ব্ৰিটিছৰ শাসনকালতে ছাৰ্ভে অব ইণ্ডিয়াই ভাৰতৰ মানচিত্ৰ অংকন কৰোঁতা গুৰুতৰ ভুল কৰা বাবেই ভাৰতৰ ১০০ কিলোমিটাৰতকৈ অধিক ভূমি চীনত অন্তৰ্ভুক্ত হ’ল বুলি দাবী তুলি আজি লোকসভাত ভাৰতৰ মানচিত্ৰ পুনৰ অংকন কৰাৰ আহ্বান জনাইছে অৰুণাচল প্ৰদেশৰ সাংসদ টাপিৰ গাৱে।
সাংসদজনে সদনৰ মজিয়াত তথ্য দাঙি ধৰি কয় ৰাজ্যখনৰ দিবং উপত্যকা জিলাত থকা এংগি উপত্যকাত (Angie Valley) ১০০ কিলোমিটাৰতকৈ অধিক ভূমি চীনৰ ফালে সামৰি সীমাৰেখা অংকন কৰা হৈছিল।
“সামৰিক পৰিভাষাত অঞ্চলটোক পীচ ষ্টেইট ৱান (Peace StateI) বুলিও কোৱা হয় আৰু ভাৰতীয় বাহিনীৰ দ্বাৰা সুৰক্ষা দি থকা হয়। কিন্তু ছাৰ্ভে অব ইণ্ডিয়াই প্ৰস্তুত কৰা মানচিত্ৰত ইয়াক ১০০ কিলোমিটাৰতকৈ বেছি চীনত সোমাই আছে”, অৰুণাচল পূব সমষ্টিক প্ৰতিনিধিত্ব কৰা গাৱে লোকসভাত কয়।
একেদৰে আনজ (Anjaw) জিলাৰো কাজাপ আৰু কায়ো উপত্যকাৰ দৰে কিছু অংশ ভাৰতৰ ঠাই যদিও ছাৰ্ভে অব ইণ্ডিয়াই এইবোৰক ভাৰতৰ পৰা বাহিৰত ৰাখিলে, দাবী সাংসদজনৰ।
তেওঁ লগতে কয় যে এই অঞ্চলবোৰত থকা সকলো ব’ৰ্ডাৰ আউটপোষ্ট ভাৰতীয় সেনা আৰু ইণ্ডো-তিব্বেতান সীমান্ত আৰক্ষীৰ জোৱানে সুৰক্ষা দিয়ে।
“যেনেকৈ প্ৰধান মন্ত্ৰী নৰেন্দ্ৰ মোদীৰ নেতৃত্বত পাকিস্তান অধিকৃত কাশ্মীৰক ভাৰতীয় মানচিত্ৰৰ অধীনলৈ অনা হ’ল সেইদৰে ভাৰত চৰকাৰক অৰুণাচল প্ৰদেশৰ সমস্ত অংশক অন্তৰ্ভুক্ত কৰি মানচিত্ৰ প্ৰস্তুত কৰাৰ বাবে আহ্বান জনাইছো”, গাৱে কয়।
