প্ৰত্যাহ্বানৰ সন্মুখীন হৈছে ৰাষ্ট্ৰপতি ডোনাল্ড ট্ৰাম্পৰ মধ্যস্থতাত স্বাক্ষৰীত ২০ দফীয়া গাজা শান্তি চুক্তি। চুক্তিৰ এটা মূল চৰ্ত অনুসৰি হামাছে নিজৰ অস্ত্ৰ-শস্ত্ৰ আত্মসমৰ্পণ কৰিব লাগিব, কিন্তু হামাছৰ ৰাজনৈতিক ব্যুৰোৰ সদস্য মহম্মদ নাজালে স্পষ্ট কৰি দিছে যে গোটটোৱে এই বিষয়ত কোনো নিশ্চয়তা দিব নোৱাৰে। এই অসামঞ্জস্যতাই গাজা-ইজৰাইল যুদ্ধবিৰতি পুনৰ বিফল হ’ব নেকি সেইলৈ প্ৰশ্ন উত্থাপন হৈছে।
উল্লেখ্য যে গাজা আৰু ইজৰাইলৰ দীর্ঘস্থায়ী সংঘাতৰ অন্ত আনিবলৈ ৰাষ্ট্ৰপতি ট্ৰাম্পে এই ২০ দফীয়া শান্তি চুক্তি প্ৰস্তাৱ কৰিছিল। চুক্তিৰ ফলত যুদ্ধবিৰতি আৰম্ভ হৈছে আৰু প্ৰথম পৰ্যায়ত কয়দীৰ আদান-প্ৰদানৰ কাম চলি আছে। কিন্তু চুক্তি সম্পূৰ্ণ কৰিবলৈ হামাছে কিছুমান চৰ্ত মানিবলৈ অনিচ্ছুক, ইয়াৰ ভিতৰত অস্ত্ৰ সম্বৰণৰ বিষয়টোও উত্থাপিত হৈছে। হামাছৰ জ্যেষ্ঠ বিষয়াই ৰয়টাৰ্ছক জনোৱা মতে, গোটটোৱে গাজাত সাময়িক নিৰাপত্তা নিয়ন্ত্ৰণ বজাই ৰখাৰ মনস্থ কৰিছে, কিন্তু অস্ত্ৰ প্ৰত্যাহাৰৰ নিশ্চয়তা দিব পাৰে নে নাই সেই লৈ একো তথ্য প্ৰকাশ কৰা নাই।
মহম্মদ নাজালে কয় যে হামাছে বিধ্বস্ত গাজা পুনৰ নিৰ্মাণৰ বাবে পাঁচ বছৰৰ যুদ্ধবিৰতিৰ বাবে সাজু হৈছে। ইয়াৰ পিছত কি হ’ব সেই বিষয়ে পেলেষ্টাইনীসকলক নিৰ্ভৰযোগ্য আশ্বাস দিব লাগিব। ৰাষ্ট্ৰপতিৰ প্ৰতিশ্ৰুতি আৰু ভৱিষ্যতৰ দিশনিৰ্দেশনাৰ ওপৰত নিৰ্ভৰ কৰি থকা পেলেষ্টাইনীসকলৰ বাবে চুক্তিৰ মূল চৰ্তসমূহৰ নিশ্চয়তা অপৰিহাৰ্য। কিন্তু নাজালে স্পষ্ট কৰি কয় যে অস্ত্ৰ-শস্ত্ৰ সম্বৰণৰ চৰ্তত হামাছে সন্মতি দিব নোৱাৰে। তেওঁ পুনৰ কয়, “এই অস্ত্ৰ সম্বৰণৰ অৰ্থ কি? অস্ত্ৰসমূহ কাৰ হাতত গতাই দিয়া হ’ব?” তেওঁ লগতে উল্লেখ কৰে যে এই বিষয়ে কেৱল হামাছ নহয়, অন্যান্য সশস্ত্ৰ পেলেষ্টাইনী গোটসমূহ আৰু সামগ্ৰিক পেলেষ্টাইনী সমাজৰ সিদ্ধান্ত গুৰুত্বপূৰ্ণ।
ইফালে নাজালৰ মন্তব্যৰ প্ৰত্যুত্তৰত ইজৰাইলৰ প্ৰধানমন্ত্ৰীৰ কাৰ্যালয়ে কঠোৰ ভাষাত প্ৰতিক্ৰিয়া জানাই কয় যে, “ইজৰাইল যুদ্ধবিৰতি চুক্তিৰ প্ৰতি দায়বদ্ধ আৰু সকলো চৰ্ত মানি চলিব। হামাছে প্ৰথম পৰ্যায়ত সকলো পণবন্দী মুকলি কৰাৰ কথা আছিল, কিন্তু তেওঁলোকে তেনেকৈ কৰা নাই। আমাৰ পণবন্দীসকলৰ মৃতদেহৰ অৱস্থান হামাছে জানে। চুক্তিৰ অধীনত অস্ত্ৰ সম্বৰণৰ কোনো অজুহাত নাই। হামাছে চুক্তি মানি চলিব লাগিব, তেওঁলোকৰ সময় শেষ হৈ গৈছে।”
ট্ৰাম্পৰ চুক্তিয়ে হামাছক অস্ত্ৰ সম্বৰণ কৰি গাজাৰ নিয়ন্ত্ৰণ গতাই দিবলৈ হেঁচাছ প্ৰয়গ কৰি আহিছে। নহ’লে সংঘাত পুনৰ জ্বলন্ত হ’ব পাৰে বুলি সকীয়াই দিয়ে। মঙলবাৰে ট্ৰাম্পে কয় যে তেওঁ হামাছক স্পষ্ট কৰি দিছে যে অস্ত্ৰ আত্মসমৰ্পণ নকৰিলে কঠোৰ চাপৰ সন্মুখীন হ’ব লাগিব।
নাজালে পণবন্দী মৃতদেহৰ সন্দৰ্ভতস্পষ্টভাৱে কয় যে ২০২৩ চনৰ ৭ অক্টোবৰৰ আক্ৰমণত নিহত ২৮টা পণবন্দীৰ মাজত কমেও ৯টা মৃতদেহ হামাছে ইজৰাইলক গতাই দিছে। বাকী মৃতদেহ উদ্ধাৰত কাৰিকৰী অসুবিধাৰ সন্মুখীন হৈছে গোটটো।
এই অস্ত্ৰ সম্বৰণৰ বিতৰ্কই গাজাৰ যুদ্ধবিৰতিক বৃহৎ প্ৰভাৱ পেলাব পাৰে। হামাছৰ অসামঞ্জস্যতাই ইজৰাইলক কঠোৰ অৱস্থান গ্ৰহণ কৰিবলৈ প্ৰেৰণা দিছে, যাৰ ফলত চুক্তিৰ প্ৰথম পৰ্যায়তে বিপন্ন হৈ পৰিছে। আন্তঃৰাষ্ট্ৰীয় মধ্যস্থতাকাৰীসকলে এতিয়া এই সংকট সমাধানৰ বাবে তৎপৰতা দেখুৱাইছে যদিও হামাছৰ চূড়ান্ত সিদ্ধান্তৰ অপেক্ষাত সকলোৰে দৃষ্টি নিবদ্ধ হৈ পৰিছে। যদি অস্ত্ৰ সম্বৰণৰ চৰ্ত মানি নলয়, তেন্তে গাজাত পুনৰ যুদ্ধৰ সূত্ৰপাত হোৱাৰ আশংকাই গা কৰি উঠিছে।
