হাজাৰ হাজাৰ জনতাক সাক্ষী কৰি যোৱা ১৫ ডিচেম্বৰত বিটিচিৰ নতুন মুখ্য কাৰ্যবাহী হিচাপে প্ৰমোদ বড়োৱে শপত লৈছিল। আৰু এতিয়া মাত্ৰ ১০ দিনৰ ভিতৰতেই অনিশ্চিয়তাৰ ফালে গতি কৰিছে প্ৰমোদ বড়ো নেতৃত্বাধীন বিটিচি।
কিয়নো এইবাৰ আস্থাৰ ভোটতহে সংখ্যগৰিষ্ঠতা প্ৰদৰ্শন কৰি মুখ্য কাৰ্যবাহী সদস্য নিৰ্বাচিত কৰিবলৈ মঙলবাৰে গুৱাহাটী উচ্চ ন্যায়ালয়ে নিৰ্দেশ দিছে।
অৰ্থাৎ অহা ২৬ ডিচেম্বৰৰ ভিতৰত ফ্ল’ৰ টেষ্টৰ জৰিয়তে মুখ্য কাৰ্যবাহী সদস্য নিৰ্বাচিত কৰিব লাগিব বুলি স্পষ্টভাৱে নিৰ্দেশ দিছে উচ্চ ন্যায়ালয়ে।
বি পি এফ প্ৰধান হাগ্রামা মহিলাৰীৰ লগতে দলৰ আন পাঁচজন সদস্যৰ এখন লেখ আৱেদনৰ ভিত্তিত গুৱাহাটী উচ্চ ন্যায়ালয়ৰ ন্যায়াধীশ সুমন শ্যামৰ আদালতে মঙলবাৰে এই নির্দেশ দিয়ে৷
উল্লেখ্য যে নিয়ম উলংঘন কৰি প্রমোদ বড়োৰ নেতৃত্বত বিটিচি গঠন হোৱাৰ অভিযোগ আনি লেখ আৱেদনৰ জৰিয়তে ন্যায়ালয়ৰ দ্বাৰস্থ হৈছিল হাগ্রামা মহিলাৰী আৰু বি পি এফৰ অন্য নির্বাচিত সদস্য৷
ন্যায়ালয়ৰ নিৰ্দেশত কোৱা হয় যে ফ্ল’ৰ টেষ্টৰ সময়ত মুখ্য কাৰ্যবাহী সদস্য পদৰ বাবে কেৱল প্ৰমোদ বড়োই নহয় আন দলৰ নিৰ্বাচিত সদস্যইও প্ৰতিদ্বন্দ্বিতা আগবঢ়াব পাৰিব। আৰু যিজন সদস্যই আস্থা ভোটত সৰ্বাধিক ভোট লাভ কৰিব তেঁৱেই হ’ব পৰৱৰ্তী মুখ্য কাৰ্যবাহী সদস্য।
ইফালে ন্যায়ালয়ে দিয়া নির্দেশ অনুসৰি ফ্ল’ৰ টেষ্টত সকলো নির্বাচিত সদস্যই অংশগ্রহণ কৰিব লাগিব যদিও ৰাজ্যপালে মনোনীত কৰা সদস্যই অংশগ্রহণ কৰিব নোৱাৰিব৷
উল্লেখ্য যে বিটিচিৰ নিৰ্বাচনত ১৭ খন আসন দখল কৰি একক সংখ্যাগৰিষ্ঠ দল হোৱাৰ পিছতো বি পি এফে চৰকাৰ গঠন কৰাৰ কোনো সুযোগ নাপালে।
কিয়নো ফলাফল ঘোষণা হোৱাৰ নিশাই প্ৰমোদ বড়োৰ য়ু পি পি এল, বিজেপি আৰু গণ সুৰক্ষা পাৰ্টিৰ মাজত মিত্ৰতা গঢ় লৈ উঠে আৰু ৰাজ্যপালক সংখ্যাগৰিষ্ঠতাৰ প্ৰমাণ দি চৰকাৰ গঠন কৰিছিল।
এই কথাত একপ্ৰকাৰ ক্ষুব্ধ হৈ পৰিছিল বিগত ১৭ বছৰে বিটিচিৰ বাঘজৰী দখল কৰি থকা বি পি এফ প্ৰধান হাগ্ৰামা মহিলাৰী। আৰু ইয়াৰ পিছতে তেওঁ আৰু তেওঁৰ আন সহযোগীসকল দ্বাৰস্থ হৈছিল ন্যায়ালয়ৰ।
প্ৰমোদ বড়োৱে চৰকাৰ গঠনৰ পিছতো হাগ্ৰামাই বিটিচিৰ চিফ হ’ব বুলি সংবাদ মাধ্যমৰ আগত দাবী কৰি আহিছিল আৰু এতিয়া ন্যায়ালয়ে সেই সুযোগ দিয়াত ৰাজনৈতিক মহলত ব্যাপক চৰ্চা লাভ কৰিছে এতিয়া এই সমগ্ৰ বিষয়টোৱে।