এতিয়াৰে পৰা OTT প্লেটফৰ্ম আৰু ডিজিটেল মিডিয়াক নিয়ন্ত্ৰণ কৰিব কেন্দ্ৰীয় চৰকাৰে।
বুধবাৰে কেন্দ্ৰীয় তথ্য আৰু সম্প্ৰচাৰ মন্ত্ৰণালয়ে জাৰি কৰা এক বিজ্ঞপ্তি যোগে এই কথা ঘোষণা কৰিছে।
ইয়াৰ ফলত এতিয়াৰ পৰা OTT প্লেটফৰ্ম আৰু ডিজিটেল মিডিয়াই নিজ ইচ্ছামতে ভিডিঅ’ অথবা সংবাদ পৰিৱেশন কৰিব নোৱাৰিব।
কেন্দ্ৰীয় তথ্য আৰু সম্প্ৰচাৰ মন্ত্ৰণালয়ে এতিয়াৰ পৰা OTT প্লেটফৰ্ম আৰু ডিজিটেল মিডিয়াৰ কনটেন্টত সুক্ষ্ম দৃষ্টি ৰাখিব।
উল্লেখ্য যে দেশৰ সৰ্বোচ্চ ন্যায়ালয়ত চলি থকা এটা গোচৰক কেন্দ্ৰ কৰি কেন্দ্ৰীয় চৰকাৰে ডিজিটেল মিডিয়াৰ বাবে এক নিৰ্দিষ্ট আইন প্ৰণয়ন কৰাৰ বাবেও চিন্তা চৰ্চা কৰিছিল।
ইফালে চৰকাৰী নিৰ্দেশনাটোত কোৱা হৈছে যে এতিয়াৰে পৰা অনলাইন ফিল্ম আৰু নিউজ কনটেন্ট, সমসাময়িক ঘটনা প্ৰৱাহ সম্পৰ্কীয় অনুষ্ঠান তথ্য সম্প্ৰচাৰ মন্ত্ৰণালয়ৰ আওতাত অন্তভুৰ্ক্ত হ’ব।
ইয়াৰ পৰা এইটো নিশ্চিত হৈছে যে ছপা আৰু বৈদ্যুতিন সংবাদ মাধ্যমৰ দৰে OTT প্লেটফৰ্ম আৰু ডিজিটেল মিডিয়াত চৰকাৰে চোকা দৃষ্টি ৰাখিব।
সমগ্ৰ বিশ্বৰ লগতে ভাৰততো স্মাৰ্ট ফোন আৰু ইন্টাৰনেটৰ বহুল ব্যৱহাৰৰ পিছত OTT প্লেটফৰ্ম আৰু ডিজিটেল মিডিয়াৰ প্ৰভাৱ ব্যাপকৰূপত বৃদ্ধি পাইছে।
OTT প্লেটফৰ্মত অশ্লীলতা তথা নগ্নতাৰ পয়োভৰ পৰিলক্ষিত আৰু ডিজিটেল মিডিয়া অৰ্থাৎ প’ৰ্টেলবোৰত ভুৱা বাতৰি প্ৰচাৰ হোৱা বুলি বিভিন্ন পক্ষই অভিযোগ কৰি আহিছে।
এই অভিযোগৰ পিছতে কেন্দ্ৰীয় চৰকাৰে OTT প্লেটফৰ্ম আৰু ডিজিটেল মিডিয়াক নিয়্ন্ত্ৰণ কৰাৰ বাবে এই পদক্ষেপ গ্ৰহণ কৰিছে।