অৱশেষত নীতিগত সিদ্ধান্ত! ১২ আৰু ২৮ শতাংশ জি এছ টি আৰু নাথাকিব। এই সামগ্ৰী আৰু সেৱাসমূহৰ বাবে মাত্ৰ দুটা ‘স্লেব’ থাকিব – ৫ আৰু ১৮ শতাংশ। এতিয়ালৈকে বিভিন্ন সামগ্ৰীৰ ওপৰত চাৰিটা স্তৰত জি এছ টি কাৰ্যকৰী আছিল। বিত্ত মন্ত্ৰালয়ে ইয়াক দুটালৈ হ্ৰাস কৰাৰ প্ৰস্তাৱ দিছিল।
বৃহস্পতিবাৰে জি এছ টি পৰিষদৰ বৈঠকত এই প্ৰস্তাৱত অনুমোদন জনোৱা হয়। এই নতুন কৰ গাঁথনি কাৰ্যকৰী হ’লে কমেও ৯০ শতাংশ সামগ্ৰীৰ মূল্য হ্ৰাস পাব বুলি মন্ত্ৰীসভা নিশ্চিত। মধ্যবিত্ত শ্ৰেণীয়েও ইয়াৰ সমাধানৰ আশা কৰিছে।
অৱশ্যে এই সন্দৰ্ভত চূড়ান্ত সিদ্ধান্ত গ্ৰহণ কৰিব জি এছ টি পৰিষদে। ধঁপাত, ধঁপাতজাতীয় সামগ্ৰী বা বিলাসী গাড়ীৰ দৰে সামগ্ৰীৰ জি এছ টিত ক্ষতিপূৰণ চেছ বা ‘sin good tax’ যোগ কৰাৰ ধাৰণাও মন্ত্ৰীসভাৰ হাতত আছে। তেনে ক্ষেত্ৰত সেই সামগ্ৰীসমূহৰ জি এছ টি ৪০ শতাংশতকৈও অধিক হ’ব পাৰে।
এই সিদ্ধান্ত কাৰ্যকৰী হ’লে জি এছ টি খণ্ডৰ সামগ্ৰিক ৰাজহ হ্ৰাস পাব। ইয়াৰ ক্ষতিপূৰণ কেনেকৈ দিয়া হ’ব? এই সন্দৰ্ভত কি চিন্তা কৰিছে বিত্ত মন্ত্ৰালয়ে? সেই প্ৰশ্নটো মন্ত্ৰী গোটৰ বৈঠকত উত্থাপন হৈছিল।
এগৰাকী বিত্তীয় পৰ্যবেক্ষকে কয় যে, “নতুন গাঁথনি কাৰ্যকৰী হ’লে বহু সামগ্ৰীৰ দাম হ্ৰাস পাব। জনস্বাৰ্থৰ বাবে এয়া ভাল খবৰ। কিন্তু আমি বিত্ত মন্ত্ৰালয়ৰ পৰাও জানিব বিচাৰো যে জি এছ টি সংগ্ৰহত মুঠ লোকচান কিমান হ’ব? আৰু সেই লোকচান ৰোধ কৰিবলৈ চৰকাৰে কি চিন্তা কৰিছে? আমাৰ একমাত্ৰ আশংকাটো হ’ল এই ক্ষতিপূৰণ মোকাবিলা কৰিবলৈ বক্ৰপথেৰে সাধাৰণ মানুহৰ ওপৰত কোনো শুল্ক জাপি দিয়া নহয়টো? সেইটো স্পষ্ট হোৱা দৰকাৰ।”
বৃহস্পতিবাৰে মন্ত্ৰী গোটৰ বৈঠকত লোৱা সিদ্ধান্ত অনুসৰি ১২ শতাংশৰ তলৰ ৯৯ শতাংশ সামগ্ৰী ৫ শতাংশ জি এছ টিৰ অধীনত আহিব। সেই তালিকাত ঔষধ, কৃষিজাত সামগ্ৰী, খাদ্য, বস্ত্ৰ, জোতা, ঘৰুৱা সামগ্ৰী আৰু দৈনন্দিন প্ৰয়োজনীয় সামগ্ৰী আদি অন্তৰ্ভুক্ত কৰা হৈছে। আকৌ, ২৮ শতাংশ জি এছ টিৰ অধীনত থকা গৰিষ্ঠসংখ্যক সামগ্ৰীও ১৮ শতাংশৰ তললৈ আহিব। দৈনিক উপভোগ্য সামগ্ৰী এই তালিকাত অন্তৰ্ভুক্ত কৰা হৈছে।
স্বাস্থ্য আৰু জীৱন বীমাৰ প্ৰিমিয়াম জি এছ টিৰ পৰিসৰৰ বাহিৰত ৰখাৰ বিষয়টোও মন্ত্ৰী গোটৰ বৈঠকত আলোচনা কৰা হয়। কম বেছি পৰিমাণে সকলো সদস্যই এই কথাত গুৰুত্ব আৰোপ কৰিছিল যে এই সিদ্ধান্ত ফলপ্ৰসূ হ’লেও প্ৰথমে নিশ্চিত হ’ব লাগিব যে বীমা কোম্পানীসমূহে গ্ৰাহকৰ ওচৰলৈ যাতে এই সমাধান লৈ উপনীত হয়। অৰ্থাৎ প্ৰিমিয়াম কমাব লাগে।
২০১৭ চনত চাৰিটা পৰ্যায়ত জি এছ টি সংগ্ৰহৰ সিদ্ধান্ত লোৱাৰ পিছৰে পৰা বিৰোধীয়ে সৰৱ হৈ পৰিছিল। তেওঁলোকৰ বক্তব্য আছিল যে কৰ গাঁথনি ইমান জটিল নকৰি জি এছ টি দুটা স্লেবত ৰাখিব লাগে। সেই সময়ত মোডী চৰকাৰে এই কথাত গুৰুত্ব দিয়া নাছিল। আঠ বছৰ ধৰি সাধাৰণ মানুহৰ পৰা চাৰিটা স্লেবত উচ্চ হাৰত জি এছ টি সংগ্ৰহ কৰা হৈছে। ইমান দিনৰ পাছত কেন্দ্ৰীয় বিত্ত মন্ত্ৰালয়ৰ গা লৰিছে!
