বি পি এল শিক্ষাৰ্থীৰ বাবে জি আই এম টি তেজপুৰৰ বিশেষ সাহায্য

তেজপুৰৰ ডেকাৰগাঁওস্থিত আগশাৰীৰ শিক্ষা প্ৰতিষ্ঠান গিৰিজানন্দ চৌধুৰী ইনষ্টিটিউট অব মেনেজমেণ্ট এণ্ড টেকন’লজী, চমুকৈ জি আই এম টি, তেজপুৰত শিক্ষাগ্ৰহণৰ বাবে দৰিদ্ৰ সীমাৰেখাৰ তলৰ ছাত্ৰ-ছাত্ৰীৰ কাৰণে বিশেষ সাহায্য প্ৰদানৰ কথা ঘোষণা কৰা হৈছে।

মহাবিদ্যলয় কৰ্তৃপক্ষই জনোৱা মতে অভিযান্ত্ৰিক মহাবিদ্যালয়খনৰ চিভিল, মেকানিকেল আৰু ইলেকট্ৰিকেল ইঞ্জিনিয়াৰিঙৰ তিনিওটা বিভাগতে এখনকৈ আসন দৰিদ্ৰ সীমাৰেখাৰ তলৰ ছাত্ৰ-ছাত্ৰীৰ বাবে সংৰক্ষিত ৰখা হ’ব। উক্ত আঁচনিৰ অধীনত ছাত্ৰ-ছাত্ৰীসকলে মুঠ শিক্ষা খৰছৰ ৫০ শতাংশ ৰেহাইত শিক্ষাগ্ৰহণ কৰিব পাৰিব।

ঠিক একেদৰে, NCC C চাৰ্টিফিকেট প্ৰাপ্ত শিক্ষাৰ্থী তথা ক্ৰীড়া ক্ষেত্ৰত ৰাজ্যিক ভিত্তিত প্ৰতিনিধিত্ব কৰা ছাত্ৰ-ছাত্ৰীৰ বাবেও তিনিওটা বিভাগতে এখনকৈ আসনত শিক্ষা খৰছৰ ৫০% ৰেহাই প্ৰদান কৰা হ’ব বুলি মহাবিদ্যালয় কৰ্তৃপক্ষৰ তৰফৰ পৰা জনোৱা হৈছে।

উল্লেখযোগ্য যে, উত্তৰ-পূবৰ প্ৰথমখন PPP (Public Private Partnership) আৰ্হিত স্থাপিত শিক্ষানুষ্ঠানখনৰ ২০ শতাংশ চৰকাৰীভাৱে সংৰক্ষিত আসনৰ নামভৰ্ত্তি গুৱাহাটীৰ অসম অভিযান্ত্ৰিক প্ৰতিষ্ঠানত হোৱা কাউন্সিলিং প্ৰক্ৰিয়াৰ যোগেদি কৰা হৈছে। বাকী ৮০ শতাংশ আসনৰ নামভৰ্ত্তি কলেজ প্ৰাংগনত কৰা হ’ব।

এই সম্পৰ্কত বিতং তথ্যৰ বিষয়ে জানিবলৈ আগ্ৰহী শিক্ষাৰ্থী, অভিভাৱকসকলে ৮৮১২০২৮৮২২ বা ৯৩৬৫৪০৪৫১৩ ফোন নম্বৰত যোগাযোগ কৰিব পাৰিব।