লিবিয়াৰ প্ৰাক্তন একনায়কত্ববাদী শাসক মুৱাম্মাৰ গাড্ডাফীৰ পুত্ৰ তথা এসময়ৰ উত্তৰাধিকাৰী ছাইফ আল ইছলাম গাড্ডাফীক তেওঁৰ নিজ গৃহতে গুলীয়াই হত্যা কৰা হৈছে। লিবিয়াৰ জিণ্টান চহৰত সংঘটিত হোৱা এই চাঞ্চল্য্যকৰ হত্যাকাণ্ডৰ বিষয়ে পশ্চিম লিবিয়াৰ নিৰাপত্তাৰক্ষীৰ সূত্ৰই তথ্য প্ৰদান কৰিছে। ৰাজধানী ট্ৰিপলিৰ পৰা প্ৰায় ১৩৬ কিলোমিটাৰ নিলগত অৱস্থিত এই চহৰখনতে ৫৩ বছৰীয়া গাড্ডাফীয়ে দীৰ্ঘদিন ধৰি বসবাস কৰি আছিল। তেওঁৰ মৃত্যুৰ খবৰ ছাইফ আল ইছলামৰ অধিবক্তা খালেদ আল জাইদী আৰু ৰাজনৈতিক সহযোগী ওথমান আব্দুৰাহিমে সামাজিক মাধ্যমৰ জৰিয়তে নিশ্চিত কৰিছে।
স্থানীয় সংবাদ মাধ্যম ফাৱাচেল মিডিয়াৰ তথ্য অনুসৰি, এক সশস্ত্ৰ দুষ্কৃতিকাৰীৰ দলে ছাইফ আল ইছলামৰ ঘৰত সোমাই এই হত্যাকাণ্ড সংঘটিত কৰে। পৰৱৰ্তী সময়ত তেওঁৰ ৰাজনৈতিক দলে প্ৰকাশ কৰা এক বিবৃতিত কোৱা হৈছে যে চাৰিজন মুখা পিন্ধা লোকে তেওঁক হঠাতে আক্ৰমণ কৰিছিল। এই আক্ৰমণৰ সময়ত গাড্ডাফীৰ পুত্ৰই দুষ্কৃতিকাৰীৰ সৈতে যুঁজ দিছিল যদিও শেষ ৰক্ষা নহ’ল। সমগ্ৰ ঘটনাটো তেওঁৰ ঘৰৰ চি চি টিভিত বন্দী হৈছে আৰু বৰ্তমান লিবিয়াৰ আৰক্ষীয়ে এই ঘটনাৰ তদন্ত আৰম্ভ কৰিছে।
ছাইফ আল ইছলামৰ জন্ম ১৯৭২ চনত ট্ৰিপলিত হৈছিল আৰু তেওঁ লণ্ডন স্কুল অৱ ইকনমিক্সৰ পৰা উচ্চ শিক্ষা লাভ কৰিছিল। দেউতাক মুৱাম্মাৰ গাড্ডাফীৰ শাসনকালত তেওঁক এক সংস্কাৰবাদী মুখ হিচাপে চৰ্চা কৰা হৈছিল। ২০১১ চনত নাটো বাহিনীৰ সমৰ্থনত লিবিয়াত হোৱা বৃহৎ বিদ্ৰোহত গাড্ডাফী শাসনৰ পতন ঘটে আৰু সেই একে বছৰৰে অক্টোবৰ মাহত মুৱাম্মাৰ গাড্ডাফী নিহত হয়। দেউতাকৰ মৃত্যুৰ পাছত লিবিয়া গৃহযুদ্ধৰ কৱলত পৰে আৰু ছাইফ আল ইছলামে দেশৰ পৰা পলাই যাবলৈ চেষ্টা কৰি থকা অৱস্থাত জিণ্টানৰ যোদ্ধাসকলৰ হাতত ধৰা পৰে।
দীৰ্ঘদিন ধৰি বন্দী হৈ থকাৰ পিছত ২০১৭ চনত লিবিয়াৰ বিৰোধী চৰকাৰে তেওঁক ক্ষমা কৰি দিছিল আৰু তেতিয়াৰ পৰাই তেওঁ জিণ্টান চহৰত আছিল। অৱশ্যে ২০১৫ চনত লিবিয়াৰ এখন আদালতে তেওঁক মৃত্যুদণ্ডৰ নিৰ্দেশ দিছিল আৰু আন্তৰ্জাতিক ফৌজদাৰী আদালতেও তেওঁক মানৱতাৰ বিৰুদ্ধে অপৰাধৰ বাবে বিচাৰি আছিল। ২০২১ চনত তেওঁ লিবিয়াৰ ৰাষ্ট্ৰপতি নিৰ্বাচনত প্ৰতিদ্বন্দ্বিতা কৰাৰ কথা ঘোষণা কৰি পুনৰ চৰ্চালৈ আহিছিল যদিও বিভিন্ন ৰাজনৈতিক কাৰণত সেই নিৰ্বাচন অনুষ্ঠিত হোৱা নাছিল। তেওঁৰ এই আকস্মিক মৃত্যুৱে এতিয়া লিবিয়াৰ ৰাজনৈতিক পৰিস্থিতিত পুনৰ তীব্ৰ জোকাৰণিৰ সৃষ্টি কৰিছে।
