মহাৰাষ্ট্ৰৰ অম্বৰনাথত শেহতীয়াকৈ সংঘটিত পৰিঘটনাই ১৯৮৪ চনৰ ভোপাল গেছ দুৰ্ঘটনাৰ স্মৃতি পুনৰ সজীৱ কৰি তুলিছে।কাৰখানাৰ পৰা বহল এলেকাত বিয়পি পৰা গেছে অঞ্চলটোৰ ওপৰত কুঁৱলীৰ দৰে তৰপ এটা গঢ় লৈ উঠিছে। গেছ নিৰ্গত হোৱাৰ ঘটনা পোহৰলৈ অহাৰ লগে লগে ৰাইজৰ মাজত আতংক বিয়পি পৰে।
স্থানীয় সূত্ৰৰ মতে, গেছ ইমানেই বিয়পি পৰিছে যে সমগ্ৰ চহৰখনতে দৃশ্যমানতা হ্ৰাস পাইছে। নগৰবাসীয়ে চকু, নাক, মুখ আৰু ডিঙিত বিষ অনুভৱ কৰিছে। যিহেতু চহৰখনৰ ওপৰত ধোঁৱাৰ তৰপ পৰিছে, প্ৰথম দৃষ্টিত ইয়াক কুঁৱলীৰে আবৃত যেন লাগিব পাৰে। পৰিস্থিতি ইমানেই হৈছে যে চহৰবাসীক প্ৰয়োজন নহ’লে ৰাজপথলৈ ওলাই আহিবলৈ সাহস নকৰিবলৈ পৰামৰ্শ দিয়া হৈছে। ৰাস্তাত থাকিলেও নাক আৰু মুখ ভালদৰে ঢাকিব লাগে বুলি পৰামৰ্শ দিয়া হৈছে।
কিন্তু স্থানীয় প্ৰশাসনৰ সূত্ৰ অনুসৰি গেছ নিৰ্গত হোৱাৰ পিছতো পৰিস্থিতি বেয়া স্তৰত উপনীত হোৱা নাই। পৰিস্থিতিৰ সৈতে কেনেদৰে মোকাবিলা কৰিব, জৰুৰী ভিত্তিত সভা লোৱা হৈছে। স্থানীয় সূত্ৰৰ পৰা জানিব পৰা মতে, বৃহস্পতিবাৰে নিশা মহানগৰীত বহুতে ডিঙি, নাক, চকু আৰু মুখত হঠাতে জ্বলা-পোৰা অনুভৱ কৰিবলৈ আৰম্ভ কৰে। বহুতৰে আকৌ উশাহ লোৱাত কষ্ট পোৱাৰ দৰে লক্ষণ দেখা যায়। কি ভয়ংকৰ ঘটনা হৈছে এতিয়াও গম পোৱা নাছিল। ঘটনাৰ কিছু মুহূৰ্তৰ ভিতৰতে মহানগৰীত গেছ নিৰ্গত হোৱাৰ আতংক বিয়পি পৰে। তথ্য লাভ কৰি অগ্নিনিৰ্বাপক বাহিনী আৰু প্ৰদূষণ নিয়ন্ত্ৰণ ব’ৰ্ডৰ বিষয়াসকলে ৰাসায়নিক কাৰখানাটোত উপস্থিত হয়। প্ৰথম অৱস্থাত ৰাসায়নিক বিক্ৰিয়াৰ বাবেই এই ঘটনা সংঘটিত হ’ব পাৰে বুলি ধাৰণা কৰা হয়। কাৰখানা কৰ্তৃপক্ষৰ বিৰুদ্ধেও গাফিলতিৰ অভিযোগ উত্থাপন হৈছে।
এই ঘটনাই ১৯৮৪ চনৰ ভোপালৰ গেছ দুৰ্ঘটনাৰ স্মৃতিবোৰ ঘূৰাই আনিলে। ইউনিয়ন কাৰ্বাইড কাৰখানাত গেছ নিৰ্গত হোৱাৰ ফলত ৩৫০০ৰো অধিক লোকৰ মৃত্যু হয়। যিটো এতিয়াও অন্যতম কুখ্যাত পৰিঘটনা হিচাপে চিনাক্ত কৰা হয়।
