টীম ইণ্ডিয়াৰ হৈ দুৰ্দান্ত প্ৰদৰ্শন আগবঢ়াই বহু মেচত ভাৰতক বিজয় আনি দিয়া গৌতম গম্ভীৰ ৰাজনৈতিক ক্ষেত্ৰখনতো সফলতা লাভ কৰিছে। বৰ্তমান গম্ভীৰ বিজেপিৰ সাংসদ।
ক্ৰিকেট-ৰাজনীতিৰ লগতে গম্ভীৰে সমাজ সেৱামূলক কামতো মনোনিৱেশ কৰি আহিছে।
দৰিদ্ৰ লোকসকলক সহায় কৰিবৰ বাবে গৌতম গম্ভীৰে এইবাৰ খুলিলে এখন কেন্টিন। নিজৰ সংসদীয় সমষ্টি পূব দিল্লীৰ দৰিদ্ৰ জনসাধাৰণক সহায়ৰ বাবে সস্তাতে খাদ্যৰ ব্যৱস্থা কৰিছে।
গম্ভীৰে আৰম্ভ কৰা ‘এক আশা জন ৰস’ই’ কেন্টিনত ১টকাতে পোৱা যায় পেটভৰাই খোৱাৰ। বৃহস্পতিবাৰে দিল্লীৰ গান্ধীনগৰৰ কৈলাস কল’নি বাছষ্টেণ্ডত প্ৰথম কেন্টিনখন আৰম্ভ কৰে।
প্ৰতিদিনে দুপৰীয়া চাৰে এঘাৰৰ বজাৰ পৰা বিয়লি তিনি বজালৈকে খোলা থাকিব কেন্টিনখন। গম্ভীৰে ইয়াৰ পাছত অশোক নগৰতো আৰু এখন কেন্টিন খুলিব। অহা গণতন্ত্ৰ দিৱসত সেইখন মুকলি কৰা হ’ব।
গম্ভীৰে মুঠতে পবহ দিল্লীৰ ১০টা বিধানসভা সমষ্টিত এখনকৈ ‘জন ৰস’ই’ কেন্টিন খোলাৰ পৰিকল্পনা কৰিছে।
তেওঁৰ এই গোটেই প্ৰকল্পটো গৌতম গম্ভীৰ ফাউণ্ডেশ্যন তথা সংসদৰ ব্যক্তিগত আৰ্থিক অনুদানেৰে চলিব আৰু ইয়াৰ বাবে কোনো চৰকাৰী অনুদান লোৱা নহয়।
গান্ধীনগৰৰ ‘জন ৰস’ই’ কেন্টিনত সকলো আধুনিক পৰিসেৱা উপলব্ধ। মাত্ৰ ১টকাৰ মেনুত থাকিব ভাত, তৰকাৰী আৰু মচুৰ দাইল। বৃহৎ সংখ্যক লোক ইয়াৰ দ্বাৰা উপকৃত হ’ব।
কেন্টিনখনত একেলগে ১০০ জন লোকে বহি খাব পাৰে যদিও কৰ’নাৰ বাবে বৰ্তমান ৫০জন লোকে একেলগে বহি খাব পাৰিব।
গম্ভীৰৰ এনে প্ৰচেষ্টাৰ সকলোৱে একেমুখে শলাগ লৈছে।