অব্যাহত মল্লযুঁজাৰুৰ প্ৰতিবাদ: ফেডাৰেচনক সকীয়নি ইউনাইটেড ৱৰ্ল্ড ৰেষ্টলিঙৰ

যৌন নিৰ্যাতনৰ অভিযোগত ভাৰতীয় মল্লযুঁজ ফেডাৰেচনৰ সভাপতি ব্রিজ ভূষণ চৰণ সিঙৰ বিৰুদ্ধে প্ৰতিবাদ অব্যাহত ৰাখিছে দেশৰ শীৰ্ষ মল্লযুঁজাৰুসকলে। গত দেওবাৰে প্ৰতিবাদৰ সময়ত মল্লযুঁজাৰুসকল দিল্লী আৰক্ষীৰ দমনমূলক আচৰণৰো সন্মুখীন হৈছিল।

মল্লযুঁজাৰুসকল সন্মুখীন হোৱা এনে পৰিস্থিতিৰ মাজতে মল্লযুঁজৰ আন্ত:ৰাষ্ট্ৰীয় সংস্থা ইউনাইটেড ৱৰ্ল্ড ৰেষ্টলিঙে বিবৃতি প্রকাশ কৰিছে৷ এই বিবৃতিটোত ইউনাইটেড ৱৰ্ল্ড ৰেষ্টলিঙে দেওবাৰে নতুন সংসদ ভৱনলৈ প্ৰতিবাদী সমদলৰ সময়ত মল্লযুঁজাৰুসকলক আটক কৰি ৰখাৰ ঘটনাক গৰিহণা দিয়ে।

আন্ত:ৰাষ্ট্ৰীয় সংস্থাটোৱে লগতে ভাৰতীয় মল্লযুঁজ ফেডাৰেচনৰ সভাপতি ব্রিজ ভূষণৰ বিৰুদ্ধে তদন্তৰ ফলাফলশূণ্যতাত হতাশাও প্ৰকাশ কৰিছে আৰু ৪৫ দিনৰ ভিতৰত ফেডাৰেচনৰ নিৰ্বাচন অনুষ্ঠিত নহ’লে ফেডাৰেচনক নিলম্বন কৰাৰ হুংকাৰ দিছে।

বিবৃতিটোত সংস্থাটোৱে ব্ৰিজ ভূষণ চৰণ সিঙৰ বিৰুদ্ধে উত্থাপিত অভিযোগ সন্দৰ্ভত কৰ্তৃপক্ষক সম্পূৰ্ণ আৰু নিৰপেক্ষ তদন্ত কৰিবলৈ আহ্বান জনাইছে। আনহাতে ৪৫ দিনৰ সময়সীমাৰ ভিতৰত ফেডাৰেচনৰ নিৰ্বাচন অনুষ্ঠিত নকৰিলে ফেডাৰেচনক নিলম্বন কৰা হ’ব আৰু ইয়াৰ ফলত খেলুৱৈসকলে নিৰপেক্ষ পতাকাৰ তলত প্ৰতিযোগিতাত অংশগ্ৰহণ কৰিব লাগিব বুলি লগতে কয় ইউনাইটেড ৱৰ্ল্ড ৰেষ্টলিঙে।

লগতে ইউনাইটেড ৱৰ্ল্ড ৰেষ্টলিঙে ভাৰতৰ প্ৰতিবাদী মল্লযুঁজাৰুসকলৰ সৈতে এক বৈঠক অনুষ্ঠিত কৰি খেলুৱৈসকলৰ অৱস্থা আৰু সুৰক্ষাৰ বিষয়ে বুজ ল’ব আৰু তেওঁলোকে প্ৰকাশ কৰা উদ্বেগসমূহৰ ন্যায্য সমাধানৰ বাবে সংস্থাৰ সমৰ্থন পুনৰ নিশ্চিত কৰিব বুলিও ইউনাইটেড ৱৰ্ল্ড ৰেষ্টলিঙে উল্লেখ কৰিছে।

UWW issues statement on Wrestling Federation of Indiahttps://t.co/TyNfSX57qW

— United World Wrestling (@wrestling) May 30, 2023

উল্লেখ্য যে, দেশৰ গৌৰৱ এই তাৰকা মল্লযুঁজাৰুসকলে দেওবাৰে সন্মুখীন হোৱা অকল্পনীয় পৰিস্থিতিৰ পাছতে মঙলবাৰে বিভিন্ন অলিম্পিককে ধৰি বিভিন্ন আন্ত:ৰাষ্ট্ৰীয় প্ৰতিযোগিতাত অৰ্জন কৰা পদকসমূহ গংগাত বিসৰ্জন দি ইণ্ডিয়া গেটৰ সন্মুখত আমৰণ অনশনত বহাৰ হুংকাৰ দিছিল।

অৱশ্যে কৃষক নেতা নৰেশ টিকাইটৰ হস্তক্ষেপত প্ৰতিবাদকাৰী মল্লযুঁজাৰুসকলে মঙলবাৰে হৰিদ্বাৰত গংগাত পদক বিসৰ্জনৰ পৰিকল্পনা সাময়িকভাৱে স্থগিত ৰাখে। কিন্তু একে সময়তে মল্লযুঁজ ফেডাৰেচনৰ মুৰব্বীগৰাকীৰ বিৰুদ্ধে ব্যৱস্থা গ্ৰহণৰ বাবে মল্লযুঁজাৰুসকলে পাঁচ দিনৰ সময়সীমা বান্ধি দিছে।

অন্যথা গংগাত তেওঁলোকে দেশৰ হৈ লাভ কৰা মেডেল বিসৰ্জন কৰিব বুলি স্পষ্ট কৰি দিয়ে মল্লযুঁজাৰুসকলে।