শেহতীয়াকৈ অসম চৰকাৰে গুৱাহাটী উচ্চ ন্যায়ালয়ত ভৱিষ্যতে গছ স্থানান্তৰ কৰাৰ বাবে এক বিস্তৃত কৰ্মসূচী প্ৰস্তুত কৰা হ’ব বুলি প্ৰতিশ্ৰুতি দিয়াৰ পাছতে এখন ৰাজহুৱা স্বাৰ্থজড়িত আবেদন বন্ধ কৰা হয়।
ওঠৰ ছেপ্টেম্বৰ, বৃহস্পতিবাৰে জনস্বাৰ্থ জড়িত আবেদনৰ শুনানিৰ সময়ত অসম চৰকাৰে এই আশ্বাস প্ৰদান কৰে। এই প্ৰতিশ্ৰুতি প্ৰদানৰ পাছতে গুৱাহাটী উচ্চ ন্যায়ালয়ে মহানগৰৰ গোপীনাথ বৰদলৈ পথত নিৰ্মীয়মান উৰণ সেতুৰ বাবে গছৰ সফল স্থানান্তৰ কৰাৰ উদাহৰণ দি গোচৰটো বন্ধ কৰি দিয়ে।
জ্যেষ্ঠ সাংবাদিক মহেশ ডেকা আৰু মানৱাধিকাৰ কৰ্মী জয়ন্ত গগৈয়ে দাখিল কৰা জনস্বাৰ্থ জড়িত আবেদনখন মুখ্য ন্যায়াধীশ আশুতোষ কুমাৰ আৰু ন্যায়াধীশ অৰুণ দেৱ চৌধুৰীৰ খণ্ড বিচাৰপীঠৰ সন্মুখত দাখিল কৰা হয়। আবেদনকাৰীদ্বয়ৰ হৈ জ্যেষ্ঠ অধিবক্তা কমল নয়ন চৌধুৰীয়ে আদালতৰ সন্মুখত নুনমাটিৰ পৰা দীঘলীপুখুৰী অঞ্চললৈ উৰণ সেতু নিৰ্মাণৰ ফলত বৃহৎ সংখ্যক গছৰ প্ৰতি থকা ভাবুকিৰ বিষয়ে আলোকপাত কৰে।
ইয়াৰ উত্তৰত অসম চৰকাৰৰ মহাধিবক্তা দেৱজিৎ শইকীয়াই ন্যায়ালয়ক জনাই যে চৰকাৰে বিষয়টো গুৰুত্বসহকাৰে লৈছে আৰু গছ কটা কম কৰিবলৈ উৰণ সেতুখনৰ আৰ্হি সলনি কৰা হৈছে।
চৰকাৰে প্ৰথম অৱস্থাত উৰণ সেতু নিৰ্মাণৰ বাবে লোৱা পৰিকল্পনাৰ ফলত বহু গছত প্ৰভাৱ পৰিলেহেঁতেন যদিও পাছত উৰণ সেতুৰ নতুন আৰ্হি অনুসৰি ৭৭জোপা গছহে স্থানান্তৰ কৰা হৈছিল। ইয়াৰে ৭৬জোপা গছ নতুন স্থানলৈ স্থানান্তৰ কৰা হৈছে বুলি আদালতক মহাধিবক্তাই অৱগত কৰে।
মহাধিবক্তা দেৱজিৎ শইকীয়াৰ মতে, এই স্থানান্তৰিত গছবোৰ বৰ্তমান কেৱল জীয়াই থকাই নহয়, বৰঞ্চ গছবোৰত নতুন কুঁহিপাতেও প্ৰাণ পাই উঠিছে, যিয়ে গছসমূহৰ সফল স্থানান্তৰক সূচাইছে। শইকীয়াই কয় যে, এই সফলতা গছৰ স্থানান্তৰৰ বিষয়ে বিশেষজ্ঞ সংস্থাৰ সৈতে চৰকাৰে কৰা আলোচনাৰ ফচল।
তদুপৰি অসম চৰকাৰে উচ্চ ন্যায়ালয়ক আশ্বাস দিয়ে যে, ভৱিষ্যতে গছ স্থানান্তৰৰ প্ৰকল্প হাতত লোৱাৰ বাবে এক বিস্তৃত নিয়মাৱলী প্ৰস্তুত কৰা হৈছে।
এই কৰ্মসূচীয়ে- স্থানান্তৰ প্ৰক্ৰিয়া, উপযুক্ত নতুন স্থান চিনাক্তকৰণ, গছৰ সুস্থিৰ অৱস্থা নিশ্চিত কৰিবলৈ ফলপ্ৰসূ ব্যৱস্থা আৰু অন্যান্য প্ৰয়োজনীয় কৰণীয় দিশসমূহৰ বিষয়ে আলোকপাত কৰিব ।
বৰ্তমানৰ এই পৰিস্থিতিৰ প্ৰতি লক্ষ্য ৰাখি গুৱাহাটী উচ্চ ন্যায়ালয়ে শুনানি চলি থকা ৰাজহুৱা স্বাৰ্থজড়িত আবেদনখনৰ কাম অব্যাহত ৰখাটো অপ্ৰয়োজনীয় বুলি বিবেচনা কৰি গোচৰটো বন্ধ কৰি দিয়ে।
কিন্তু বিচাৰপীঠে আবেদনকাৰীসকলক নতুন বিস্তৃত নিয়মাৱলী মানি নচলাকৈ ভৱিষ্যতে কোনো ধৰণৰ গছ স্থানান্তৰ কৰা হ’লে পুনৰ ন্যায়ালয়ৰ দ্বাৰস্থ হ’বলৈ স্বতন্ত্ৰতা প্ৰদান কৰে।
