ভাৰতীয় উপকূলৰক্ষী বাহিনী আৰু পুনে শুল্ক বিভাগৰ যুটীয়া অভিযানত জব্দ হৈছে ডুবাইলৈ অবৈধভাৱে ৰপ্তানিৰ চেষ্টা কৰা তিনি সহস্ৰাধিক পশুধন। ৰত্নগিৰি উপকূলৰ পৰা অভিযানকাৰী দলটোৱে ৩৫০০ ছাগলী আৰু ভেড়া জব্দ কৰে।
মহাৰাষ্ট্ৰৰ বিজয়দুৰ্গ বন্দৰৰ পৰা ডুবাইলৈ এই বৃহৎ পৰিমাণৰ পশুধন ৰপ্তানি কৰা হৈছিল। প্ৰকাশিত খবৰ অনুসৰি, পুনে শুল্ক আয়ুক্তই মহাৰাষ্ট্ৰৰ কংকন উপকূলৰ পৰা ভাৰতৰ বাহিৰলৈ ছাগলী আৰু ভেড়াৰ সম্ভাৱ্য ৰপ্তানি সন্দৰ্ভত চোৰাংচোৱাৰ তথ্য লাভ কৰিছিল।
এই তথ্যৰ আধাৰত বিজয়দুৰ্গ বন্দৰৰ পৰা ওখা বন্দৰলৈকে সাগৰীয় পথৰ জৰিয়তে গুজৰাটলৈ উপকূলীয় সামগ্ৰীৰ বেশত পশুধন যোগান দিয়া বুলি নথি-পত্ৰ দাখিল কৰা এখন জাহাজৰ ওপৰত নিৰীক্ষণ কৰা হৈছিল।
কিন্তু যেতিয়া জাহাজখনে গতিপথ সলনি কৰি ডুবাই অভিমুখে ৰাওনা হোৱা পৰিলক্ষিত হয়, জাহাজখনক বাধা দি মহাৰাষ্ট্ৰৰ আংৰে বন্দৰলৈ অনাৰ বাবে ক’ষ্ট গাৰ্ডৰ এখন জাহাজ নিয়োগ কৰা হয়।
২১ এপ্ৰিলৰ পুৱতি নিশা পশুধন সৰবৰাহ কৰা জাহাজখন আটক কৰে বিষয়াসকলে। ইয়াৰ পিছতে জাহাজখনক জয়গাডলৈ লৈ যোৱা হয় আৰু জয়গাডত শুল্ক বিষয়াৰ এটা দলে পুংখানুপুংখ তালাচী চলায়।
এই তালাচীৰ সময়ত জাল নথি-পত্ৰৰ ভিত্তিত অবৈধভাৱে পশুধন ৰপ্তানি কৰাৰ ইংগিত দিয়া বহু নথি জব্দ কৰে অভিযানকাৰী দলটোৱে। দলটোৱে এই বৃহৎ পৰিমাণৰ পশুধন জিম্মাত লোৱাৰ লগতে ক্ৰু আৰু কাৰ্গোৰ সৈতে জাহাজখন তদন্তৰ বাবে আটক কৰে।
