মাতৃত্ব অৰ্জন কৰিলে বলিউডৰ মোহময়ী অভিনেত্ৰী দীপিকা পাডুকণে। লগতে পিতৃত্বৰ সৌভাগ্য অৰ্জন কৰিলে বিখ্যাত অভিনেতা তথা দীপিকাৰ স্বামিই ৰণওবীৰ সিঙে।
কোলা শুৱনি হ’ল দীপিকাৰ। ৰণবীৰ-দীপিকাৰ প্ৰথমটো সন্তানে দেখিলে পৃথিৱীৰ প্ৰথম পোহৰ। সংবাদ মাধ্যমৰ খবৰ অনুসৰি এটি কন্যা সন্তান জন্ম হৈছে ৰণবীৰ-দীপিকাৰ। অৱশ্যে ৰণবীৰ আৰু দীপিকাই এই সম্পৰ্কে কোনো আনুষ্ঠানিক বিবৃত্তি দিয়া নাই।
মুম্বাইৰ এইচ এন ৰিলায়েন্স হাস্পতালত কন্যা সন্তানটিয়ে জন্ম লাভ কৰিছে বুলি জানিব পৰা গৈছে। বৰ্তমানৰ মাতৃ আৰু নৱজাতকৰ স্বাস্থ্য সুস্থিৰ বুলি জানিব পৰা গৈছে।
অৱশ্যে সন্তানৰ নামকৰণ কৰিছেনে নাই বা কি নাম ৰাখিছে সেই কথা এতিয়াও জানিব পৰা নাই সংবাদ মাধ্যমে।
দেওবাৰে পৰিয়ালৰ লোকৰ সৈতে চিকিৎসালয়খনত উপস্থিত হৈছিল ৰণবীৰ আৰু দীপিকা। পৰ্দাযুক্ত গাড়ীৰ ভিতৰত বহি যোৱাৰ বাবে ফটোগ্ৰাফাৰসকলে দম্পতীহালৰ ফটো তু্লিব পৰা নাছিল।
উল্লেখ্য যে চলিত বৰ্ষৰ ফেব্ৰুৱাৰী মাহত দম্পতীহালে গৰ্ভধাৰণৰ কথা ঘোষণা কৰিছিল। সামাজিক মাধ্যমত দিয়া এটা পোষ্টত ছেপ্তেম্বৰত ভাল খবৰ অহাৰ কথা কৈছিল তেওঁলোকে।
২০১৩ চনত ৰাম-লীলা ছবিৰ জৰিয়তে দুয়োৰে মাজত আৰম্ভ হৈছিল ঘনিষ্ঠতা। কিন্তু দুয়ো গোপনে ৰাখিছিল তেওঁলোকৰ প্ৰেমৰ সম্পৰ্কৰ কথা। ২০১৮ চনত ইটালীত দুয়ো আৱদ্ধ হৈছিল বিবাহপাশত।
