খেলৰ সময়ত আক্ৰমণাত্মক মুডত প্ৰতিপক্ষৰ ওপৰত জপিয়াই পৰে। খেলৰ শেষত বিপক্ষৰ ক্ৰিকেটাৰৰ হাত ধৰি হাঁহি হাঁহি কথা পাতে। এই আদৰ্শ ক্ৰিকেটত দীৰ্ঘদিন ধৰি চলি আহিছে। ষষ্ঠবাৰৰ বাবে বিশ্বকাপ জয় কৰাৰ পিছতো তাৰ ব্যতিক্ৰম নহ’ল। গ্লেন মেক্সৱেলে বিৰাট কোহলীক সাৱটি ধৰি সান্ত্বনা দিলে।
ভাৰতীয় তাৰকাগৰাকীয়ে অষ্ট্ৰেলিয়াৰ অল-ৰাউণ্ডাৰগৰাকীক তেওঁৰ অটোগ্ৰাফযুক্ত জাৰ্চি উপহাৰ দিয়ে। দুগৰাকী ক্ৰিকেটাৰে নিজৰ প্ৰতিদ্বন্দ্বিতা পাহৰি যোৱাৰ এই ছবিখন নেট জগতত ভাইৰেল হৈ পৰিছে।
বিশ্বকাপৰ ফাইনেলত তীব্ৰ উত্তেজনাৰ মাজতো দেখা গ’ল মেক্সৱেল আৰু কোহলীক লঘু মেজাজত। অষ্ট্ৰেলিয়াৰ অল-ৰাউণ্ডাৰে বিৰাটক লক্ষ্য কৰি থ্ৰ’ এটা মাৰিলে, যিটো বিৰাটে হাতেৰে ৰখাই দিয়ে। সেই ঘটনাৰ পিছত দুয়োকে হাঁহি থকা দেখা যায়। কিন্তু তাৰ পিছত ভাৰতীয় শিবিৰত আনন্দৰ একো নাছিল। মেচখনত জয়লাভ কৰি অষ্ট্ৰেলিয়াই ষষ্ঠবাৰৰ বাবে বিশ্বকাপত জয়লাভ কৰে।
লগতে পঢ়কঃ শক্তিশালী প্ৰতিপক্ষৰ বিৰুদ্ধে পৰাজয়! স্বপ্নভংগৰ পিছত টীম ইণ্ডিয়াক কি বাৰ্তা কিংবদন্তি ক্ৰিকেটাৰৰ?
স্বাভাৱিকতে খেলৰ অন্তত ভাৰতীয় ক্ৰিকেটাৰসকলে কান্দোনত ভাগি পৰে। অধিনায়ক ৰোহিত শৰ্মাৰ পৰা যশপ্ৰীত বুমৰাহলৈকে কোনেও চকুলো লুকুৱাব পৰা নাছিল। সেই সময়ত বিশ্ব জয়ৰ উল্লাস এৰি মেক্সৱেল ভাৰতীয় শিবিৰৰ ফালে আহে। অল ৰাউণ্ডাৰগৰাকীয়ে আই পি এলৰ সতীৰ্থ বিৰাটক সাৱটি ধৰি সান্ত্বনা দিয়ে। মেন অৱ দ্য টুৰ্ণামেণ্ট বিৰাটেও নিজৰ স্বাক্ষৰিত জাৰ্চি মেক্সৱেলৰ হাতত তুলি দিয়ে।
Respect and admiration 💛💙#CWC23 pic.twitter.com/FQqoXLDavn
— ICC (@ICC) November 20, 2023
সদ্য সমাপ্ত বিশ্বকাপত বিৰাট-মেক্সৱেল দুয়োজনে উজ্জ্বল প্ৰদৰ্শন আগবঢ়ায়। বিশ্বকাপত সৰ্বাধিক ৰান সংগ্ৰহকাৰী হিচাপে ৭৬৫ ৰান সংগ্ৰহ কৰি অভিলেখ গঢ়িবলৈ সক্ষম হৈছে কিং কোহলীয়ে। আনহাতে, ৰান চেজিঙৰ ইতিহাসত প্ৰথমটো ডাবল চেঞ্চুৰী মেক্সৱেলৰ বেটৰ পৰাই আহিছে। কিন্তু নিয়ম অনুসৰি প্ৰতিযোগিতাখনৰ শেষ হাঁহিটো ফুটিল এজনৰ মুখত। বিজয়ৰ মুকুট কিং কোহলীৰ মূৰত নুঠিল।
উল্লেখ্য যে অষ্ট্ৰেলিয়াৰ অলৰাউণ্ডাৰ গ্লেন মেক্সৱেলৰ পত্নী ভিনি ৰমন ভাৰতীয় হোৱাৰ সূত্ৰে তেওঁ ভাৰতৰ জোঁৱাই।
