গুৱাহাটীৰ উলুবাৰীৰ হোটেল বিলাস ইনত সংঘটিত পাঁচজনকৈ লোকৰ হত্যাকাণ্ডৰ তদন্তত নতুন মোৰ আহিছে। ঘটনাৰ মূল অভিযুক্ত ঘনকান্ত গগৈৰ পত্নী জোনমণি গগৈয়ে ধেমাজি আৰক্ষীৰ ওচৰত আত্মসমৰ্পণ কৰিছে। ২৬ অক্টোবৰৰ নিশা সংঘটিত ভয়ংকৰ গুলীচালনাৰ ঘটনাৰ পাছৰে পৰা সন্ধানহীন হৈ আছিল জোনমণি। সেই নিশাৰ পৰাই তেওঁৰ কোনো শুংসূত্ৰ লাভ কৰা নাছিল আৰক্ষীয়ে।
ঘটনাৰ পাছত জোনমণিৰ লগতে দম্পতীটোৰ সন্তান আৰু তেওঁলোকক ঘটনাস্থলীৰ পৰা কঢ়িয়াই নিয়াৰ অভিযোগ উঠা বাহনচালকজনৰো সন্ধানত নামিছিল আৰক্ষী। হত্যাকাণ্ডৰ পূৰ্বে আৰু পাছত কি কি ঘটনা ঘটিছিল, সেই বিষয়ে জানিবলৈ জোনমণিক সোধা-পোছা কৰাৰ প্ৰস্তুতিও চলাইছিল তদন্তকাৰী দলে।
ইফালে, মূল অভিযুক্ত ঘনকান্ত গগৈক লতাশিল আৰক্ষী থানাত বিশেষ তদন্তকাৰী দলে (এছআইটি) প্ৰতিদিনে সোধা-পোছা অব্যাহত ৰাখিছে। ২৬ অক্টোবৰৰ নিশা বশিষ্ঠ আৰক্ষীৰ ওচৰত আত্মসমৰ্পণ কৰাৰ পাছত ২৭ অক্টোবৰত তেওঁক সাত দিনৰ বাবে আৰক্ষীৰ জিম্মালৈ প্ৰেৰণ কৰা হৈছিল। আৰক্ষীৰ জিম্মাত থকা গগৈয়ে সোধা-পোছাৰ সময়ত আত্মৰক্ষাৰ বাবেহে গুলীচালনা কৰা বুলি দাবী কৰা বুলি জানিব পৰা গৈছে। অৱশ্যে তেওঁৰ এই দাবীৰ সত্যতা পৰীক্ষা কৰি আছে তদন্তকাৰী দলে।
উল্লেখ্য যে, ২৬ অক্টোবৰত গুৱাহাটীৰ উলুবাৰীৰ হোটেল বিলাস ইনত সংঘটিত হৈছিল এই চাঞ্চল্যকৰ গুলীচালনাৰ ঘটনা। ঘটনাটোত হোটেলখনৰ সহ-মালিক হেলেনা ভৰালী আৰু তেওঁৰ জ্যেষ্ঠ ভাতৃ ভূদেৱ ভৰালীৰ লগতে হেলেনাৰ পুত্ৰ দেবৰ্ষি, বোৱাৰী ৰিণিকা আৰু হোটেলখনৰ কৰ্মচাৰী নাৰায়ণ দাসৰ মৃত্যু হৈছিল। আৰক্ষীৰ সন্দেহ অনুসৰি, হোটেলখনৰ মালিকপক্ষ আৰু ঘনকান্ত গগৈৰ মাজত হোৱা আৰ্থিক বিবাদ তথা লীজকেন্দ্ৰিক সংঘাতেই এই হত্যাকাণ্ডৰ মূল কাৰণ হ’ব পাৰে।
আৰক্ষীৰ তথ্য অনুসৰি, ২০২৫ চনৰ ছেপ্টেম্বৰ মাহত পাঁচ বছৰৰ বাবে হোটেলখন লীজত লৈছিল ঘনকান্ত গগৈয়ে। লীজৰ চৰ্ত আৰু ধন-পইচাৰ লেনদেনক লৈ দুয়োপক্ষৰ মাজত সংঘাতৰ সৃষ্টি হৈছিল বুলি তদন্তকাৰীসকলে সন্দেহ কৰিছে। সেই সংঘাতেই কেনেদৰে পাঁচজন লোকৰ মৃত্যুৰ কাৰণ হৈ পৰিল, সেয়া এতিয়া তদন্তৰ অন্যতম গুৰুত্বপূৰ্ণ দিশ।
আনহাতে, আৰক্ষীৰ জিম্মাত থকা ঘনকান্ত গগৈৰ সুৰক্ষা আৰু ব্যৱহাৰক লৈ বিশেষ নিৰ্দেশনা জাৰি কৰিছে মুখ্য ন্যায়িক দণ্ডাধীশৰ আদালতে। আদালতে নিৰ্দেশ দিছে যে সূৰ্যাস্তৰ পাছত আৰু সূৰ্যোদয়ৰ পূৰ্বে প্ৰমাণ উদ্ধাৰৰ বাবে অভিযুক্তক বাহিৰলৈ নিবলগীয়া হ’লে পৰ্যাপ্তসংখ্যক আৰক্ষীৰ লোক তেওঁৰ সৈতে থাকিব লাগিব। এনে অভিযানৰ সময়ত উপ-আৰক্ষী অধীক্ষক পৰ্যায়ৰ এগৰাকী বিষয়াৰ উপস্থিতিও বাধ্যতামূলক কৰিছে আদালতে।
লগতে, আৰক্ষীৰ জিম্মাত অভিযুক্তক কোনো ধৰণৰ শাৰীৰিক নিৰ্যাতন চলাব নোৱাৰিব বুলি স্পষ্ট নিৰ্দেশ দিছে আদালতে। আৰক্ষীৰ জিম্মাত থকাৰ সময়ছোৱাত প্ৰতি ২৪ ঘণ্টাৰ মূৰে মূৰে তেওঁৰ স্বাস্থ্য পৰীক্ষা কৰাবলৈ তদন্তকাৰী বিষয়াক নিৰ্দেশ দিয়া হৈছে। অভিযুক্তক পৰিষ্কাৰ-পৰিচ্ছন্ন খাদ্য আৰু খোৱাপানী যোগান ধৰাৰ লগতে আৰক্ষীৰ জিম্মাত ৰখাৰ ক্ষেত্ৰত প্ৰচলিত সকলো নিয়ম মানি চলিবলৈও কোৱা হৈছে।
পাঁচজনকৈ লোকৰ প্ৰাণ লোৱা এই হত্যাকাণ্ডৰ আঁৰত প্ৰকৃততে কি সংঘাত আছিল, গুলীচালনাৰ সময়ত ঘনকান্ত গগৈৰ ভূমিকা কি আছিল আৰু তেওঁৰ আত্মৰক্ষাৰ দাবীৰ সত্যতা কিমান—এই সকলো দিশ এতিয়া এছআইটিৰ তদন্তৰ আওতাত। পত্নী জোনমণি গগৈৰ আত্মসমৰ্পণৰ পাছত তদন্তত নতুন তথ্য পোহৰলৈ অহাৰ সম্ভাৱনা আছে। পৰিয়ালৰ আন সদস্য আৰু ঘটনাৰ সৈতে জড়িত বুলি সন্দেহ কৰা বাহনচালকজনৰ সন্ধানতো আৰক্ষীৰ অভিযান অব্যাহত আছে।
