সাৱধান! অসমত ঔষধে আপোনাক মাৰিও পেলাব পাৰে

চৰকাৰী চিকিৎসালয়ত ঔষধ যোগানৰ ঠিকা লাভ কৰা স্বাস্থ্য মন্ত্ৰীৰ ঘনিষ্ঠৰ ঔষধ কোম্পানিয়ে অসমৰ ৰোগীক খুৱাই আহিছে ভেজাল ঔষধ। এই ভেজাল ঔষধ ৰোগীক দিয়াৰ অনুপযুক্ত বুলি প্ৰতিবেদন দিয়া বাবে আৰ ডি টি এল (Regional Drug Testing Laboratory)ৰ ভাৰপ্ৰাপ্ত অধ্যক্ষ তথা ড্ৰাগ এনালিষ্ট ডাঃ পাৰ্থজ্যোতি গগৈক জম্মুলৈ শাস্তিমূলক বদলি কৰা হৈছিল।

ডাঃ গগৈয়ে ৰাষ্ট্ৰীয় স্বাস্থ্য মিশ্যনৰ এই অন্যায় নিৰ্দেশৰ বিৰুদ্ধে কেন্দ্ৰীয় প্ৰশাসনিক ন্যায়াধিকৰণত (Central Administrative Tribunal) আপত্তি দিয়াত তেওঁৰ বদলৰি নিৰ্দেশ তিনি মাহৰ বাবে স্থগিত কৰা হ’ল। গগৈয়ে ড্ৰাগ এনালিষ্ট হিচাপে মুঠ ৪৩বিধ ঔষধ মানুহে খোৱাৰ অনুপযুক্ত বুলি প্ৰতিবেদন দিছিল।

ইয়াৰ সমান্তৰালভাৱে যোৱা ২১ আগষ্টত ৰাষ্ট্ৰীয় স্বাস্থ্য অভিযান, অসমে (NHM, Assam) ৰাজ্যখনৰ ১৫জনকৈ জিলা ঔষধ ভঁৰাল পৰিচালক (district drug store manager)ক বিভিন্ন স্থানলৈ বদলি কৰিছে। এজন-দুজন নহয়, ১৫ জনকৈ স্বাস্থ্য বিষয়াক একেবাৰতে এইদৰে বিভিন্ন স্থানলৈ বদলি কৰাটো এটা নজিৰবিহীন ঘটনা আৰু ইয়াৰ আঁৰত ভেজাল দৰবৰ তথ্য ফাদিলেৰে চৰকাৰক বিপদত পেলোৱাটোৱেই কাৰণ বুলি গুৰুতৰ অভিযোগ আনিছে দুৰ্নীতি বিৰোধী যুৱশক্তি অসমে।

আজি গুৱাহাটী প্ৰেছ ক্লাবত এখন সংবাদমেল দি দুৰ্নীতি বিৰোধী যুৱশক্তি অসমে তথ্য সহকাৰে সমগ্ৰ বিষয়টো সাংবাদিকসকলৰ দৃষ্টিগোচৰ কৰে।

দুৰ্নীতি বিৰোধী যুৱশক্তিয়ে অভিযোগ কৰা মতে, জিলা ঔষধ ভঁৰাল পৰিচালকসকলক কৰা এই বদলি সম্পূৰ্ণ প্ৰতিশোধমূলক।

তেওঁলোকে সংবাদমেলত কয়, “নৱ কুমাৰ ডেকা নামৰ জিলা ঔষধ ভঁৰাল পৰিচালকগৰাকীক যোৱা ২১ আগষ্টৰ দিনা বাক্সা জিলা কাৰ্য্যালয়ৰ পৰা কামৰূপ মেট্ৰ’ৰ ঔষধৰ গুদাম ঘৰলৈ বদলি কৰিছে। লগতে ভাস্কৰজ্যোতি পাঠক নামৰ অন্য এগৰাকী ভঁৰাল পৰিচালকক বৰপেটাৰ পৰা কামৰূপ গ্ৰাম্যৰ জিলা ঔষধ গুদামঘৰলৈ বদলি কৰিছে।”

এনেদৰে ১৫গৰাকী ভঁৰাল পৰিচালকক অন্য জিলালৈ বদলি কৰাৰ বিষয়টোত ৰহস্য আছে বুলি দুৰ্নীতি বিৰোধী যুৱশক্তি অসমৰ সভাপতি ধৰ্মকান্ত গগৈয়ে দাবী কৰে।

বদলিৰ নিৰ্দেশ পোৱা আনকেইগৰাকী জিলা ঔষধ ভঁৰাল মেনেজাৰ হৈছে : নবকুমাৰ ডেকা, ভাস্কৰজ্যোতি পাঠক, ফুলুৱাৰ আহমেদ, সমীৰণ শৰ্মা, ত্ৰিদিপ চাংমাই, খনীন তালুকদাৰ, ৰিয়াজুদ্দিন আহমেদ, ৰাতুল আলী, ৰাজ্জালাৰ ৰহমান, সঞ্জয় বৈশ্য, নূপুৰ গোহাঁই, মঃ ময়দুল ইছলাম, দিব্যজ্যোতি সন্দিকৈ, মনোজ কুমাৰ তায়েং, দ্বীপজ্যোতি বড়ো।

দুৰ্নীতি বিৰোধী যুৱশক্তি সভাপতিগৰাকীয়ে কয় যে আৰ টি আই আৱেদনৰ তথ্য প্ৰদান কৰাৰ বাবেই জিলা দৰব ভঁৰালৰ মেনেজাৰক বদলিকৰণৰ নিৰ্দেশ জাৰি কৰিছে ৰাষ্ট্ৰীয় স্বাস্থ্য অভিযান, অসমে।

তেওঁ লগতে কয়, “বদলিকৰণৰ উদ্দেশ্য এটাই– ভেজাল দৰব যোগানৰ কেলেংকাৰি গাপ দিয়া।”

আনহাতে, উক্ত সংবাদমেলতে সভাপতি গগৈয়ে কয় “ৰাষ্ট্ৰীয় স্বাস্থ্য অভিযানৰ অধীনত বিতৰণ কৰা ভেজাল দৰব খুওৱা বাবে ৰাজ্যখনত বহুতো ৰোগীৰে পাকস্থলী বেয়া হৈছে।”

তেওঁ লগতে কয় যে বৰপেটাত একেদিনাই ১২টাকৈ শিশু মৃত্যু মুখত পৰিব লগীয়া হৈছিল, কিন্তু তাৰ কোনোধৰণৰ তদন্ত ৰাজ্যৰ স্বাস্থ্য বিভাগে নকৰিলে।

সংবাদমেলত তেওঁ ৰাষ্ট্ৰীয় স্বাস্থ্য অভিযান, অসমৰ সঞ্চালক জে ভি এন সুব্ৰমনিয়মক পোনপটীয়া প্ৰশ্ন কৰি কয় “এসপ্তাহৰ ভিতৰত ১৫ গৰাকীকৈ জিলা দৰব ভঁৰাল মেনেজাৰক বদলি কৰা হ’ল কিয়? পূৰ্বতে এনেকুৱাধৰণৰ বদলি কৰা হোৱা নাছিল কিয়? এওঁলোকৰ কি দোষ আছিল?”

স্বাস্থ্য বিভাগৰ এনে প্ৰতিশোধমূলক বদলিকৰণৰ বিৰুদ্ধে অহা ২৮ আগষ্টৰ পৰা দুৰ্নীতি বিৰোধী যুৱশক্তি, অসমৰ উদ্যোগত জিলা স্বাস্থ্য যুটীয়া সঞ্চালকৰ কাৰ্য্যালয়সমূহত এলানি প্ৰতিবাদী কাৰ্য্যসূচী ৰূপায়ণ কৰাৰ কথা ঘোষণা কৰে সংগঠনটোৰ সভাপতি ধৰ্মকান্ত গগৈয়ে। উক্ত প্ৰতিবাদী কাৰ্য্যসূচীত তেওঁলোকে ৰাষ্ট্ৰীয় স্বাস্থ্য অভিযানৰ মিছন সঞ্চালক আৰু স্বাস্থ্য মন্ত্ৰীৰ জুমুঠি দাহ কৰিব বুলিও তেওঁ জনায়।