অসম চৰকাৰৰ কৰ্মচাৰীসকলৰ বাবে এক সুখবৰ প্ৰকাশ পাইছে। শ্ৰীমন্ত শংকৰদেৱ সংঘৰ আসন্ন ৯৫সংখ্যক বাৰ্ষিক অধিবেশনত অংশগ্ৰহণ কৰিবলগীয়া কৰ্মচাৰীসকলৰ বাবে চৰকাৰে ৬ আৰু ৭ ফেব্ৰুৱাৰী তাৰিখে দুদিনৰ বিশেষ নৈমিত্তিক ছুটী ঘোষণা কৰিছে। ৰাজ্য চৰকাৰৰ সাধাৰণ প্ৰশাসন বিভাগে এক আনুষ্ঠানিক জাননীৰ জৰিয়তে এই বিশেষ ৰেহাইৰ কথা ৰাজহুৱা কৰিছে। ইয়াৰ ফলত শংকৰী সংস্কৃতিৰ অনুগামী চৰকাৰী বিষয়া-কৰ্মচাৰীসকলে কোনো অসুবিধা নোহোৱাকৈ ধৰ্মীয় অনুষ্ঠানটোত ভাগ ল’ব পাৰিব।
এইবাৰ শ্ৰীমন্ত শংকৰদেৱ সংঘৰ ৯৫সংখ্যক মূল অধিৱেশনখনি শোণিতপুৰ জিলাৰ জামুগুৰিহাটত অতি উলহ-মালহেৰে আয়োজন কৰা হৈছে। ৬ ফেব্ৰুৱাৰীৰ পৰা ৮ ফেব্ৰুৱাৰীলৈ তিনিদিনীয়া কাৰ্যসূচীৰে অনুষ্ঠিত হ’বলগীয়া এই বিশাল ধৰ্মীয় সভালৈ লাখ লাখ ভক্তৰ আগমন ঘটিব বুলি আশা কৰা হৈছে। জামুগুৰিহাটৰ জ্যোতি বিষ্ণু সমন্বয় ক্ষেত্ৰত বৰ্তমান এক উখল-মাখল পৰিৱেশৰ সৃষ্টি হৈছে আৰু প্ৰায় ২০০০ বিঘা ভূমিৰ এক বিশাল এলেকা এই অধিৱেশনৰ বাবে সাজু কৰি তোলা হৈছে।
অধিৱেশনস্থলীত ভক্তসকলৰ সেৱাৰ বাবে ১০ হাজাৰ সেৱক-সেৱিকাৰ এটা বৃহৎ বাহিনী সাজু হৈ আছে। দৈনিক প্ৰায় ১০ লাখ ভকতক চোৱা-চিতা কৰিব পৰাকৈ কেন্দ্ৰীয় সেৱা বাহিনীয়ে ব্যৱস্থা গ্ৰহণ কৰিছে। অনুষ্ঠানটোৰ অন্যতম আকৰ্ষণ হৈছে ইয়াৰ সমূহীয়া ভোজনালয়। ১৫ হাজাৰ লোকে একেলগে আহাৰ গ্ৰহণ কৰিব পৰাকৈ এক সুবিশাল ভোজনালয় নিৰ্মাণ কৰা হৈছে য’ত ভাতৃত্ববোধৰ এক সুন্দৰ নিদৰ্শন দেখিবলৈ পোৱা যাব। ৰান্ধনীশালত তিনি শতাধিক চৌকাৰ ব্যৱস্থা কৰা হৈছে আৰু দৈনিক এহেজাৰ ৰান্ধনীয়ে ভকতসকলৰ বাবে প্ৰসাদ আৰু আহাৰ প্ৰস্তুত কৰিব।
ধৰ্মীয় কাৰ্যসূচীৰ উপৰিও এই অধিৱেশনত বিভিন্ন জনগোষ্ঠীয় কলা-সংস্কৃতিৰো সমাহাৰ ঘটিব। শংকৰী সংস্কৃতিৰ সমান্তৰালভাৱে মণিপুৰী আৰু নগা জনগোষ্ঠীৰ লোক-কৃষ্টিও ইয়াত প্ৰদৰ্শন কৰা হ’ব। প্ৰদৰ্শনীৰ বাবে ১০০০ টা বিপণী সাজু কৰা হৈছে য’ত শোণিতপুৰৰ ঐতিহ্যমণ্ডিত বাৰেচহৰীয়া ভাওনা, চতিয়াৰ ঐতিহাসিক থানা আৰু তেজপুৰৰ হৰিহৰ যুদ্ধৰ দৰে দৃশ্যসমূহ ফুটি উঠিব। ভক্ত আৰু দৰ্শনাৰ্থীৰ সুবিধাৰ বাবে যাতায়াতৰ ক্ষেত্ৰতো বিশেষ গুৰুত্ব দিয়া হৈছে। সমীপতে ১৫ টা পাৰ্কিং স্থান নিৰ্মাণ কৰাৰ লগতে ৰে’ল বিভাগেও ধলাইবিল ষ্টেচনত ডনিপল’ আৰু লাচিত এক্সপ্ৰেছ ৰখোৱাৰ বিশেষ ব্যৱস্থা কৰিছে।
