নগাঁৱৰ কাষৰিগাঁৱত গৃহহীন হোৱাৰ উপক্ৰম হৈছে কেইবাটাও পৰিয়ালৰ। একমাত্ৰ আশ্ৰয় থলীখনটো আধুনিকতাৰ হাতোৰা পৰি থানবান হৈ যোৱাৰ শংকা আহি পৰিছে যদিও পৰিয়ালটোৰ প্ৰতিজনে কিন্তু কাৰোলৈও যেন তিলমানো ভ্ৰক্ষেপ নকৰি প্ৰকৃতিৰ ওপৰতে সৰ্ৱস্ব এৰি দি দুবাহু মেলি কেৱল উমলি ফুৰিছে নীল আকাশৰ বুকুত!
এয়া হৈছে নগাঁৱৰ পুৰণিগুদামৰ নিকটৱৰ্ত্তী কাষৰিগাঁওস্থিত ৰাজপথৰ দাঁতিৰ এজোপা সু-উচ্চ শিমলু গছত বাস কৰি থকা বহু কেইটা বৰটোকোলাৰ পৰিয়ালৰ দুৰ্ভাগ্যৰ জীয়া কাহিনী।
শেহতীয়াকৈ চাৰিলেন যুক্ত ৰাষ্ট্ৰীয় ঘাইপথ নিৰ্মাণত নিয়োজিত কতৃপক্ষই এই গছ জোপাত এক বিশেষ চিহ্ন খোদিত কৰা পৰিলক্ষিত হৈছে। যাৰ বাবে স্থানীয় প্ৰকৃতিপ্ৰেমী সকলে ধাৰণা কৰিছে যে ৰাজপথ সম্প্ৰসাৰণৰ খাতিৰত বৃহদাকাৰ গছ জোপা নিশ্চয় শীঘ্ৰে কাটি পেলোৱা হ’ব।
কিন্তু অতি উদ্বেগৰ কথা এইয়ে যে, দুষ্প্ৰাপ্য বৰটোকোলা চৰাইৰ সুচল বাসস্থান বুলি বিগত বছৰ-বছৰ ধৰি সকলোৰে চিৰ পৰিচিত গছ জোপাত এতিয়াও বাঁহ সাজি কণ-কণ পোৱালিসহ বাস কৰি আছে দুষ্প্ৰাপ্য চৰাইৰ প্ৰায় সাতটাকৈ পৰিয়ালে।
সততে ৰাজপথ চোৱাৰে পাৰহৈ যোৱা বহু দেশী-বিদেশী লোকৰ আকৰ্ষণৰ অন্যতম কেন্দ্ৰ বিন্দু হৈ পৰা গছজোপা যদি আনুসাঙ্গিক বিষয়সমূহ চিন্তা-চৰ্চা নকৰি ফ’ৰলেন নিৰ্মাণৰত প্ৰতিষ্ঠানে শীঘ্ৰে কটাৰ ব্যৱস্থা কৰে তেন্তে বৰটোকোলা কণমানি পোৱালিসমূহলৈ জীৱনৰ প্ৰতি চৰম ভাবুকি আহি পৰিব। বৃহত্তৰ অঞ্চলটোৰ পৰা নিঃশেষ হৈ যোৱাতো একেবাৰে নিশ্চিত হৈ পৰিব দুষ্প্ৰাপ্য চৰাইৰ প্ৰজাতিটো।
ফ’ৰলেন নিৰ্মাণৰ প্ৰথম অৱস্থাত ৰাইজৰ অনুৰোধ ৰক্ষা কৰি কতৃপক্ষই গছজোপা নকটাকৈ আছিল যদিও শেহতীয়াকৈ দেখা দিয়া এই অশনি সংকেতে এতিয়া ঘোৰ চিন্তিত কৰি তুলিছে স্থানীয় প্ৰকৃতিপ্ৰেমী তথা পুৰণিগুদামৰ বহুজনক।
কলং নৈৰ পাৰতে থকা বৃহদাকাৰ শিমলু জোপাৰ সু-উচ্চ আগত দীৰ্ঘদিন ধৰি নিৰাপদে আশ্ৰয় লৈ থকা বৰটোকোলাৰ এই পৰিয়াল কেইটাক সুৰক্ষিত কৰাৰ স্বাৰ্থত পুৰণিগুদামবাসীয়ে চৰকাৰ তথা বন বিভাগক জনাইছে এটি বিনম্ৰ অনুৰোধ কিম্বা দাবী।
ৰাজ্যৰ যাতায়ত ব্যৱস্থা উন্নয়নৰ বাবে অতি প্ৰয়োজনীয় চাৰিলেন যুক্ত ৰাজপথ নিৰ্মাণৰ খাতিৰত যদি অনিচ্ছাৰ স্বত্ত্বেও গছ জোপা কাটি পেলাবলগীয়া হয় তেনে শিমলু জোপা কটাৰ পূৰ্বেই সংশ্লিষ্ট বন বিভাগে যিকোনো প্ৰকাৰে বাঁহসহ বৰটোকোলাৰ পোৱালিসমূহ উদ্ধাৰ কৰি আন কোনো সুৰক্ষিত স্থানত পুনঃস্থাপিত কৰিব লাগে যাতে কোনো বিশেষ ক্ষতি নোহোৱাকৈ জীৱন আৰু বংশ-গতি অটুট ৰাখিব পাৰে দুষ্প্ৰাপ্য চৰাই বিধে।