ভাৰত জোড়ো যাত্ৰা বন্ধ কৰিবলৈ কেন্দ্ৰই ব্যৱহাৰ কৰিছিল সকলো শক্তি: আমেৰিকাত মন্তব্য ৰাহুল গান্ধীৰ
প্ৰায় তিনিমাহ ধৰি ৰাহুল গান্ধীৰ নেতৃত্বত সমগ্ৰ দেশজুৰি চলিছিল কংগ্ৰেছৰ ভাৰত জোড়ো যাত্ৰা। এই যাত্ৰাই লাভ কৰিছিল প্ৰবল জনসমৰ্থন। যাত্ৰাৰ সফলতাৰ প্ৰমাণ দি কংগ্ৰেছে শেহতীয়াকৈ জয়লাভ কৰিছিল কৰ্ণাটক বিধানসভা নিৰ্বাচনত।
কিন্তু যাত্ৰা চলি থকাৰ সময়ত কংগ্ৰেছ যথেষ্ট বাধাৰ সম্মুখীন হৈছিল। আনকি কেন্দ্ৰীয় চৰকাৰে ভাৰত জোড়ো যাত্ৰা বন্ধ কৰিবলৈ সমস্ত শক্তি ব্যৱহাৰ কৰিছিল। আজি ছান ফ্ৰান্সিস্কোত এক অনুষ্ঠানত ভাষণ প্ৰদান কৰি এই অভিযোগ কৰিছে যাত্ৰাৰ নেতৃত্ব বহন কৰা কংগ্ৰেছ নেতা ৰাহুল গান্ধীয়ে।
আমেৰিকা ভ্ৰমণৰত কংগ্ৰেছ নেতাগৰাকী মঙলবাৰে ছান ফ্ৰান্সিস্কোত উপস্থিত হৈছিল। এই ভ্ৰমণৰ সময়ত তেওঁ প্ৰবাসী ভাৰতীয় আৰু আমেৰিকাৰ সাংসদসকলৰ সৈতে সাক্ষাৎ কৰিব। ছান ফ্ৰান্সিস্কোত আজি এক অনুষ্ঠানতে ভাৰত জোড়ো যাত্ৰাৰ কথা স্মৰণ কৰে গান্ধীয়ে।
কংগ্ৰেছ নেতাগৰাকীয়ে কয়, “ভাৰত জোড়ো যাত্ৰা বন্ধ কৰিবলৈ চৰকাৰে নিজৰ সকলো শক্তি ব্যৱহাৰ কৰিছিল। বিজেপিয়ে জনসাধাৰণক ভাবুকি দি চৰকাৰী সংস্থাসমূহৰ অপব্যৱহাৰ কৰি আছে। কিন্তু ইয়াৰ একো ফল নাপালে আৰু যাত্ৰাৰ প্ৰভাৱ বাঢ়িল।”
দেশবাসীৰ হৃদয়ত ‘ভাৰতত যোগদান কৰক’ ধাৰণা থকাৰ বাবেই যাত্ৰা সফল হোৱা বুলি উল্লেখ কৰি গান্ধীয়ে লগতে কয় যে দেশৰ জনসাধাৰণৰ সৈতে সংযোগ স্থাপনৰ বাবে কংগ্ৰেছক প্ৰয়োজনীয় সকলো ব্যৱস্থা বিজেপি-আৰএছএছৰ নিয়ন্ত্ৰণত আছিল। সেয়ে জনসাধাৰণৰ সৈতে সংযোগ স্থাপনৰ উদ্দেশ্যেই ভাৰত জোড়ো যাত্ৰা আৰম্ভ হৈছিল বুলি তেওঁ দোহাৰে।
উল্লেখ্য যে, বিগত বৰ্ষৰ ৭ ছেপ্টেম্বৰত কন্যাকুমাৰীত আৰম্ভ হোৱা ভাৰত জোড়ো যাত্ৰা ৩ হাজাৰ কিলোমিটাৰতকৈও অধিক দূৰত্ব অতিক্ৰম কৰাৰ পিছত ৩০ জানুৱাৰীত শ্ৰীনগৰত সামৰণি পৰে। এই যাত্ৰাই স্নেহ, সন্মান আৰু নম্ৰতাৰ মনোভাৱ কঢ়িয়াই লৈ ফুৰিছিল বুলি আজি মন্তব্য কৰে ৰাহুল গান্ধীয়ে।
ছান ফ্ৰান্সিস্কোত অনুষ্ঠিত হোৱা অনুষ্ঠানত বিজেপি আৰু আৰএছএছে দেশৰ সংবিধানৰ ওপৰত আক্ৰমণ কৰাৰ অভিযোগ উত্থাপন কৰাৰ লগতে বিজেপি আৰু আৰএছএছে জাতি আৰু ধৰ্মীয় ভিত্তিত দেশক বিভাজিত কৰিবলৈ চেষ্টা কৰিছে বুলিও অভিযোগ কৰে।