লিপ্ত থকাৰ সন্দেহত গ্ৰেপ্তাৰ কৰিছে চাৰি অভিযুক্তক।
আৰক্ষীয়ে সদৰী কৰা মতে, ধৃত চাৰি অভিযুক্ত মোবাইল ডিভাইচৰ জৰিয়তে চাইবাৰ অপৰাধৰ সৈতে জড়িত আছিল। নগাঁৱৰ কামপুৰৰ কচুৱা অঞ্চলৰ সমীপত অভিযুক্তকেইজনক গ্ৰেপ্তাৰ কৰে আৰক্ষীয়ে।
অভিযানৰ সময়ত আৰক্ষীয়ে ১১টা মোবাইল ফোন, ৪৯৭ খন চিম কাৰ্ড আৰু দুটা পাৱাৰ বেংক জব্দ কৰে। ধৃত চাৰি অভিযুক্তৰ নাম ক্ৰমে আব্দুল ৰহমান, ফৈজুল হক, উমৰ ফাৰুক, আৰু ছাদ্দাম হুছেইন বুলি আৰক্ষীয়ে সদৰী কৰিছে।
অভিযোগ অনুসৰি অ’টিপি মোড ব্যৱহাৰ কৰি মোবাইল ডিভাইচৰ জৰিয়তে মানুহক লুণ্ঠন চলাইছিল এই চক্ৰটোৱে।বেংক বা আন বিত্তীয় প্ৰতিষ্ঠানৰ কৰ্মচাৰীৰ ৰূপত ধৃত লোককেইজনে একাংশ লোকক ফান্দত পেলোৱা বুলি অভিযোগ উঠিছে।
বেংক একাউণ্ট বন্ধ হৈ পৰা বুলি ভয় খুৱাই অথবা ঋণৰ প্ৰলোভনেৰে সাধাৰণ লোক কিছুলৈ অ’টিপি প্ৰেৰণ কৰি ফোন যোগে চক্ৰটোৱে এই অ’টিপি বিচাৰে আৰু কোনো লোকে ফান্দত পৰি অ’টিপি দিলেই বেংকৰ পৰা সমুদায় ধন লুটি নিয়ে।
লুণ্ঠনত সফল হোৱাৰ পিছতে ভুক্তভোগীক ফোন কৰিবলৈ ব্যৱহাৰ কৰা নম্বৰটো চুইচ কৰে দুৰ্বৃত্তই। আৰক্ষীয়ে এই চক্ৰটোক গ্ৰেপ্তাৰ কৰাৰ পিছত অভিযুক্তৰ সৈতে আন কোনো লোক জড়িত আছে নেকি, সেই সন্দৰ্ভত তদন্ত অব্যাহত ৰাখিছে।
