লোকসভা নিৰ্বাচনৰ প্ৰথম পৰ্যায়ৰ মনোনয়ন পত্ৰ দাখিলৰ অন্তিম দিনা আজি মঙলদৈত শাসকীয় দলৰ লগতে বিৰোধী ৰাজনৈতিক দলৰ মুঠ ৪ গৰাকী প্ৰাৰ্থীয়ে দৰং জিলা উপায়ুক্ত তথা ৰিটাৰ্নিং বিষয়া ঘনশ্যাম দাসৰ ওচৰত নিজৰ নিজৰ মনোনয়ন পত্ৰ দাখিল কৰে।
মনোনয়ন দাখিল কৰা প্ৰাৰ্থীৰ ভিতৰত আছে শাসকীয় বিজেপি দল তথা মিত্ৰজোঁটৰ প্ৰাৰ্থী দিলীপ শইকীয়া, কংগ্ৰেছৰ প্ৰাৰ্থী তথা ৰাজ্যসভাৰ সাংসদ ভুৱনেশ্বৰ কলিতা, য়ুনাইটেড পিপ’লছ পাৰ্টী লিবাৰেলৰ প্ৰদীপ কুমাৰ দৈমাৰী আৰু ভাৰতীয় গণ পৰিষদৰ মনোনীত প্ৰাৰ্থী বিৰেন বাচাক।
মনোনয়ন পত্ৰ দাখিলৰ সময়ত দিলীপ শইকীয়াই সহস্ৰাধিক দলীয় কৰ্ম-কৰ্তা আৰু সমৰ্থকৰ সৈতে সমদল কৰি আহি মনোনয়ন পত্ৰ দাখিল কৰে। মনোনয়ন দাখিলৰ সময়ত তেওঁক সংগ দিয়ে ৰাজ্যিক বিজেপিৰ সভাপতি ৰঞ্জিৎ দাস, মন্ত্ৰী ভৱেশ কলিতা, ৰিহন দৈমাৰী, অগপ বিধায়ক সত্যব্ৰত কলিতাৰ লগতে আন কেইবাজনো দলীয় নেতা-কৰ্মী।
ঠিক সেইদৰে ভুনেশ্বৰ কলিতাও বিশাল সমদলেৰে আহি নিজৰ মনোনয়ন দাখিল কৰে। দলগাঁৱৰ বিধায়ক ইলিয়াছ আলী, প্ৰাক্তন মন্ত্ৰী বসন্ত দাস, ড০ জয়নাথ শৰ্মাৰ লগতে শীৰ্ষ পৰ্যায়ৰ নেতা-কৰ্মী মনোনয়ন দাখিলৰ সময়ত উপস্থিত থাকে।
উল্লেখ্য যে মনোনয়ন দাখিলৰ বাবে বিজেপি আৰু কংগ্ৰেছৰ হাইপ্ৰফাইল নেতা দুজনে নিজৰ নিজৰ শক্তি প্ৰদৰ্শনৰ উদ্দেশ্যে লগত লৈ অনা হাজাৰ হাজাৰ সমৰ্থকৰ বাবে আজিৰ দিনটোত স্তব্ধ হৈ পৰে মঙলদৈৰ স্বাভাৱিক জনজীৱন।