আমেৰিকাৰ আইঅ’ৱাৰ মাস্কাটিন চহৰত ঘৰুৱা বিবাদত পৰিয়ালৰ ছয়জন সদস্যক গুলীয়াই হত্যা কৰি নিজেও আত্মহত্যা কৰে এজন বন্দুকধাৰীয়ে। এনে আকস্মিক ঘটনাই স্থানীয় বাসিন্দাৰ মাজত শোক আৰু আতংক বিয়পাইছে।
আৰক্ষীৰ সূত্ৰ অনুসৰি সোমবাৰে বিয়লি এটা ঘৰৰ পৰা বন্দুকৰ গুলীৰ শব্দ শুনাৰ পিছত জৰুৰীকালীন নম্বৰটোলৈ ফোন আহে। এই তথ্য লাভ কৰাৰ লগে লগে আৰক্ষী বিষয়াসকলে দ্ৰুতগতিত সেই স্থানত উপস্থিত হৈ একেটা পৰিয়ালৰ চাৰিজন সদস্যৰ মৃতদেহ উদ্ধাৰ কৰে। অৱশ্যে আৰক্ষী অহাৰ পূৰ্বেই আক্ৰমণকাৰীয়ে সেই স্থানৰ পৰা ওলাই যায়।
পিছত তদন্ত অগ্ৰগতিৰ লগে লগে মহানগৰীৰ আৰু দুটা স্থানত অভিযান চলাই দুজন গুলিবিদ্ধ লোকৰ মৃতদেহ উদ্ধাৰ কৰা হয়। এজনক এটা ঘৰত আৰু আনজনক ওচৰৰ ব্যৱসায়িক প্ৰতিষ্ঠানত মৃত অৱস্থাত উদ্ধাৰ কৰা হয়। ইয়াৰ ফলত মৃত্যু হোৱা লোকৰ সংখ্যা ৬ জনলৈ বৃদ্ধি পায়।
প্ৰাৰম্ভিক তদন্তত আৰক্ষীয়ে নিশ্চিত কৰে যে নিহত আটাইকেইজনেই আক্ৰমণকাৰীৰ পৰিয়ালৰ সদস্য। আৰক্ষীয়ে সন্দেহযুক্ত আক্ৰমণকাৰীজনক ৫২ বছৰীয়া ৰিয়ান উইলছ মেকফাৰ্লেণ্ড বুলি চিনাক্ত কৰিছে।
ঘটনাৰ পিছতো আৰক্ষীয়ে সন্দেহজনক লোকজনক অনুসৰণ অব্যাহত ৰাখিছে। এটা সময়ত মিচিচিপি নদীৰ কাষেৰে পলায়ন কৰাৰ সময়ত তেওঁ এখন পথচাৰীৰ দলঙৰ ওচৰত ঘেৰাও কৰি পেলোৱা হয়।
আৰক্ষীৰ মুখামুখি হোৱাত লোকজনে নিজৰ ওপৰত বন্দুকেৰে গুলী চলাইছিল। পিছত ঘটনাস্থলীতে তেওঁৰ মৃত্যু হয়।
মাস্কাটিনৰ আৰক্ষী অধীক্ষকে কয় যে এই নৃশংস ঘটনাই সমগ্ৰ সমাজক গভীৰভাৱে কঁপাই তুলিছে। এনে ভয়ংকৰ ঘটনাৰ বেদনা শব্দৰে প্ৰকাশ কৰাটো কঠিন।
তদন্তকাৰীয়ে জনোৱা মতে, আক্ৰমণকাৰীৰ পূৰ্বৰ অপৰাধজনিত অভিলেখ আছিল। অৱশ্যে জনসাধাৰণৰ সুৰক্ষাৰ প্ৰতি এতিয়া কোনো ভাবুকি নাই। বৰ্তমানেও আনুষ্ঠানিকভাৱে প্ৰকাশ কৰা হোৱা নাই নিহতসকলৰ পৰিচয় আৰু বয়স। ঘটনাৰ আঁৰৰ সঠিক কাৰণ জানিবলৈ আৰক্ষীয়ে বিতং তদন্ত অব্যাহত ৰাখিছে।
কিন্তু পাৰিবাৰিক বিবাদৰ ফলত সংঘটিত হোৱা এই হত্যাকাণ্ডই ঘৰুৱা হিংসা আৰু আগ্নেয়াস্ত্ৰ ব্যৱহাৰৰ বিপদৰ বিষয়ে আমেৰিকাত পুনৰ এক নতুন আলোচনাৰ সৃষ্টি কৰিছে।
