ধুমধামেৰে চলিছিল বিয়াৰ আয়োজন।
দৰাই চাকৰি কৰে এটা মাল্টি নেচনেল কোম্পানীত, কইনা চিকিৎসক।
সেয়ে বিয়াৰ আয়োজনো হৈছিল বিলাসবহুলভাবে। বিয়াৰ দিনা যথা সময়ত কইনা ঘৰত আহি উপস্থিত হৈছিল দৰা।
বিয়াৰ মণ্ডপত বহি থকাৰ মাজতে দৰাই হঠাতে এবাৰ বাহিৰলৈ বুলি ওলাই আহে।
সেই অহাই অহা, দৰাই আৰু বিয়াৰ মণ্ডপলৈ উভতি নগ’ল।
বহু সময় ধৰি দৰা মণ্ডপলৈ উভতি নহাত বিয়া ঘৰত হুৱা-দুৱা লাগে।
সকলোৱে দৰাক বিচাৰি চলাথ কৰে যদিও কতো সন্ধান পোৱা নগ’ল দৰাৰ।
ক্ষন্তেক পিছতে উৰহী গছৰ ওৰ ওলাল। দৰাচলতে নবীন নামৰ যুৱক জনে এটা সময়ত ভালপাইছিল আন এগৰাকী যুৱতীক।
কিন্তু সেই যুৱতীৰ সৈতে বিয়া পতাৰ কোনো পৰিকল্পনা নাছিল দৰাৰ।
সেয়ে দৰাৰ পৰিয়ালে কৰ্ণাটকৰ চিকমাগালুৰুৰ চিকিৎসক সিন্ধু নামৰ যুৱতীগৰাকীৰ সৈতে নবীনৰ বিয়া ঠিক কৰিছিল।
এই কথা জানিব পাৰি নবীনৰ প্ৰাক্তন প্ৰেমিকাই নবীনে তেওঁক বিয়া নাপাতিলে বিয়া ঘৰৰ অভ্যাগতসকলৰ সন্মুখতে বিহ পান কৰি আত্মহত্যা কৰিব বুলি ভাবুকি দিছিল।
প্ৰাক্তন প্ৰেমিকাৰ এনে ভাবুকিত ভয় খাই দৰাই বিয়াৰ মণ্ডপ এৰি প্ৰাক্তন প্ৰেমিকাৰ সৈতে ক’ৰৱালৈ গুচি গৈছিল।
দৰা পলাই যোৱাৰ পিছতে মহা বিপদত পৰে কইনা সিন্ধুৰ পৰিয়াল।
সিন্ধুৰ ভৱিষ্যতৰ কথা চিন্তা কৰিয়েই তেওঁৰ পৰিয়ালে নতুন দৰা এজনৰ সন্ধান আৰম্ভ কৰিলে। কিন্তু লাগ বুলিলেই নতুন দৰা এজন পায় ক’ত!
সমস্যাৰ সমাধান ওলাবলৈ বেছি পৰ নালাগিল।
কইনা ঘৰলৈ বিয়া খোৱাৰ উদ্দেশ্যে আহিছিল কৰ্ণাটক পৰিবহন নিগমৰ বাছ কণ্ডাক্টৰ চন্দ্ৰাপ্পা।
কইনা ঘৰৰ লোকে চন্দ্ৰাপ্পাকেই সিন্ধুক বিয়া পতাৰ বাবে খাটনি ধৰে। কইনায়ো ঘৰৰ সকলোৰে কথাত হয়ভৰ দিয়াত সেই একেখন মণ্ডপতে সিন্ধুৰ বিয়া সম্পন্ন হৈ যায়।
মণ্ডপ একেখন হ’লেও পিছে সিন্ধুৰ দৰা হ’ল মাল্টি নেচনেল কোম্পানীত চাকৰি কৰা নবীনৰ সলনি বাছ কণ্ডাক্টৰ চন্দ্ৰাপ্পাহে।