ৰে’ল আৰক্ষীৰ দৈনিক তালাচীৰ সময়ত শনিবাৰে গুৱাহাটী ৰে’লৱে ষ্টেশ্যনত ৪৬০ পেকেট বিদেশী চিগাৰেট সহ ৰংগস্বামী পনীৰ ছালভাম (৫৬) নামৰ এগৰাকী লোকক আটক কৰা হয়।
ৰাতিপুৱা ৭ মান বজাত আৰক্ষীয়ে ব্যক্তিগৰাকীক চিগাৰেটসহ আটক কৰিবলৈ সক্ষম হয়। কোৰিয়াত নিৰ্মিত চিগাৰেটখিনিৰ আনুমানিক আন্তঃৰাষ্ট্ৰীয় বজাৰ মূল্য প্ৰায় ৫ লাখ টকাৰ ওচৰা-ওচৰি হ’ব বুলি ৰে’ল আৰক্ষীয়ে প্ৰকাশ কৰে।
আৰক্ষীৰ জেৰাৰ সময়ত ছালভামে ডিমাপুৰৰ পৰা চিগাৰেটখিনি এক লাখ টকাত কিনি অহা বুলি স্বীকাৰ কৰে আৰু সেই চিগাৰেটখিনি পশ্চিমবংগৰ হাওৰাত ৫ লাখ টকাত বিক্ৰী কৰাৰ বাবে লৈ গৈ আছিল বুলি কয়।
আটক কৰা ছালভামৰ ঘৰ তামিলনাডুৰ গান্ধী নগৰত। বাংগালুৰু এক্সপ্ৰেছৰ পৰা জব্দ কৰা হয় চিগাৰেটখিনি।
উল্লেখযোগ্য যে, গুৱাহাটী ৰে’লৱে ষ্টেশ্যনত প্ৰায়ে নিষিদ্ধ সামগ্ৰী ৰে’ল আৰক্ষীৰ অভিযানত জব্দ হৈ আহিছে। বিশেষকৈ ডিমাপুৰৰ পৰা অহা অবৈধ সামগ্ৰী গুৱাহাটী ৰে’ল ষ্টেশ্যন হৈ ভাৰতৰ অন্য প্ৰান্তলৈ যায়।
আৰক্ষীয়ে এই ক্ষেত্ৰত এটা বৃহৎ আন্তঃৰাষ্ট্ৰীয় চক্ৰ জৰিত হৈ আছে বুলি উল্লেখ কৰে।