অসমৰ হিয়াৰ আমঠু জুবিন গাৰ্গৰ আকস্মিক মৃত্যুক লৈ এতিয়াও সমগ্ৰ ৰাজ্যতে শোকৰ ছাঁ বিৰাজ কৰি আছে। ইয়াৰ মাজতে জুবিন গাৰ্গৰ পত্নী গৰিমা শইকীয়া গাৰ্গে ছচিয়েল মিডিয়াৰ জৰিয়তে জনসাধাৰণৰ বাবে এক গুৰুত্বপূৰ্ণ স্পষ্টীকৰণ আগবঢ়াইছে।
তেওঁ উল্লেখ কৰিছে যে যোৱা ১৯ ছেপ্টেম্বৰত ছিংগাপুৰত জুবিনক হেৰুৱাৰ পিছত পৰিয়ালটো গভীৰ মানসিক আঘাত আৰু শোকত ভাগি পৰিছিল। সেই কঠিন সময়ত পৰিয়ালটোৰ বাবে লগে লগে কোনো আইনী পদক্ষেপ লোৱাটো সম্ভৱ নাছিল। কিন্তু পৰৱৰ্তী সময়ত ছচিয়েল মিডিয়াত ভাইৰেল হোৱা এখন নাওৰ ভিডিঅ’ প্ৰত্যক্ষ কৰাৰ পিছতে পৰিয়ালটোৰ মনত সন্দেহৰ সৃষ্টি হয় আৰু মৃত্যুৰ কাৰণ স্বাভাৱিক নহয় বুলি তেওঁলোকে অনুভৱ কৰে। ইয়াৰ পাছতে পৰিয়ালৰ তৰফৰ পৰা আৰক্ষীৰ ওচৰত এজাহাৰ দাখিল কৰা হয়।
এই সমগ্ৰ বিষয়টোত ছিংগাপুৰ আৰক্ষীয়ে নিজে এক তদন্ত আৰম্ভ কৰিছিল আৰু ভাৰতীয় উচ্চায়ুক্তৰ সহযোগত মৰণোত্তৰ পৰীক্ষাৰ কাম-কাজ সম্পন্ন কৰা হৈছিল। গৰিমা শইকীয়া গাৰ্গে জনাইছে যে তেওঁলোকে ভাৰতীয় আইনী ব্যৱস্থাৰ ওপৰত সম্পূৰ্ণ আস্থা ৰাখিছে। ছিংগাপুৰ আৰক্ষীয়ে তেওঁলোকৰ সৈতে মাজে মাজে যোগাযোগ কৰিছিল যদিও তদন্তৰ স্বাৰ্থত সেইবোৰ কথা তেতিয়াই ৰাজহুৱা কৰা হোৱা নাছিল। অসম চৰকাৰেও এই ক্ষেত্ৰত এক বিশেষ তদন্তকাৰী দল গঠন কৰি দিছিল আৰু এই দলটোৱে ছিংগাপুৰলৈ গৈও প্ৰয়োজনীয় তথ্য সংগ্ৰহ কৰিছিল। ইয়াৰ ভিত্তিত অসম আৰক্ষীয়ে ইতিমধ্যে এখন বৃহৎ অভিযোগনামা দাখিল কৰিছে য’ত এই ঘটনাক হত্যাৰ সৈতে জড়িত ধাৰাৰ অধীনত ৰখা হৈছে।
যোৱা ১৪ জানুৱাৰীত ছিংগাপুৰৰ আদালতত জুবিন গাৰ্গৰ পৰিয়ালৰ এজন জ্যেষ্ঠ সদস্যই এই সন্দৰ্ভত এক বিতং ভাষ্য প্ৰদান কৰে। সেই ভাষ্যত জুবিনৰ স্বাস্থ্যৰ অৱস্থা, নাওখনত থকা নিৰাপত্তা ব্যৱস্থা, তেওঁ সাগৰত কেনেকৈ পৰিল আৰু সেই সময়ত তাত থকা লোকসকলৰ ভূমিকা কি আছিল সেই সম্পৰ্কে গুৰুতৰ প্ৰশ্ন উত্থাপন কৰা হৈছে। ছচিয়েল মিডিয়াত বিয়পি পৰা ভিডিঅ’সমূহত স্পষ্টকৈ দেখা পোৱা অৱহেলাৰ বিষয়টোও আদালতৰ দৃষ্টিগোচৰ কৰা হৈছে। পৰিয়ালটোৱে জুবিনৰ মৃত্যুৰ প্ৰকৃত সত্য পোহৰলৈ অহাটো বিচাৰিছে আৰু ইয়াত কাৰোবাৰ দোষ থাকিলে তেওঁলোকে উপযুক্ত শাস্তি পোৱাটো কামনা কৰিছে।
শেষত গৰিমা শইকীয়া গাৰ্গে ভাৰত চৰকাৰ আৰু অসম চৰকাৰক আহ্বান জনাইছে যাতে এই সমগ্ৰ আইনী প্ৰক্ৰিয়াটো অতি গুৰুত্বসহকাৰে নিৰীক্ষণ কৰা হয়। তেওঁ কয় যে জুবিন কেৱল এজন ব্যক্তি নাছিল, তেওঁ আছিল সমগ্ৰ অসমৰ আৱেগ। লাখ লাখ গুণমুগ্ধৰ মনত থকা প্ৰশ্নসমূহৰ উত্তৰ পোৱাটো অতি প্ৰয়োজনীয়। সত্যৰ সন্ধানত পৰিয়ালটোৱে সকলো ধৰণৰ আইনী পথ অনুসৰণ কৰিব আৰু ইয়াত কোনো ধৰণৰ আপোচ কৰা নহ’ব বুলি তেওঁ দৃঢ়তাৰে প্ৰকাশ কৰিছে।
