গুৱাহাটীৰ বৰ্ষাপাৰ ক্ৰিকেট ষ্টেডিয়ামত অহা ৪ মাৰ্চৰ পৰা প্ৰথমবাৰৰ বাবে অনুষ্ঠিত হ’ব মহিলা আন্তঃৰাষ্ট্ৰীয় টি-২০ ক্ৰিকেট শৃংখলা। ভাৰত আৰু ইংলেণ্ডৰ মাজত অনুষ্ঠিত হ’ব লগীয়া শৃংখলাটোৰ বাবে ইতিমধ্যে যাৱতীয় প্ৰস্তুতি প্ৰায় সম্পূৰ্ণ কৰি তুলিছে অসম ক্ৰিকেট সন্থাই।
বৃহস্পতিবাৰে এ চি এয়ে এখন সংবাদমেল সম্বোধন কৰি এই কথা জনায়। লগতে কয় যে ৪, ৭ আৰু ৯ মাৰ্চত অনুষ্ঠিত হ’ব লগীয়া মেচকেইখন উপভোগ কৰাৰ বাবে ক্ৰিকেটপ্ৰেমীয়ে ক্ৰয় কৰিব নালাগে টিকট। দৰ্শকৰ উপস্থিতি বৃদ্ধি কৰাৰ উদ্দেশ্যেই টিকটৰ ব্যৱস্থা কৰা নাই বুলি এ চি এৰ সম্পাদক দেৱজিৎ শইকীয়াই কয়।
উল্লেখ্য যে শৃংখলাটোত ভাগ লোৱাৰ উদ্দেশ্যে ভাৰত আৰু ইংলেণ্ডৰ মহিলা ক্ৰিকেট দল দুটা আজি গুৱাহাটী পাবহি বুলিও সংবাদমেলত জানিবলৈ দিয়ে।
ইফালে শৃংখলাটোৰ আটাইকেইখন মেচ উপভোগৰ বাবে স্কুল-কলেজৰ ছাত্ৰ-ছাত্ৰীসকলক আহ্বান জনাইছে এ চি এয়ে। অসম চৰকাৰৰ তৰফৰ পৰাও শৃংখলাটোৰ বাবে সম্পূৰ্ণ সমৰ্থন আগবঢ়োৱা বুলি কালিৰ সংবাদমেলতে ক্ৰিকেট সন্থাৰ কৰ্মকৰ্তাই জনায়।
আনহাতে, অসমত মহিলা ক্ৰিকেটৰ বিকাশ সাধন কৰাৰ বাবে অসম ক্ৰিকেট সন্থাই এখন আন্তঃমণ্ডল মহিলা ক্ৰিকেট প্ৰতিযোগিতা আয়োজনৰ চিন্তা-চৰ্চা কৰা বুলিও অসম ক্ৰিকেট সন্থাই উল্লেখ কৰে।
সংবাদমেলত এ চি এৰ সম্পাদকৰ উপৰি উপস্থিত থাকে সভাপতি ৰমেন দত্ত, উপ-সভাপতি পৰীক্ষিত দত্ত আৰু যুটীয়া সম্পাদক কামাখ্যা শইকীয়া।
