পাকিস্তানৰ সংবাদ মাধ্যম নিয়ন্ত্ৰক কৰ্তৃপক্ষই (পেমৰা) দেশখনৰ অন্যতম জনপ্ৰিয় উৰ্দু নিউজ চেনেল জিঅ‘ নিউজৰ সম্প্ৰচাৰ ১৫ দিনৰ বাবে স্থগিত ৰাখিছে। মহৰমৰ সময়ত সম্প্ৰচাৰিত এটা বিশেষ কাৰ্যসূচীত ধৰ্মীয় অনুভূতিত আঘাত হনাৰ অভিযোগত এই কঠোৰ সিদ্ধান্ত গ্ৰহণ কৰা হৈছে। কৰ্তৃপক্ষৰ মতে, এনে কাৰ্যসূচীয়ে ধৰ্মীয় সম্প্ৰীতি নষ্ট কৰাৰ লগতে দেশৰ শান্তি-শৃংখলাতো ব্যাঘাত জন্মাব পাৰে।
যোৱা শনিবাৰে পেমৰাই এই নিলম্বনৰ কথা আনুষ্ঠানিকভাৱে ঘোষণা কৰে। জানিব পৰা মতে, যোৱা ২৬ জুনত মহৰম উপলক্ষে জিঅ‘ নিউজত ‘চফৰ-ই-ইস্ক‘ নামৰ এটা কাৰ্যসূচী সম্প্ৰচাৰিত হৈছিল। ইছলামিক বৰ্ষপঞ্জীৰ প্ৰথম আৰু পবিত্ৰ মাহ মহৰমৰ এই অনুষ্ঠানটিত এনে কিছুমান দৃশ্য দেখুওৱা হৈছিল যিয়ে পাকিস্তানৰ ধৰ্মীয় আৰু সামাজিক স্পৰ্শকাতৰতাক সন্মান জনোৱাত ব্যৰ্থ হৈছিল বুলি ৰয়টাৰ্ছৰ এক প্ৰতিবেদনত প্ৰকাশ পাইছে।
কৰাচীস্থিত জিঅ‘ নিউজ হৈছে পাকিস্তানৰ আটাইতকৈ বেছি দৰ্শকে চোৱা উৰ্দু চেনেলসমূহৰ ভিতৰত অন্যতম। ইয়াত ১৫০০ তকৈ অধিক কৰ্মচাৰীয়ে কাম কৰে। পেমৰাৰ এই নিৰ্দেশৰ পিছতে দেওবাৰে চেনেলটোৱে ৰাজহুৱাভাৱে ক্ষমা বিচাৰে আৰু সকলো ডিজিটেল প্লেটফৰ্মৰ পৰা উক্ত কাৰ্যসূচী আঁতৰাই পেলায়। তেওঁলোকে ইয়াক এক ‘সম্পাদকীয় ভুল‘ বুলি স্বীকাৰ কৰিছে আৰু এই সমগ্ৰ বিষয়টোৰ বাবে দুখ প্ৰকাশ কৰিছে। ইয়াৰ উপৰিও পেমৰাই চেনেলটোক এই ভুলৰ বাবে এক আভ্যন্তৰীণ তদন্ত কৰিবলৈ নিৰ্দেশ দিছে।
জিঅ‘ নিউজে জনোৱা মতে, সেই তথ্যচিত্ৰখনত ইৰাক আৰু মধ্যপ্ৰাচ্যৰ আন কিছুমান দেশত একাংশ চিয়া মুছলমান লোকে পালন কৰা কিছুমান প্ৰথা দেখুওৱা হৈছিল। চেনেলটোৰ মতে, ইয়াৰ উদ্দেশ্য আছিল কেৱল সেই অঞ্চলৰ স্থানীয় পৰম্পৰা প্ৰদৰ্শন কৰা, কোনো বিশেষ ধৰ্মীয় দৃষ্টিকোণক প্ৰচাৰ কৰা নহয়। উল্লেখযোগ্য যে পাকিস্তান এখন চুন্নী সংখ্যাগৰিষ্ঠ দেশ, য‘ত চিয়া মুছলমানৰ সংখ্যা প্ৰায় দহ শতাংশ। ধৰ্মীয় পৰম্পৰাক লৈ দুই সম্প্ৰদায়ৰ মাজত প্ৰায়ে উত্তেজনাৰ সৃষ্টি হয়, সেয়েহে মহৰমৰ সময়ত প্ৰশাসনে কঠোৰ নিৰাপত্তা ব্যৱস্থা গ্ৰহণ কৰে।
এই সাময়িক নিলম্বনৰ ঘটনাটোৱে পাকিস্তানত সংবাদ মাধ্যমৰ স্বাধীনতা সন্দৰ্ভত চলি থকা উদ্বেগক পুনৰ প্ৰকাশ কৰিছে। ৰিপ‘ৰ্টাৰ্ছ উইডাউট বৰ্ডাৰ্ছৰ ২০২৬ চনৰ বিশ্ব সংবাদ মাধ্যমৰ স্বাধীনতা সূচকাংকত পাকিস্তান ১৮০ খন দেশৰ ভিতৰত ১৫৩ তম স্থানত আছে। দেশখনৰ কঠোৰ ধৰ্মনিন্দা আইন আৰু সংবাদ মাধ্যমৰ ওপৰত ক্ৰমবৰ্ধমান চেন্সৰশ্বিপৰ মাজতে জিঅ‘ নিউজৰ দৰে জনপ্ৰিয় চেনেলৰ ওপৰত লোৱা এই পদক্ষেপে সংবাদ মাধ্যমৰ স্বাধীনতাৰ প্ৰতি থকা ভাবুকিক পুনৰবাৰ আঙুলিয়াই দিছে।
