পইচাৰ লোভত পৰি অনৈতিক কাৰ্যত জড়িত হোৱাৰ ঘটনা সঘনাই দেখা যায়। এইবাৰ ৰাষ্ট্ৰীয় ঘাইপথত ডকাইতিৰ ৰূপত দেখা গৈছে সাংবাদিক আৰু জাতীয় সংগঠনৰ নেতাসকলক। গোলাঘাটত সংঘটিত এনে এটা ঘটনাত এটা ব্যক্তিগত পৰ্টেলৰ সাংবাদিকসহ জাতীয় সংগঠনৰ তিনিজন লোকক ধনদাবী আৰু ডকাইতিৰ অভিযোগত আৰক্ষীয়ে আটক কৰিছে।
ইটিভিৰ প্ৰতিবেদন অনুসৰি, গোলাঘাটৰ ৰঙাজানৰ ৩৯ নং ৰাষ্ট্ৰীয় ঘাইপথত মংগলদৈৰ পৰা ডিমাপুৰ অভিমুখে যোৱা এখন গাহৰী ভৰ্তি ট্ৰাকৰ চালকক ভয় দেখুৱাই ধনদাবী কৰি লুটপাতৰ চেষ্টা চলোৱাৰ সময়ত গোলাঘাট আৰক্ষীয়ে হাতে-লুটে ধৰিবলৈ সক্ষম হয়। ধৃত চাৰিজন লোকৰ নাম হ’ল— বিতু মুণ্ডা (সাংবাদিক), ডেনিছ বৰা, প্ৰাঞ্জল বৰা আৰু গৌতম ঠেঙাল। এই আটাইকেইজন লোক জাতীয় সংগঠনৰ সৈতে জড়িত বুলি জানিব পৰা গৈছে।
ধৃতসকলৰ বিৰুদ্ধে দীৰ্ঘদিন ধৰি ৩৯ নং ৰাষ্ট্ৰীয় ঘাইপথত বিভিন্ন মালবাহী যানৰ পৰা ধনদাবী কৰি লুটপাত কৰাৰ অভিযোগ পূৰ্বেও উত্থাপিত হৈছিল। কিছুদিন পূৰ্বে ৰঙাজানৰ এটা বাসগৃহত হোৱা ডকাইতিৰ ঘটনাতো এই যুৱকসকল জড়িত থকাৰ তথ্য আৰক্ষীয়ে লাভ কৰিছে। বৰ্তমান আৰক্ষীয়ে চাৰিজন লোকক আটক কৰি জেৰা চলাই আছে।
অসম জাতীয়তাবাদী যুৱ ছাত্ৰ পৰিষদৰ ৰঙাজান আঞ্চলিক বিষয়ববীয়া ডেনিছ বৰাই কয় যে, “গোলাঘাট জিলাত গাহৰী বিক্ৰী নিষিদ্ধ হোৱাৰ বাবে আমি গাহৰী ভৰ্তি গাড়ী অনুসৰণ কৰিছিলোঁ, আৰু তাৰ পিছতেই আৰক্ষীয়ে আমাক আটক কৰে।”
আন এজন ধৃত যুৱকে কয়, “মই কোনো সংগঠনৰ নহয়, মই কেৱল তেওঁলোকৰ লগতহে আহিছিলোঁ।”
ধৃত সাংবাদিক বিতু মুণ্ডাই কয় যে, “মোক সংগঠনৰ লোকসকলে গাহৰী ভৰ্তি গাড়ী আছে বুলি কৈছিল। মই গৈ মোবাইলত ভিডিঅ’ কৰিবলৈ গৈছিলোঁ, তাতেই আৰক্ষীয়ে ধৰিলে।”
উল্লেখ্য যে, ইয়াৰ পূৰ্বেও ডেনিছ বৰাৰ নেতৃত্বত এই দলটোৱে ৰাষ্ট্ৰীয় ঘাইপথত চীনৰ পৰা গোপনে সৰবৰাহ কৰা নহৰু ভৰ্তি গাড়ী ৰখাই ধনৰ লেনদেন কৰাৰ গুৰুতৰ অভিযোগৰ সন্মুখীন হৈছিল। এই ঘটনাই প্ৰশ্ন উত্থাপন কৰিছে যে জাতীয় সংগঠনৰ নামত আৰু কিমান লোক অপৰাধত জড়িত হৈ আছে। আৰক্ষীয়ে ঘটনা সন্দৰ্ভত তদন্ত অব্যাহত ৰাখিছে। তদন্তৰ অন্ততহে ঘটনাৰ সবিশেষ জানিব পৰা যাব।
