সংসদত কৃষি আইন বাতিল বিধেয়ক গৃহীত হোৱাৰ পিছতো নিম্নতম সমৰ্থন মূল্য (MSP)ৰ সন্দৰ্ভত আলোচনাৰ দাবীত প্ৰতিবাদ অব্যাহত ৰাখিছে কৃষক সকলে।
কেন্দ্ৰীয় চৰকাৰে এই বিষয়ত কমিটি গঠনৰ বাবে প্ৰতিবাদকাৰী কৃষকসকলৰ মুখ্য সংস্থা সংযুক্ত কিষাণ মৰ্চাৰ (এছকেএম) পাঁচজন সদস্যৰ নাম বিচাৰিছে।
উল্লেখ্য যে সংযুক্ত কিষাণ মৰ্চাই ভৱিষ্যতৰ কাৰ্যপন্থা চূড়ান্ত কৰিবলৈ ৪ ডিচেম্বৰত এক গুৰুত্বপূৰ্ণ বৈঠক অনুষ্ঠিত কৰাৰ সিদ্ধান্ত লৈছে।
এই সন্দৰ্ভত মৰ্চাৰ নেতা দৰ্শন পালে কয়, “আজি কেন্দ্ৰই শস্যৰ বাবে নিম্নতম সমৰ্থন মূল্য (এমএছপি) বিষয়ৰ আলোচনা কৰিবলৈ সমিতি গঠনৰ বাবে এছকেএমৰ পৰা পাঁচটা নাম বিচাৰিছে। আমি এতিয়াও নামবোৰৰ ওপৰত সিদ্ধান্ত লোৱা নাই। আমি আমাৰ ৪ ডিচেম্বৰৰ বৈঠকত এই সিদ্ধান্ত লম।”
স্বৰাজ ইণ্ডিয়াৰ নেতা যোগেন্দ্ৰ যাদৱেও চৰকাৰৰ পৰা পঞ্জাৱৰ কৃষক নেতালৈ এই সন্দৰ্ভত ফোন কল অহা বুলি নিশ্চিত কৰিছে। অৱশ্যে তেওঁ লগতে কয় যে সমিতিখনৰ বিষয়ে কোনো লিখিত তথ্য প্ৰাপ্ত কৰা নাই। কোনো বিৱৰণৰ অনুপস্থিতিত বিষয়টোত মন্তব্য দিয়াটো অতি সোনকালে হ’ব বুলি তেওঁ মন্তব্য কৰে।
জামহুৰী কিষাণ সভাৰ সাধাৰণ সম্পাদক কুলৱন্ত সিং সান্ধুৱে সংবাদ মাধ্যমৰ আগত কয় যে “সমিতিখনত অন্তৰ্ভুক্ত হ’বলগীয়া পাঁচজন লোকৰ নাম মনোনীত কৰাৰ সন্দৰ্ভত আমি চৰকাৰৰ পৰা এটা বাৰ্তা পাইছো। কৃষক ইউনিয়নৰ নেতা আৰু বিশেষজ্ঞসকলক লৈ গঠিত পাঁচজন লোকৰ নাম নিৰ্ণয় কৰিবলৈ বুধবাৰে সংযুক্ত কিষাণ মৰ্চা (এছকেএম)ৰ বৈঠকত মিলিত হ’ব।”
