আদানী গ্ৰুপৰ স্বত্বাধিকাৰী গৌতম আদানীয়ে ৰিলায়েন্সৰ অধ্যক্ষ মুকেশ আম্বানীক অতিক্ৰম কৰি ভাৰতৰ সৰ্বাধিক ধনী ব্যক্তি হিচাপে পৰিগণিত হৈছে।সেইদৰে, আদানী এতিয়া এছিয়াৰ ভিতৰতো আটাইতকৈ ধনী ব্যক্তি হিচাপে পৰিগণিত হৈছে। ব্লুমবাৰ্গ বিলিয়নাৰ সূচকাংক অনুসৰি বৃহস্পতিবাৰে গৌতম আদানীৰ সম্পত্তি ৩.৫৬ বিলিয়ন ডলাৰ বৃদ্ধি পাইছে। ফলত তেওঁৰ ‘নেট ৱৰ্থ’ বা মুঠ সম্পত্তিৰ মূল্য ৯২.৬ বিলিয়ন ডলাৰ হ’ল। আনহাতে, মুকেশ আম্বানীৰ মুঠ সম্পদ ৯০.৮ বিলিয়ন ডলাৰলৈ হ্ৰাস পাইছে।
বিশ্বৰ ধনী লোকৰ তালিকাত এতিয়া আদানীয়ে ১৯ নম্বৰ স্থান লাভ কৰিছে। মুকেশ আম্বানীয়ে বিশ্বৰ তালিকাত ২০ নম্বৰ স্থানলৈ নামিছে। মন কৰিবলগীয়া যে আদানী আৰু আম্বানীৰ মুঠ সম্পত্তিৰ এক বৃহৎ অংশ তেওঁলোকৰ কোম্পানীৰ শ্বেয়াৰৰ মূল্যৰ ওপৰত নিৰ্ভৰশীল।
বৃহস্পতিবাৰে (১৬ এপ্ৰিল) আদানী গ্ৰুপৰ শ্বেয়াৰৰ মূল্য যথেষ্ট বৃদ্ধি পায়। ইয়াৰ ফলত আদানীৰ নেট ৱৰ্থত প্ৰভাৱ পৰিছে। কালি আদানী প’ৰ্টছৰ শ্বেয়াৰৰ মূল্য ২.২ শতাংশ, আদানী গ্ৰীণ ২.৪৪ শতাংশ, আদানী এণ্টাৰপ্ৰাইজেছৰ ৩.০৬ শতাংশ, আদানী এনাৰ্জীৰ ৪.৮৬ শতাংশ, আদানী পাৱাৰৰ ৫.৮৪ শতাংশ বৃদ্ধি পায়।
আনহাতে, কালি আম্বানীৰ কোম্পানী ৰিলায়েন্স ইণ্ডাষ্ট্ৰীজৰ শ্বেয়াৰৰ মূল্য ০.১৩ শতাংশ বৃদ্ধি পাইছে। এই পৰিস্থিতিত বৃহস্পতিবাৰে আম্বানীৰ মুঠ সম্পত্তি মাত্ৰ ৭৬.৭ মিলিয়ন ডলাৰহে বৃদ্ধি পাইছে।
ইপিনে, ব্লুমবাৰ্গ বিলিয়নাৰ সূচকাংকৰ শীৰ্ষ ১০ কোটিপতিৰ তালিকাত প্ৰথম ৬ জন লোকৰ সম্পত্তি ২০০ বিলিয়ন ডলাৰতকৈ অধিক। এই ক্লাবৰ শীৰ্ষত আছে ইলন মাস্ক। তেওঁৰ পিছত লেৰী পেজ, জেফ বেজোছ, চাৰ্জী ব্ৰিন, মাৰ্ক জুকাৰবাৰ্গ আৰু লেৰী এলিছন।
ইলন মাস্কৰ সম্পত্তিৰ পৰিমান ৬৫৬ বিলিয়ন ডলাৰ, লেৰী পেজৰ ২৮৬ বিলিয়ন ডলাৰ, জেফ বেজোছৰ ২৬৯ বিলিয়ন ডলাৰ, চাৰ্জী ব্ৰিনৰ ২৬৬ বিলিয়ন ডলাৰ, মাৰ্ক জুকাৰবাৰ্গৰ ২৩৯ বিলিয়ন ডলাৰ আৰু লেৰী এলিছনৰ সম্পত্তি ২৩০ বিলিয়ন ডলাৰ।
ইপিনে, শীৰ্ষ ১০ কোটিপতিৰ ভিতৰত সপ্তম স্থানত আছে মাইকেল ডেল। তেওঁৰ সম্পত্তি এতিয়া ১৭০ বিলিয়ন ডলাৰ হৈছেগৈ। জিনচেং হুয়াঙৰ সম্পত্তি ১৬৪ বিলিয়ন ডলাৰ, বাৰ্নাৰ্ড আৰ্নল্টৰ সম্পত্তি ১৬৪ বিলিয়ন ডলাৰ আৰু জিম ৱাল্টনৰ সম্পত্তি ১৫০ বিলিয়ন ডলাৰ।
