নেশ্যনেল ইনফৰ্মেটিক্স চেণ্টাৰ, গোলাঘাটৰ উদ্যোগত ভোটগ্ৰহণ প্ৰক্ৰিয়াৰ সৈতে জড়িত বিষয়াসকলৰ সহায়ৰ বাবে তথা নিৰ্বাচন সুচাৰুৰূপে সম্পন্ন কৰাৰ উদ্দেশ্যে এটা বিশেষ এণ্ড্ৰইড এপ “প’ল-সম্পৰ্ক” বিকশিত কৰা হৈছে ।
জিলা উপায়ুক্ত তথা জিলা নিৰ্বাচন বিষয়া বিভাষ চন্দ্ৰ মোদীয়ে বৃহস্পতিবাৰে জিলা উপায়ুক্তৰ কাৰ্য্যালয়ৰ সভাকক্ষত আয়োজিত এক অনুষ্ঠানত এপটো আনুষ্ঠানিকভাৱে মুকলি কৰে।
এপটো মুকলি কৰি মোদীয়ে কয় যে নিৰ্বাচন প্ৰক্ৰিয়াটো চলি থকাৰ সময়ত ভোটগ্ৰহণৰ সৈতে জড়িত প্ৰিজাইডিং আৰু পলিং তথা অন্য বিষয়াসকলক গুৰুত্বপূৰ্ণ তথ্য-পাতি সময়মতে যোগান ধৰিব পৰাকৈ এপটো মুকলি কৰা হৈছে।
এপটোত বিষয়াসকলে ভোটগ্ৰহণ কেন্দ্ৰৰ বিভিন্ন তথ্য-পাতি, সংশ্লিষ্ট ভোটগ্ৰহণ কেন্দ্ৰত নিয়োজিত কৰ্মচাৰীৰ সবিশেষ, প্ৰশিক্ষণৰ তথ্য আদি লাভ কৰিব।
ভোটগ্ৰহণৰ কামত নিয়োজিত বিষয়াসকলে সদৰৰ পৰা ৰাওনা হোৱাৰ সময়ত হোৱা অযথা ভিৰ এই এপটোৱে বহু পৰিমানে নিয়ন্ত্ৰণ কৰিব আৰু ঘৰতে বহি তেওঁলোকে প্ৰয়োজনীয় তথ্য-পাতি লাভ কৰিব।
কোভিড পৰিস্থিতিত ই যথেষ্ট ফলপ্ৰসূ হ’ব বুলি আশা কৰা হৈছে। ডি আই অ’ অভিজিত কাকতি আৰু এ ডি আই অ’ সুশ্ৰুত ৰাজখোৱাই এই এপটো বিকশিত কৰি উলিয়াইছে।
উল্লেখযোগ্য যে গোলাঘাট জিলা প্ৰশাসনে “নিৰ্বাচন গোলাঘাট” নামৰ এটা এপো বিকশিত কৰিছে। এই এপটোৱে নিৰ্বাচনত জড়িত বিষয়াসকলক তথ্য যোগান ধৰাৰ লগতে ৰাজনৈতিক দলসমূহক যানবাহনৰ অনুমতি দিয়া ব্যৱস্থাটোক যথেষ্ট সৰল কৰিছে।
এপ মুকলি অনুষ্ঠানটোত জিলা পৰিষদৰ চি ই অ’ অভিজিৎ বৰুৱা, জিলা উন্নয়ন আয়ুক্ত অৰ্পা বাগলাৰী আৰু অতিৰিক্ত উপায়ুক্ত মুন গগৈ, পল্লৱী গগৈ আৰু কুলদ্বীপ হাজৰিকা উপস্থিত আছিল।
