এগৰাকী জ্যেষ্ঠ মহিলা চিকিৎসকে উত্থাপন কৰা এক গুৰুতৰ অভিযোগক কেন্দ্ৰ কৰি উত্তপ্ত হৈ পৰিছে গুৱাহাটী চিকিৎসা মহাবিদ্যালয় আৰু হাস্পতালৰ পৰিৱেশ। প্ৰতিষ্ঠানখনৰ অধ্যক্ষ ডাঃ অচ্যুত বৈশ্যৰ বিৰুদ্ধে কৰ্মস্থলীত নিৰ্যাতনআৰু মানসিক উৎপীড়ন চলোৱাৰ অভিযোগ উত্থাপন কৰিছে ক্লিনিকেল চাইক’লজী বিভাগৰ এগৰাকী সহযোগী অধ্যাপিকাই। এগৰাকী মহিলাৰ মৰ্যাদাহানি আৰু প্ৰশাসনিক ক্ষমতাৰ অপব্যৱহাৰ কৰাৰ দৰে স্পৰ্শকাতৰ বিষয় সন্নিৱিষ্ট এই অভিযোগৰ পাছতেই মুখ্যমন্ত্ৰীৰ কাৰ্যালয়ৰ নিৰ্দেশত এখন এজাহাৰ পঞ্জীয়ন কৰাৰ লগতে চৰকাৰী পৰ্যায়ত এক উচ্চস্তৰীয় তদন্ত সমিতি গঠন কৰা হৈছে বুলি জানিব পৰা গৈছে।
ক্লিনিকেল চাইক’লজী বিভাগৰ সহযোগী অধ্যাপিকা তথা প্ৰাক্তন মুৰব্বীগৰাকীয়ে যোৱা ৬ ফেব্ৰুৱাৰীত মুখ্যমন্ত্ৰীৰ কাৰ্যালয়ত এক লিখিত অভিযোগ দাখিল কৰে। তেওঁৰ অভিযোগ অনুসৰি, অধ্যক্ষগৰাকীয়ে তেওঁৰ কাৰ্যকালত অনুচিত মন্তব্য, ভাবুকি আৰু ধাৰাবাহিকভাৱে পেছাদাৰী নিৰ্যাতন চলাই আহিছে।
আৰক্ষীৰ ওচৰত দাখিল কৰা এজাহাৰত চিকিৎসক গৰাকীয়ে উল্লেখ কৰিছে যে স্বতন্ত্ৰ ক্লিনিকেল চাইক’লজী বিভাগটো প্ৰতিষ্ঠা হোৱাৰ পিছত আৰম্ভণিতে তেওঁ প্ৰশাসনৰ পৰা প্ৰশংসা লাভ কৰিছিল। কিন্তু পৰৱৰ্তী সময়ত অধ্যক্ষগৰাকীয়ে মহিলা চিকিৎসক গৰাকীক তেওঁৰ কাৰ্যালয়ত অকলশৰে লগ কৰিবলৈ বাধ্য কৰাইছিল। তেওঁ এই কাৰ্যত অস্বস্তি অনুভৱ কৰি সাক্ষাৎ কৰাৰ পৰা বিৰত আছিল। চিকিৎসাগৰাকীৰ মতে, এই সকলোবোৰ কথা হোৱাটছএপ বাৰ্তাৰ জৰিয়তে নথিভুক্ত হৈ আছে।
তেওঁ অধিক অভিযোগ কৰিছে যে অধ্যক্ষগৰাকীয়ে তেওঁক “একেবাৰে আজৰি আৰু অকলশৰে থকা সময়ত” ফোন কৰিবলৈ কৈছিল আৰু তেওঁৰ বাবে “দুৱাৰ সদায় খোলা আছে” বুলি আপত্তিজনক মন্তব্য কৰিছিল। এগৰাকী বিধৱা মহিলা আৰু অধীনস্থ বিষয়া হিচাপে এনে আচৰণে তেওঁক চৰম মানসিক যন্ত্ৰণা দিছিল বুলি তেওঁ জানিবলৈ দিয়ে।
মন্তব্যৰ উপৰিও চিকিৎসাগৰাকীয়ে অধ্যক্ষৰ বিৰুদ্ধে প্ৰশাসনিক বলিষ্ঠকৰণৰো (Administrative Victimisation) অভিযোগ উত্থাপন কৰিছে। তেওঁ কয় যে বিভাগটো গঠন হোৱাৰ পিছতো তেওঁক বিভাগীয় মুৰব্বীৰ দায়িত্ব দিয়া হোৱা নাছিল, যাৰ বাবে চিকিৎসা শিক্ষা সঞ্চালকালয়ৰ হস্তক্ষেপৰ প্ৰয়োজন হৈছিল। তদুপৰি, বিভাগটোৰ শৈক্ষিক পাঠ্যক্ৰম আৰম্ভ কৰা, শিক্ষক নিযুক্তি আৰু বিভাগটো সম্প্ৰসাৰণৰ প্ৰস্তাৱসমূহ বাৰে বাৰে বাধা দি থকা হৈছিল।
আনকি গৱেষণাৰ বিষয়ত আলোচনা কৰোঁতে অধ্যক্ষগৰাকীয়ে তেওঁৰ পত্নীক বিভাগীয় গৱেষণা প্ৰকল্পত অন্তৰ্ভুক্ত কৰিবলৈ পৰামৰ্শ দিছিল, যিটো চিকিৎসাগৰাকীয়ে অনুচিত বুলি গণ্য কৰিছিল। এই বিবাদ তীব্ৰতৰ হৈ পৰে যেতিয়া হঠাতে ক্লিনিকেল চাইক’লজী বিভাগটো বাতিল কৰি আন এটা বিভাগৰ সৈতে চামিল কৰাৰ অধিসূচনা জাৰি কৰা হয়।
এই অভিযোগৰ পাছতে গুৱাহাটীৰ পানবজাৰ মহিলা আৰক্ষী থানাত এখন এজাহাৰ পঞ্জীয়ন কৰাৰ পিছতে আৰক্ষীয়ে প্ৰাথমিক তদন্ত আৰম্ভ কৰিছে বুলি জানিব পৰা গৈছে। আনহাতে, ডাঃ অচ্যুত বৈশ্যই সংবাদ মাধ্যমক জনাই যে কৰ্তৃপক্ষৰ নিৰ্দেশ মৰ্মে তেওঁ এই মুহূৰ্তত কোনো মন্তব্য নকৰে, কিন্তু তদন্ত সমিতিৰ সন্মুখত উপস্থাপন কৰিবলৈ তেওঁৰ ওচৰত সকলো প্ৰয়োজনীয় নথিপত্ৰ সাজু আছে।
ইতিমধ্যে এগৰাকী জ্যেষ্ঠ মহিলা অধিবক্তা আৰু এগৰাকী মহিলা চৰকাৰী বিষয়াক লৈ গঠিত দুজনীয়া তদন্ত সমিতিক এই বিষয়টোৰ সঠিক তদন্ত কৰি প্ৰতিবেদন দাখিল কৰিবলৈ চৰকাৰে নিৰ্দেশ দিছে বুলি জানিব পৰা গৈছে।
