ডেৰ বছৰ যোৰা কৃষক আন্দোলনৰ অন্যতম দাবী নূন্যতম সমৰ্থন মূল্য (এমএছপি) সন্দৰ্ভত এখন পেনেল গঠন কৰিবলৈ কেন্দ্ৰীয় চৰকাৰ প্ৰতিশ্ৰুতিবদ্ধ।
নিৰ্বাচন শেষ হোৱাৰ পিছত এই ক্ষেত্ৰত আগবাঢ়িবলৈ সেউজ সংকেত দিছে নিৰ্বাচন আয়োগে। আজি ৰাজ্যসভাত কৃষি মন্ত্ৰী নৰেন্দ্ৰ সিং তোমৰে এই কথা সদৰি কৰিছে।
যোৱা বছৰ নৱেম্বৰত তিনিখন কৃষি আইন বাতিল কৰাৰ কথা ঘোষণা কৰাৰ সময়ত প্ৰধানমন্ত্ৰী নৰেন্দ্ৰ মোদীয়ে এমএছপিৰ ওপৰত আইনী গেৰাণ্টিৰ বাবে কৃষকসকলৰ দাবীৰ বিষয়ে আলোচনা কৰিবলৈ এখন সমিতি গঠন কৰাৰ প্ৰতিশ্ৰুতি দিছিল।
সংসদৰ প্ৰশ্নকালত এক প্ৰশ্নৰ উত্তৰ দি তোমৰে কয় যে চৰকাৰে এই সন্দৰ্ভত আগবঢ়াৰ উদ্দেশ্যে পাঁচখন ৰাজ্যৰ বিধানসভা নিৰ্বাচনৰ প্ৰতি লক্ষ্য ৰাখি নিৰ্বাচন আয়োগলৈ পত্ৰ প্ৰেৰণ কৰা হৈছে।
মন্ত্ৰীজনে লগতে কয় যে এমএছপি সম্পৰ্কীয় সমিতি গঠনৰ বিষয়টো মন্ত্ৰালয়ৰ দ্বাৰা বিবেচনাধীন আৰু নিৰ্বাচন শেষ হোৱাৰ পিছত সমিতি গঠন কৰা হ’ব।
“সমগ্ৰ দেশে জানে যে প্ৰধানমন্ত্ৰীয়ে শস্যৰ বৈচিত্ৰতা, প্ৰাকৃতিক কৃষি আৰু এমএছপি কাৰ্যকৰী আৰু স্বচ্ছ কৰাৰ বাবে এখন সমিতি গঠনৰ কথা ঘোষণা কৰিছে। প্ৰধানমন্ত্ৰীয়ে কৰা ঘোষণাৰ প্ৰতি চৰকাৰ প্ৰতিশ্ৰুতিবদ্ধ।” তোমৰে কয়।
তেওঁ কয় যে যিহেতু নিৰ্বাচন চলি আছে, চৰকাৰে নিৰ্দেশনাৰ বাবে নিৰ্বাচন আয়োগলৈ পত্ৰ লিখিছে। নিৰ্বাচন আয়োগে নিৰ্বাচন সমাপ্ত হোৱাৰ পিছত সমিতিখন গঠন কৰা উচিত বুলি মত প্ৰকাশ কৰিছে বুলিও মন্ত্ৰীজনে সদৰি কৰে।
উল্লেখ্য যে অহা ১০ ফেব্ৰুৱাৰীৰ পৰা উত্তৰ প্ৰদেশ, উত্তৰাখণ্ড, মণিপুৰ, গোৱা আৰু পঞ্জাৱ- এই পাঁচখন ৰাজ্যত বিধানসভা নিৰ্বাচন অনুষ্ঠিত হ’ব।
