গুৱাহাটী উচ্চ ন্যায়ালয়ে শুকুৰবাৰে তামিলনাডু চৰকাৰক হাতী জয়মালাৰ অৱস্থা পৰীক্ষা কৰিবলৈ অসমৰ এটা প্ৰতিনিধি দলক অনুমতি দিয়াৰ নিৰ্দেশ দিয়ে।
আদালতে তামিলনাডু চৰকাৰক গুৱাহাটীৰ পৰা দক্ষিণৰ ৰাজ্যখনৰ মন্দিৰলৈ লৈ যোৱা হাতীবোৰ পৰিদৰ্শন কৰাৰ সময়ত দলটোক নিৰাপত্তা প্ৰদান কৰিবলৈও নিৰ্দেশ দিছে।
ন্যায়াধীশ সুমন শ্যামে অসম চৰকাৰে দ্বাৰা দাখিল কৰা এখন আৱেদনৰ শুনানি গ্ৰহণ কৰি এক অন্তৱৰ্তীকালীন নিৰ্দেশ প্ৰদান কৰি কয় যে আদালতৰ নিৰ্দেশ হাতত পৰাৰ তিনি দিনৰ ভিতৰত হাতীবোৰ পৰিদৰ্শন কৰিবলৈ প্ৰতিনিধি দলটোক অনুমতি দিয়া উচিত।
লগতে পঢ়ক: অসমলৈ ৰাষ্ট্ৰীয় দুৰ্যোগ প্ৰশমন পুঁজিৰ ২৫০ কোটি টকা মুকলি কেন্দ্ৰৰ
ন্যায়াধীশগৰাকীয়ে তামিলনাডুৰ মুখ্য সচিব আৰু আৰক্ষী সঞ্চালক প্ৰধানকো পৰিদৰ্শনৰ বাবে যোৱাৰ সময়ত অসম প্ৰতিনিধি দলক প্ৰয়োজনীয় নিৰাপত্তা প্ৰদান কৰিবলৈ নিৰ্দেশ দিয়ে।
তামিলনাডু চৰকাৰে মাদ্ৰাজ উচ্চ ন্যায়ালয়ক ই লীজত লোৱা হাতীবোৰ অসমলৈ ঘূৰাই নিদিয়ে বুলি কোৱাৰ এদিন পিছত উচ্চ ন্যায়ালয়ৰ এই নিৰ্দেশটো আহিছে।
পিপল ফৰ এথিকেল ট্ৰিটমেণ্ট অফ এনিমেলচ (পেটা)য়ে শেহতীয়াকৈ এটা ভিডিঅ’ মুকলি কৰি অভিযোগ কৰিছিল যে জয়মালাক চেন্নাইৰ শ্ৰীভল্লিপুথুৰৰ আন্দাল মন্দিৰত নিৰ্যাতন কৰা হৈছিল আৰু বন্দী কৰি ৰখা হৈছিল।
লগতে পঢ়ক: ৰাণী এলিজাবেথৰ কফিনৰ ওচৰলৈ যাবলৈ অনুমতি দিয়া নহয় চীনা প্ৰতিনিধিক!
ভিডিঅ’টো ভাইৰেল হোৱাৰ লগে লগে অসম চৰকাৰে হাতীটোৰ অৱস্থা পৰীক্ষা কৰি হাতীটো ৰাজ্যলৈ উভতি অনাৰ পথ প্ৰশস্ত কৰিবলৈ হাতী বিশেষজ্ঞ, বন আৰু আৰক্ষী বিষয়াসকলক লৈ চাৰিজনীয়া সদস্যৰ এটা দল প্ৰেৰণ কৰিছিল।
অৱশ্যে তামিলনাডু চৰকাৰে প্ৰয়োজনীয় সহযোগিতা আগবঢ়োৱা নাছিল আৰু প্ৰতিনিধি দলটোক হাতীটোক পৰীক্ষা কৰিবলৈ বিচৰা অনুমতি প্ৰত্যাখ্যান কৰিছিল বুলি এডভোকেট জেনেৰেল দেবজিত শইকীয়াই জানিবলৈ দিয়ে।
শইকীয়াই কয়, “যিহেতু আমি এতিয়ালৈকে তামিলনাডু চৰকাৰৰ পৰা কোনো ইতিবাচক সঁহাৰি পোৱা নাছিলো, সেয়েহে এখন ৰিট আবেদন দাখিল কৰাৰ সিদ্ধান্ত লোৱা হৈছিল আৰু আজি ইয়াৰ শুনানি অনুষ্ঠিত হৈছিল।”
লগতে পঢ়ক: Gautam Adani: ক’ত ৰ’ল আম্বানি? বিশ্বৰ আটাইতকৈ ধনী ব্যক্তিৰ তালিকাত দ্বিতীয় স্থানত গৌতম আদানী
ন্যায়াধীশে কেন্দ্ৰীয় পৰিৱেশ আৰু বন মন্ত্ৰালয় আৰু তামিলনাডুৰ বন সচিব আৰু আৰক্ষী সঞ্চালক প্ৰধানক জাননী জাৰি কৰিছে।
উচ্চ ন্যায়ালয়ে ২৮ ছেপ্টেম্বৰত শুনানিৰ পৰৱৰ্তী দিন নিৰ্ধাৰণ কৰিছে।
