ক’ৰ’নাৰ দ্বিতীয় পৰ্যায়ৰ সংক্ৰমণ বৃদ্ধি পোৱাৰ প্ৰতি লক্ষ্য ৰাখি গ্ৰীচ চৰকাৰে সমগ্ৰ দেশতে পুনৰ লকডাউন ঘোষণা কৰিছে।
প্ৰধান মন্ত্ৰী কুৰিয়াকোছ মিটছোটাকিছে দেশত লকডাউন ঘোষণা কৰি কয় যে এইটো শেষ সিদ্ধান্ত বুলি ভবা হৈছিল যদিও নিয়ন্ত্ৰণ কৰিব নোৱাৰা পৰিস্থিতিৰ বাবে এনে সিদ্ধান্ত লোৱা হ’ল।
ইফালে ইটালীতো, প্ৰতিদিনে ক’ৰ’না সংক্ৰমণৰ ঘটনা ভয়াৱহভাৱে বৃদ্ধি পাবলৈ ধৰাত দেশখনত নিশা ১০ বজাৰ পৰা পুৱা ৫ বজালৈ কাৰ্ফিউ জাৰি কৰিছে।
ৰোগীৰ সংখ্যা দিনক দিনে বৃদ্ধি পাই থকাৰ বাবে চিকিৎসালয়ত বিচনা আৰু ভেণ্টিলেটৰৰ সংখ্যা বৃদ্ধি কৰা হৈছে।
আনহাতে সংক্ৰমণৰ বাবে ৰাছিয়াৰ পৰিস্থিতিও বেয়া। বিদ্যালয় খোলাৰ সিদ্ধান্ত স্থগিত ৰখা হৈছে। যোৱা ২৪ ঘণ্টাত ২৯ সহস্ৰাধিক নতুন ঘটনা আহিছে।
ক’ৰ’না পজিটিভৰ সংস্পৰ্শলৈ অহাৰ পিছত চুইডেনৰ প্ৰধান মন্ত্ৰী ষ্টীফন লফভেন আইছ’লেশ্যন হৈছে।
দেশখনত ক’ৰ’না আক্ৰন্তৰ সংখ্যা বৃদ্ধি পোৱাৰ উপৰি মৃত্যুৰ গ্ৰাফডালো উৰ্ধমুখী হৈছে।
ইফালে ক’ৰ’নাক লৈ চিন্তিত নৰৱেও এই সন্দৰ্ভত কেতবোৰ নতুন নিয়ম জাৰি কৰিছে। এথিয়াৰে পৰা দেশখনলৈ অহা প্ৰতিজন নাগৰিকেই আইছ’লেশ্যনত থকাটো জৰুৰী।
