ৰাছিয়াৰ প্ৰাক্তন টেনিছ তাৰকা মাৰিয়া ছাৰাপোভা আৰু প্ৰাক্তন ফৰ্মুলা ১ ৰেচাৰ মাইকেল চুমাখাৰৰ বিৰুদ্ধে গুৰগাঁৱত ৰুজু হৈছে প্ৰৱঞ্চনা আৰু অপৰাধমূলক ষড়যন্ত্ৰৰ গোচৰ।
গুৰগাঁওৰ আৰক্ষীয়ে আদালতৰ নিৰ্দেশৰ পিছত ছাৰাপোভা আৰু চুমাখাৰৰ লগতে আন ১১ জনৰ বিৰুদ্ধে প্ৰৱঞ্চনা আৰু অপৰাধমূলক ষড়যন্ত্ৰৰ গোচৰ ৰুজু কৰিছে।
দিল্লীৰ এগৰাকী মহিলাই তেওঁলোকৰ বিৰুদ্ধে প্ৰৱঞ্চনাৰ অভিযোগ উত্থাপন কৰাৰ পিছত এই অভিযোগৰ ভিত্তিত এজাহাৰখন পঞ্জীয়ন কৰা হৈছে।
নতুন দিল্লীৰ ছত্তৰপুৰ মিনি ফাৰ্মৰ বাসিন্দা শ্বেফালী আগৰৱালে অভিযোগ কৰিছে যে তেওঁ ছাৰাপোভাৰ নাম জড়িত থকা এটা প্ৰকল্পত এটা এপাৰ্টমেণ্ট বুক কৰিছিল। প্ৰকল্পটোৰ এটা টাৱাৰ চুমাখাৰৰ নামেৰে নামাকৰণ কৰা হৈছিল বুলিও মহিলা গৰাকীয়ে উল্লেখ কৰে।
এই প্ৰকল্পটো ২০১৬ চনৰ ভিতৰত সম্পূৰ্ণ হ’ব লাগিছিল যদিও এতিয়ালৈকে আৰম্ভ হোৱা নাই বুলি অভিযোগকাৰী মহিলা গৰাকীয়ে লগতে কয়।
এই প্ৰকল্পটোৰ সংগঠক আৰু ইয়াৰ প্ৰচাৰৰ জৰিয়তে ছাৰাপোভা আৰু চুমাখাৰো এই প্ৰৱঞ্চনাৰ অংশ বুলি মহিলা গৰাকীয়ে অভিযোগ কৰিছে।
ইয়াৰ পূৰ্বে মহিলা গৰাকীয়ে মেচাৰ্ছ ৰিয়েলটেক ডেভেলপমেণ্ট এণ্ড ইনফ্ৰাষ্ট্ৰাকচাৰ (ইণ্ডিয়া) প্ৰাইভেট লিমিটেড, ছাৰাপোভা আৰু চুমাখাৰৰ বিৰুদ্ধে গুৰুগ্ৰাম আদালতত প্ৰায় 80 লাখ টকাৰ প্ৰতাৰণাৰ অভিযোগ দাখিল কৰিছিল।
অভিযোগকাৰী মহিলা গৰাকীয়ে আদালতৰ সন্মুখত উল্লেখ কৰিছিল যে তেওঁ আৰু তেওঁৰ স্বামীয়ে গুৰগাওঁৰ চেক্টৰ 73-ত ছাৰাপোভাৰ নামেৰে নামাকৰণ কৰা প্ৰকল্পটোত এটা আৱাসিক এপাৰ্টমেণ্ট বুক কৰিছিল।
কিন্তু এই প্ৰকল্পটোৰ সংগঠক কোম্পানীবোৰে প্ৰকল্পটোত ধন বিনিয়োগ কৰিবলৈ তেওঁলোকক আকৰ্ষণ কৰি প্ৰতাৰণা কৰিছিল। এই প্ৰকল্পটো কেতিয়াও বিতৰণৰ বাবে নাছিল বুলি মহিলা গৰাকীয়ে অভিযোগ কৰিছে।
“আমি বিজ্ঞাপনৰ জৰিয়তে প্ৰকল্পটোৰ বিষয়ে জানিব পাৰিছিলো। প্ৰকল্পটোৰ ছবি আৰু বহুতো মিছা প্ৰতিশ্ৰুতি দিয়াৰ পিছত কোম্পানী পৰিচালনা সংস্থাটোৰ ওচৰলৈ গৈছিলো।”— তেওঁ অভিযোগটোত কয়।
প্ৰকল্পটোৰ প্ৰচাৰক হিচাপে ছাৰাপোভা আৰু চুমাখাৰে ক্ৰেতাসকলৰ সৈতে ষড়যন্ত্ৰ কৰিছিল বুলি অভিযোগ কৰি তেওঁ কয় যে প্ৰাক্তন টেনিছ তাৰকাগৰাকীয়ে প্ৰকল্প স্থানটো পৰিদৰ্শন কৰিছিল আৰু এখন টেনিছ একাডেমী আৰু ক্ৰীড়া সামগ্ৰীৰ দোকান খোলাৰ প্ৰতিশ্ৰুতি দিছিল।
বাদশ্বাহপুৰ আৰক্ষী থানাত আইপিচি ধাৰা ৩৪, ১২০-B, ৪০৬ আৰু ৪২০ ৰ অধীনত এজাহাৰ খন পঞ্জীয়ন কৰা হৈছে।
“আদালতৰ নিৰ্দেশ অনুসৰি এজাহাৰ পঞ্জীয়ন কৰা হৈছে আৰু আমি বিষয়টো পৰ্যালোচনা কৰি আছো। তদন্ত চলি আছে।” আৰক্ষী চকীৰ বিষয়া দিনকাৰে কয়।