গিৰিজানন্দ চৌধুৰী বিশ্ববিদ্যালয়ে ৰাছিয়াৰ পুষ্কিন ষ্টেট ৰাছিয়ান লেংগুৱেজ ইনষ্টিটিউটৰ সহযোগত ২০২৪ চনৰ ৬ ডিচেম্বৰৰ পৰা ১৪ ডিচেম্বৰলৈ ৰাছিয়ান ভাষা আৰু সংস্কৃতিৰ দিৱস সফলতাৰে আয়োজন কৰে।
গিৰিজানন্দ চৌধুৰী বিশ্ববিদ্যালয় আৰু পুস্কিন ইনষ্টিটিউটৰ মাজত হোৱা বুজাবুজিৰ চুক্তিৰ অধীনত অনুষ্ঠিত এই ১০ দিনীয়া অনুষ্ঠানত মাষ্টাৰ ক্লাছ, কৰ্মশালা, কুইজ আৰু সাংস্কৃতিক বিনিময় কাৰ্যসূচীৰ জৰিয়তে ৰাছিয়ান ভাষা আৰু সংস্কৃতিৰ সমৃদ্ধি উদযাপন কৰা হয়।
পুষ্কিন ইনষ্টিটিউট অৱ ৰাছিয়ান লেংগুৱেজৰ পৰা “বিশ্বত ৰাছিয়ান ভাষাৰ ৰাষ্ট্ৰদূত” আন্না লিষ্টোভা আৰু পলিনা ড’ৰ’জকিনাৰে গঠিত এটা প্ৰতিনিধি দলে আন্তঃৰাষ্ট্ৰীয় কাৰ্যসূচীৰ শৈক্ষিক আৰু প্ৰচাৰ অভিযানটো মত বিনিময়ৰ মাজেৰে সম্পন্ন কৰে। অংশগ্ৰহণকাৰীসকলক উচ্চাৰণকে ধৰি ৰাছিয়ান ভাষাৰ মূল বিষয় সমূহৰ বিষয়ে আলোচনা কৰে।
ৰাছিয়ান পৰম্পৰা, লোককথা আৰু সাহিত্যৰ সম্পৰ্কে তেওঁলোকে আলোকপাত কৰে। আনহাতে প্ৰতিযোগিতামূলক অনুষ্ঠান যেনে ৰাছিয়ান ভাষা অলিম্পিয়াড আৰু ৰাছিয়ান ইতিহাস, সংস্কৃতি আৰু ভূগোলৰ সম্পৰ্কে অনুষ্ঠিত কুইজে এক অনন্য মাত্ৰা প্ৰদান কৰে।
বিশ্ববিদ্যালয়ৰ চৌহদত অনুষ্ঠিত হোৱা কাৰ্যসূচীৰ উপৰিও কেন্দ্ৰীয় বিদ্যালয়, আই আই টি গুৱাহাটী, শ্ৰীমন্ত শংকৰ একাডেমী জ্যেষ্ঠ মাধ্যমিক বিদ্যালয় আৰু সোণাপুৰ মহাবিদ্যালয়কে ধৰি অন্যান্য শিক্ষানুষ্ঠানসমূহলৈও এই কাৰ্যসূচী সম্প্ৰসাৰিত হয়।
ছাত্ৰ-ছাত্ৰী, পণ্ডিত আৰু শিক্ষাবিদসকলে এই অনুষ্ঠানসমূহত সক্ৰিয়ভাৱে অংশগ্ৰহণ কৰি ৰাছিয়ান ভাষা আৰু সংস্কৃতিৰ প্ৰতি আগ্ৰহ প্ৰকাশ কৰে।
প্ৰতিনিধি দলটোৱে সাংস্কৃতিক বিনিময় কাৰ্যসূচীতো অংশগ্ৰহণ কৰে। ৮ ডিচেম্বৰত গিৰিজানন্দ চৌধুৰী বিশ্ববিদ্যালয়ত অনুষ্ঠিত তৃতীয় দক্ষিণ এছিয়ান সাংস্কৃতিক সংগমত তেওঁলোকে অংশগ্ৰহণ কৰে। লগতে, পবিতৰা বন্যপ্ৰাণী অভয়াৰণ্য, শ্ৰীমন্ত শংকৰদেৱ কলাক্ষেত্ৰ, বশিষ্ঠ আশ্ৰমৰ লগতে শিলচৰৰ কেইবাটাও স্থান দলটোৱে ভ্ৰমণ কৰে।
এই অভিজ্ঞতাসমূহে দৰ্শনাৰ্থীসকলক উত্তৰ-পূব ভাৰতৰ চহকী সাংস্কৃতিক আৰু প্ৰাকৃতিক ঐতিহ্য বুজি পোৱাত সহায় কৰাৰ লগতে ভাৰতীয় আৰু ৰাছিয়ান মানুহৰ মাজৰ বন্ধন আৰু অধিক শক্তিশালী কৰাত সহায় কৰে।
