অসমৰ বিশেষ আৰক্ষী সঞ্চালক প্ৰধান মুন্না প্ৰসাদ গুপ্তাই বুধবাৰে প্ৰকাশ কৰে যে যোৱা এটা বছৰত ৰাজ্যখনত অপৰাধমূলক গোচৰ সমাধান আৰু অপৰাধীক দোষী সাব্যস্ত কৰাৰ ক্ষেত্ৰত বৃহৎ সফলতা লাভ কৰা হৈছে।
সংবাদ মাধ্যমৰ সৈতে হোৱা বাৰ্তালাপত তেওঁ উল্লেখ কৰে যে ২০২৫ বৰ্ষত সমগ্ৰ অসমত প্ৰায় ৭০ হাজাৰ এজাহাৰ পঞ্জীয়ন কৰা হৈছিল আৰু ইয়াৰে প্ৰায় ৯৫ শতাংশ গোচৰ ইতিমধ্যে সমাধান কৰা হৈছে।
বিশেষ আৰক্ষী সঞ্চালক প্ৰধানগৰাকীয়ে জনোৱা মতে, ৰাজ্যখনত দোষী সাব্যস্তকৰণৰ হাৰো যথেষ্ট বৃদ্ধি পাইছে; পূৰ্বে এই হাৰ ২৬ শতাংশ আছিল যদিও বৰ্তমান সেয়া ৫০ শতাংশলৈ বৃদ্ধি পাইছে। যিসকল আৰক্ষী বিষয়াই সঠিক তদন্তৰ জৰিয়তে শক্তিশালী অভিযোগনামা দাখিল কৰি অপৰাধীক শাস্তি প্ৰদানত গুৰুত্বপূৰ্ণ ভূমিকা পালন কৰিছে, তেওঁলোকক বিভাগীয়ভাৱে পুৰস্কৃত কৰা হৈছে আৰু বিপৰীতে তদন্তত গাফিলতি কৰা বিষয়াসকলৰ বিৰুদ্ধে কঠোৰ ব্যৱস্থা গ্ৰহণ কৰা হৈছে।
বৰ্তমান যিকোনো অপৰাধৰ তদন্তৰ ক্ষেত্ৰত তদন্তকাৰী বিষয়াৰ বাবে অপৰাধস্থলী পৰিদৰ্শন কৰাটো বাধ্যতামূলক কৰা হৈছে আৰু ফৰেনচিক বিশেষজ্ঞৰ দ্বাৰা স্থান পৰীক্ষা কৰাৰ লগতে সমগ্ৰ প্ৰক্ৰিয়াটোৰ ভিডিঅ’গ্ৰাফী কৰাটোও অনিবাৰ্য কৰা হৈছে।
মুন্না প্ৰসাদ গুপ্তাই লগতে কয় যে নতুন আইনী সংস্কাৰসমূহে ভুক্তভোগী আৰু সাধাৰণ ৰাইজৰ অধিকাৰক অধিক প্ৰাধান্য দিছে, যাৰ ফলত এতিয়া কোনো লোকে যিকোনো আৰক্ষী থানাতে নিজৰ অভিযোগ দাখিল কৰিব পাৰিব।
চৰকাৰে নিৰ্দিষ্ট সময়সীমাৰ ভিতৰত গোচৰসমূহ নিষ্পত্তি কৰি জনসাধাৰণক খৰতকীয়া ন্যায় প্ৰদানৰ ওপৰত গুৰুত্ব দিছে। আনকি অভিযুক্ত আদালতত উপস্থিত নাথাকিলেও বিচাৰ প্ৰক্ৰিয়া স্তব্ধ নহৈ চলাই নিয়াৰ ব্যৱস্থা কৰা হৈছে। ইয়াৰ উপৰি সাক্ষীসকলে এতিয়া ভিডিঅ’ কনফাৰেন্সৰ জৰিয়তে নিজৰ ভাষ্য প্ৰদান কৰিব পাৰিব, যাৰ ফলত তেওঁলোকে বাৰে বাৰে আদালতলৈ যোৱাৰ প্ৰয়োজন নহ’ব আৰু ন্যায়িক প্ৰক্ৰিয়াটো ৰাইজৰ বাবে অধিক সহজসাধ্য হৈ পৰিব।
