ইৰাণ যুদ্ধৰ মাজতে ইউক্ৰেইনৰ এখন বন্দৰত জাহাজত ভয়ংকৰ আক্ৰমণ সংঘটিত হৈছে। এই ঘটনাত ৪ জন ভাৰতীয় নাৱিকৰ মৃত্যু হৈছে। কিয়েভে এই আক্ৰমণৰ বাবে ৰাছিয়াক দোষাৰোপ কৰিছে। নতুন দিল্লীয়ে সমগ্ৰ ঘটনাক গৰিহণা দিছে।
একাধিক সংবাদ মাধ্যমৰ বাতৰি অনুসৰি মাকৈ কঢ়িয়াই নিয়া জাহাজখনৰ নাম হৈছে ‘গোল্ডেন লিঅ’।গিনি-বিছাউৰ পতাকাবাহী। দেওবাৰে নিৰ্ধাৰিত সময়ত ই অডেছা বন্দৰৰ পৰা ৰাওনা হয়। কিন্তু কিছু সময়ৰ পাছত হঠাৎ তিনিটা মিছাইলে আঘাত কৰে জাহাজখন। লগে লগে বাণিজ্যিক জাহাজখনত জুই লাগে। আকাশখন ক’লা ধোঁৱাই আৱৰি ধৰে।
কিন্তু এই আক্ৰমণ কোনে সংঘটিত কৰিছিল সেয়া এতিয়াও স্পষ্ট হোৱা নাই। এই আক্ৰমণৰ পিছতে ইউক্ৰেইনৰ সেনাই উদ্ধাৰ অভিযান আৰম্ভ কৰে। গোটেই ৰাতি অনুসন্ধানৰ অন্তত ১৭ জন জাহাজৰ কৰ্মীক উদ্ধাৰ কৰা হয়।
এই আক্ৰমণত ৯ জন জাহাজৰ ক্ৰু আৰু ১ জন পাইলট নিহত হোৱা বুলি জনাইছে কিয়েভে। ইয়াৰে ৪ জন ভাৰতীয়। আন এজন গুৰুতৰভাৱে আঘাতপ্ৰাপ্ত হৈ চিকিৎসালয়ত চিকিৎসাধীন হৈ আছে। ইউক্ৰেইনে দাবী কৰিছে যে এই আক্ৰমণৰ আঁৰত ৰাছিয়া আছে। অৱশ্যে মস্কোৱে এতিয়ালৈকে স্পষ্ট কৰা নাই।
নতুন দিল্লীয়ে এই আক্ৰমণক তীব্ৰ গৰিহণা দিছে। সোমবাৰে বৈদেশিক পৰিক্ৰমা মন্ত্ৰালয়ৰ এক বিবৃতিত কোৱা হৈছে, ‘ভাৰতে এই আক্ৰমণক গৰিহণা দিছে। বাণিজ্যিক জাহাজক লক্ষ্য কৰা আৰু নিৰীহ নাৱিকক হত্যা কৰাটো অতি নিন্দনীয়। জাহাজ চলাচল আৰু বাণিজ্যৰ স্বাধীনতাত বাধা দিয়াৰ পৰা বিৰত থকা উচিত। ইউক্ৰেইনত থকা ভাৰতীয় দূতাবাসে সমগ্ৰ পৰিস্থিতিৰ ওপৰত তীক্ষ্ণ দৃষ্টি ৰাখিছে। ভুক্তভোগীক সহায়ৰ বাবে সকলো প্ৰচেষ্টা চলোৱা হৈছে।’
উল্লেখযোগ্য যে অডেছাৰ গৱৰ্ণৰে কয় যে চলিত মাহত তাত ৰাছিয়াৰ আক্ৰমণত ২৮ জন লোক নিহত হৈছে। ইয়াৰ উপৰিও ইউক্ৰেইনৰ অন্যান্য চহৰত ৰাছিয়াৰ আক্ৰমণত কমেও ৮ জন লোকে প্ৰাণ হেৰুৱাইছে।
