দশকটোৰ ভিতৰত ভয়াবহ বানত ককবকাই খকা ৰাজ্যবাসীক সহায়ৰ বাবে মুখ্য মন্ত্ৰী সৰ্বানন্দ সোণোৱালে জনোৱা আহ্বানৰ প্ৰতি সহাৰি জনাই আজি গুৱাহাটী বিশ্ববিদ্যালয় কৰ্তৃপক্ষই মুখ্য মন্ত্ৰীৰ বান সাহায্য পুঁজিলৈ ২৫ লাখ টকাৰ বৰঙণি আগবঢ়াইছে।
গুৱাহাটী বিশ্ববিদ্যালয়ৰ উপাচাৰ্য্য ড০ মৃদুল হাজৰিকাৰ নেতৃত্বত অহা বিশ্ববিদ্যালয়ৰ প্ৰতিনিধি দলটোৱে মুখ্য মন্ত্ৰীৰ কাৰ্য্যালয়ত মুখ্য মন্ত্ৰীগৰাকীক সাক্ষাৎ কৰি ২৫ লাখ টকাৰ এখন চেক প্ৰদান কৰে।
উল্লেখযোগ্য যে, চলিত বৰ্ষত অসমত বানপানীয়ে ভয়াবহ ৰূপ ধাৰণ কৰিছে। বানপানীৰ ফলত অসমৰ ৩০ খন জিলাৰ প্ৰায় ৩৫ লাখতকৈও অধিক লোক ক্ষতিগ্ৰস্ত হোৱাৰ উপৰিও বহুকেইগৰাকী লোকে প্ৰাণ হেৰুৱাবলগীয়া হৈছে।
আনহাতে, অসমৰ মুখ্য মন্ত্ৰী সৰ্বানন্দ সোণোৱালে বানাক্ৰান্ত জনতাক সহায় কৰাৰ বাবে জনসাধাৰণৰ পৰা মুখ্য মন্ত্ৰী সাহায্য পুঁজিলৈ বৰঙণি বিচাৰি আহ্বান জনাইছিল আৰু ৰাজ্যৰ লগতে দেশৰ বিভিন্ন ব্যক্তিয়ে মুখ্য মন্ত্ৰীৰ আহ্বানৰ প্ৰতি সহাৰি দি বান সাহায্য পুঁজিলৈ বৰঙণি আগবঢ়াইছে।
বলীউদৰ অভিনেতা অক্ষয় কুমাৰ, অমিতাভ বচ্চনৰ উপৰিও অসমীয়া চলচ্চিত্ৰ জগতৰ অভিনেতা, পৰিচালক যতীন বৰা, ৰীমা দাস আদিয়ে মুখ্য মন্ত্ৰী বান সাহায্য পুঁজিলৈ বৰঙণি আগবঢ়াইছে।
বিভিন্ন ক্ষেত্ৰৰ ব্যক্তিসকলৰ উপৰিও বটদ্ৰৱা থান পৰিচালনা সমিতি, অসম সচিবালয়ৰ কৰ্মচাৰী সন্থা আদিয়ে অনুষ্ঠানে অসমৰ জনসাধাৰণলৈ সহায়ৰ হাত আগবঢ়াইছে।
