কিছুদিন ধৰি ফ্ৰান্সত ৰাজনৈতিক সংকটৰ সৃষ্টি হৈছিল। সেই পৰিস্থিতিত নিৰ্বাচনৰ মাত্ৰ তিনিমাহৰ পিছতে ফ্ৰান্সৰ প্ৰধানমন্ত্ৰী মিচেল বাৰ্নিয়াৰে অনাস্থা ভোটত পৰাজিত হ’ল। ফলত ফ্ৰান্সত চৰকাৰৰ পতন ঘটিল। ইয়াৰ আগতে ১৯৬২ চনত ফ্ৰান্সত একেধৰণে চৰকাৰৰ পতন ঘটিছিল।
অনাস্থা ভোটত পৰাস্ত হোৱাৰ পিছত তেওঁ ফ্ৰান্সৰ প্ৰথমজন আটাইতকৈ কম সময়ৰ প্ৰধানমন্ত্ৰী হিচাপে পৰিগণিত হয়। মিচেল বাৰ্নিয়াৰে শীঘ্ৰেই ৰাষ্ট্ৰপতি ইমানুৱেল মেক্ৰোৰ হাতত পদত্যাগ পত্ৰ দাখিল কৰিব।
জানিব পৰা মতে, পৰৱৰ্তী বাজেট দাখিলক কেন্দ্ৰ কৰি ফ্ৰান্সৰ ৰাজনৈতিক সংকট বৃদ্ধি পায়। এনে পৰিস্থিতিত বিৰোধীয়ে আস্থা ভোটৰ দাবী উত্থাপন কৰে। তাৰ ভিত্তিত বুধবাৰে ফ্ৰান্সৰ সংসদত ভোটদান অনুষ্ঠিত হয়। ফ্ৰান্সৰ ৫৭৭ আসনৰ নিম্ন সদনৰ ৩৩১ জন সদস্যই বাৰ্নিয়াৰৰ চৰকাৰক উৎখাত কৰিবলৈ ভোটদান কৰে।
সূত্ৰসমূহৰ মতে, ফ্ৰান্সত ক্ৰমবৰ্দ্ধমান বাজেট ঘাটিৰ সন্মুখীন হ’বলগীয়া হোৱাৰ বাবে দেশখনত ৰাজনৈতিক অস্থিৰতাৰ সৃষ্টি হৈছিল। বাৰ্ণীয়ে সংসদীয় অনুমোদন অবিহনে বাজেট গৃহীত কৰিবলৈ বিশেষ ক্ষমতা ব্যৱহাৰ কৰাৰ বাবে অতি বাওঁপন্থী আৰু অতি সোঁপন্থী দলসমূহে ভোটৰ আহ্বান জনায়।
আন্তঃৰাষ্ট্ৰীয় সংবাদ মাধ্যমৰ বাতৰি অনুসৰি বাওঁপন্থী নিউ পপুলাৰ ফ্ৰণ্ট (এন এফ পি) মিত্ৰজোঁট আৰু সোঁপন্থী আৰ এন দলে একেলগে ভোটদান কৰি অনাস্থা প্ৰস্তাৱত বাৰ্নিয়াৰক অপসাৰণ কৰে।
অনাস্থা ভোটত হাৰি তেওঁ এতিয়া ফ্ৰান্সৰ ইতিহাসৰ আটাইতকৈ কম সময়ৰ প্ৰধানমন্ত্ৰী হিচাপে পৰিগণিত হৈছে। ৭৩ বছৰীয়া বাৰ্নিয়াৰে মাত্ৰ ৯১ দিন প্ৰধানমন্ত্ৰী হিচাপে কাৰ্যনিৰ্বাহ কৰিছিল। একে সময়তে তেওঁৰ চৰকাৰ মাত্ৰ ৭৪ দিনহে চলিছিল। তেওঁ ফৰাচী সংবিধানৰ ৪৯ নং অনুচ্ছেদ ব্যৱহাৰ কৰি সামাজিক সুৰক্ষাৰ বাজেট বিধেয়কখন গৃহীত কৰিছিল। তাৰ পিছত বাৰ্নিয়াৰৰ চৰকাৰখনে অনাস্থাৰ ভোটৰ সন্মুখীন হ’বলগীয়া হয়। অৱশ্যে সেই বিধেয়কখন এতিয়া নাকচ কৰা হৈছে।
ইপিনে, তিনিমাহৰ ভিতৰতে চৰকাৰৰ পতনৰ ফলত ফ্ৰান্সত ৰাজনৈতিক সংকটৰ সৃষ্টি হৈছে। কাৰণ ফ্ৰান্সৰ সংবিধান অনুসৰি যিহেতু তিনিমাহ আগতে ভোটদান হৈছিল, গতিকে এবছৰ নিৰ্বাচন অনুষ্ঠিত কৰিব নোৱাৰি। ফলত বাৰ্নিয়েৰৰ ঠাইত ৰাষ্ট্ৰপতিৰ হাতত বিকল্প কম থাকিব।
এনে পৰিস্থিতিত দেশৰ ৰাজনৈতিক মহলে ধাৰণা কৰে যে ৰাষ্ট্ৰপতিয়ে বাৰ্নিয়াৰক ভাৰপ্ৰাপ্ত প্ৰধানমন্ত্ৰী হিচাপে নিযুক্তি দিব পাৰে। কাৰণ নতুন প্ৰধানমন্ত্ৰী নিৰ্বাচনৰ পিছতহে বাচি লোৱা হ’ব, যিটো বৰ্তমান ফ্ৰান্সৰ সংবিধান অনুসৰি সম্ভৱ নহয়।
