উগ্ৰবাদী সংগঠন নেশ্যনেল লিবাৰেশ্যন ফ্ৰণ্ট অফ ত্ৰিপুৰাৰ চাৰিগৰাকী শীৰ্ষস্থানীয় সদস্যই বৃহস্পতিবাৰে ত্ৰিপুৰা আৰক্ষীৰ ওচৰত আত্মসমৰ্পন কৰে।
ত্ৰিপুৰা আৰক্ষীৰ সঞ্চালক প্ৰধান ভি এছ যাদৱে সংবাদমাধ্যমৰ আগত চাৰিগৰাকী এন এল এফ টি সদস্যই আত্মসমৰ্পন কৰাৰ কথা সদৰী কৰে।
কেডাৰৰ অভাৱ আৰু অৰ্থনৈতিক সংকটৰ বাবে ত্ৰিপুৰাত ক্ৰমাৎ উগ্ৰবাদী সংগঠন সমূহ দুৰ্বল হৈ আহিছে বুলি আৰক্ষী সঞ্চালক প্ৰধান গৰাকীয়ে লগতে কয়।
আত্মসমৰ্পন কৰা এন এল এফ টি সদস্য কেইগৰাকী হৈছে ক্ৰমে- সংগঠনটোৰ বৈদেশিক সচিৱ ৰতন কলাই ওৰফে ৰিউবেন, সহকাৰী সাংগঠনিক সম্পাদক জয় সাধন জামাতিয়া ওৰফে জাৰা, সহকাৰী তথ্য আৰু প্ৰচাৰ সম্পাদক মধু ৰঞ্জন নৱাটিয়া ওৰফে য়াফুং আৰু উপ প্ৰধান সেনাধক্ষ্য কুকিলা ত্ৰিপুৰা ওৰফে য়াৰুং।
এন এল এফ টি চাৰিগৰাকী শীৰ্ষস্থানীয় সদস্যৰ আত্মসমৰ্পন সংগঠনটোৰ বাবে এক বৃহৎ আঘাত বুলিও ত্ৰিপুৰা আৰক্ষীৰ সঞ্চালক প্ৰধান গৰাকীয়ে লগতে কয়।
আনহাতে, এতিয়াও ত্ৰিপুৰাৰ বিদ্ৰোহী সংগঠন সমূহৰ বহু সংখ্যক সদস্যই মূল সুতিলৈ উভতি অহাৰ বাবে ত্ৰিপুৰা আৰক্ষীৰ সৈতে যোগাযোগ কৰি আছে বুলিও সঞ্চালক প্ৰধান গৰাকীয়ে জানিবলৈ দিয়ে।
