নিশা আৰক্ষীৰ এনকাউণ্টাৰত মৃত্যু গাড়ীগাঁৱৰ দলবদ্ধ বলাৎকাৰ কাণ্ডৰ অভিযুক্ত বিকি আলীৰ

ৰাজ্যজুৰি জোকাৰণিৰ সৃষ্টি কৰা গাড়ীগাঁওৰ দলবদ্ধ বলাৎকাৰ কাণ্ডৰ অভিযুক্ত বিকি আলীৰ মৃত্যু ঘটিছে।

নিশা আৰক্ষীৰ এনকাউণ্টাৰত মৃত্যু হয় বিকি আলীৰ। মঙলবাৰে পলাতক অৱস্থাত থকা বিকিক আৰক্ষীয়ে গ্ৰেপ্তাৰ কৰিবলৈ সক্ষম হৈছিল।

যোৱা নিশা বলাৎকাৰ কাণ্ড সংঘটিত হোৱা মহানগৰীৰ বিশেষ স্থানলৈ আৰক্ষীয়ে বিকিক লৈ গৈছিল যদিও বিকিয়ে পলাবলৈ চেষ্টা কৰাত আৰক্ষীয়ে গুলীচালনা কৰিবলৈ বাধ্য হয়।

দেহত চাৰিটা গুলী লগা বিকিক নিশা ১-১০ বজাত গুৱাহাটী চিকিৎসা মহাবিদ্যালয় চিকিৎসালয়লৈ নিয়া হয় যদিও চিকিৎসকে তেওঁক মৃত ঘোষণা কৰে।

বিকিৰ পিঠিত তিনিটা আৰু বুকুত এটা গুলী লাগিছে।  সম্প্ৰতি বিকিৰ মৃতদেহ গুৱাহাটী চিকিৎসা মহাবিদ্যালয় চিকিৎসালয়ত ৰখা হৈছে।

উল্লেখ্য গুৱাহাটী মহানগৰীৰ গাড়ীগাওঁৰ দলবদ্ধ বলাৎকাৰৰ অভিযুক্ত বিকি আলীক কালি গ্ৰেপ্তাৰ কৰা হৈছিল।
গাড়ীগাঁওৰ দামপুৰ পাহাৰত লুকাই আছিল অভিযুক্ত বিকি আলী।

মঙ্গলবাৰে দুপৰীয়া প্ৰায় এক বজাত জালুকবাৰী আৰক্ষী আৰু মহানগৰ আৰক্ষীৰ এটা দলে অভিযান চলাই বিকিক গ্ৰেপ্তাৰ কৰিছিল ।

জালুকবাৰী আৰক্ষীয়ে এতিয়াও অন্য চাৰিজন অভিযুক্তৰ সন্ধানত অভিযান চলাই আছে।

গ্ৰেপ্তাৰ কৰি পোনে পোনে বিকিক লৈ অনা হৈছিল জালুকবাৰী থানালৈ।

উল্লেখযোগ্য যে মহানগৰীৰ এখন হোটেলৰ এটা বন্ধ কোঠাত পাঁচ জন যুৱকে মিলি এগৰাকী কিশোৰীক ধৰ্ষণ কৰি কিশোৰী গৰাকীৰ ভিডিঅ’ তৈয়াৰ কৰিছিল।

তাৰ পাছতে পৰিয়ালৰ লোকে পানবাজাৰ মহিলা আৰক্ষী থানাত Case No. 19/22 US 376(D) IPC, RW SEC. 6 POSCO ACT, RW 67 (B) IT ACT’ৰ আধাৰত পাঁচজন যুৱকৰ বিৰুদ্ধে গোচৰ ৰুজু কৰে।

সেই গোচৰৰ ভিত্তিতে আৰক্ষীয়ে অভিযান চলাই অভিযুক্ত বিকিক গ্ৰেপ্তাৰ কৰিছিল।

 অইন চাৰিজন অভিযুক্ত এতিয়াও পলাতক অৱস্থাতে আছে।

ইপিনে পৰিয়ালৰ লোকে বিকিৰ মৃত্যুক এক পৰিকল্পিত হত্যকাণ্ড বুলি অভিযোগ কৰিছে।

বিকিৰ পিতৃয়ে সংবাদমাধ্যমৰ আগত কয় যে বিকিয়ে আৰক্ষীৰ ওচৰত আত্মসমৰ্পন কৰিছিল।

আত্মসমৰ্পন কৰা ল’ৰা এজনে কিয় পলাবলৈ চেষ্টা কৰিব বুলি তেওঁ প্ৰশ্ন কৰে।

বিকিক পৰিকল্পিত ভাবে হত্যা কৰা হৈছে বুলি অভিযোগ কৰি পিতৃয়ে প্ৰশ্ন কৰে— আইন, আদালত ক’ত?